Tapa nan, dak harei dak paglaong raidiuk ka bhap bini, daong jhul patagok kinh tế xã hội khik kajap an ninh chính trị, siam mekre salamat puk palei. Kadha vak “Bhap bini bangsa takik khang hatai jia tui Đảng”. 

Puk Huổi Lẹ, xã Nậm Giôn, huyện Mường La tỉnh Sơn La hu abih tih urang La Ha daok. Bruk njauk caik hatai dahlau di abih tuk mai tal ini lac jalan tuh nhựa praong, makre, hacih sa-at, dom baoh sang tual daok kreih sambo mau hijao di bein phun mbang baoh, labik sang bac, sang ilamo hu padang ngak khang kajap. Labaih piluh thun dahlau Huổi Lẹ daok lac sa dalam dom puk 5 oh, lac: “oh hu gom, oh hu jalan, oh hu sang bac, oh hu ia hacih saong oh hu riyak phone pan tangin”. Piah hu mbaok meta yau urak ini lac mai meng kham marat di karja, meng bruk sangka di Đảng saong Kanja tapa dom sarak brei ka bhap bini bangsa saong abih di nyu lac bruk sa hatung hatai haong gauk di rahra. Ong Lò Văn Pau, Akaok puk Huổi Lẹ, xã Mường Giôn, huyện Mường la, tỉnh Sơn La khan lac:  “Mbaih tal tukvak ini lac biak sanang hatai paje, hu jalan nhựa tame tal palei, tal xã biak lagaih, jalan nao mai di bhap bini biak siam, oh daok huac glut jaleih tuk hajan ia sua mai.”

Urang Đảng angan Lò Văn Phương thun ini umo 60 thun, lac urang hu angan je di palei saong lac kreih camin ba akaok nao dahlau dalam bruk cak rok patagok kinh tế. Thun 2016, sang ong Phương haong 60 baoh sang daok di puk Huổi Lẹ hu daong brei limo, pabe pajaih saong phun mbang baoh tui danak dak daong cak rok patagok kinh tế xã hội dom bangsa takik biak takik manuac, tukvak 2016- 2025 di Rajaei. Gam haong nan ong jeng hu tut angan tame dom tal pasram, iek glang phun pala, athur raong saong hu nao rivang iek, bac magru piah pandar  tame bruk ngak mbang, pala drak. Urak ini sang ong Phương hu labaih 1ha phun pa-ok, jaik 20 drei kubau, limo saong 30 drei pabe ba jien tame labaih 150 triệu đồng yaok thun. Meng dom bruk ngak hu, ong hadah mbaok meta hu taduan harak mayaom di Thủ tướng Rajaei. Ong Phương brei thau:  “Dahlau deih raidiuk di mikva bangsa La Ha drei biak kan kandah, hu Đảng, Kanja sangka daong phun pala, athur raong, pato tacei mikva jalan ngak mbang, raong glang nan ye urak ini raidiuk di mikva daok di puk Huổi Lẹ hu salih bahrau biak rilo. Mikva urang La Ha kol dahlak tuk halei jeng jum pataom gauk dak padang raidiuk, puk palei Nậm Giôn dak harei dak trei sil haniem phul, cak rok patagok”.

Huyện Mường La hu 822 baoh sang bangsa La Ha daok di 18 puk di 10 xã, rilo meng lac dom bhum atah pasak, sang kan kathaot daok rilo. Meng thun 2019 tal urak ini, huyện hu buh tabiak labaih 18 tỷ đồng piah daong ka mikva blei jamraik, daong athur raong piah ka mikva cak rok patagok kinh tế, tani tanat raidiuk. Gam haong nan hu peih 3 tal pasram, pabak ilamo ka labaih 200 urang jakar lac urang bangsa, rik daong tame bruk peih ngak siam lagaih bruk jak ba di puk palei. Ong Nguyễn Trọng Hiệp, Akaok Jabat bangsa huyện Mường La brei thau:  “Ủy ban bhap bini tỉnh Sơn la hu tabiak sarak 2407 brei ngak Danak dak daong brei saong cak rok patagok kinh tế xã hội di bhap bini bangsa La Ha. Ini lac sarak đặc thù daong ka bhap bini La Ha piah cak rok patagok taong abih gah saong paglaong labik dang di bangsa, patruh eih patrun kathaot, pasiam saong paglaong raidiuk, patruh eih patrun kathaot khang kajap”.

Raidiuk di mikva bhap bini La Ha daok hu salih bahrau biak siam, mbaok meta puk palei bahrau daok dak harei dak mboh cambaih di dom puk palei bhum ceik glaong. Mikva hu salih hatai saneng ka jalan ngak mbang, pala drak, cak rok patagok kinh tế, rahra jumpataom gauk, khik ramik saong patagok dom yaom glaong ilamo meng kan, sa hatung hatai jia tui Đảng, ba tangin rik prein tame haong pakat ủy, karja ngak kaya mada ka puk paga, palei negar./.