Sang ong Lê Minh Luân (daok di xã Tân Hưng, huyện Cái Nước, Cà Mau) hu 2,8 ha taneh raong hadang saong aring. Sang ong palao pablak aring dalam danao raong hadang luac thun. Yaok 2 bilan, ong Luân palao pabak tame 3 tal 4 rabau drei aring pajaih. Bruk raong ini daong ka sang ong hu laba jaik 200 triệu đồng yaok thun, drei aring hu jaik 40%. Langiu di hadang sú ye aring daok daong ka bruk ngak mbang duah jien di sang ong Lê Minh Luân dak harei dak khang kajap: " Palao aring bo nyu diuk hu 35% lac siam paje. Labaih 3 bilan drei mek pablei meneing, kayua raong kapal lô oh ginup pandap mbang. Raong praong hu 250 gram sa drei lac mek pablei hu. Meyah aring binai ye cang ka nyu ginup gạch nan ye suai jang, jaik 5 bilan meng pablei hu. Dalam 1 thun raong hadang saong aring, sang hu bingi sahanang".

15 urang dalam Kapul pambuak bruk ka 5 di pak ini jeng hu jien mek tame tani tanat meng drei aring, lac meng 20 – 30 triệu đồng sa ha sa thun. Lagaih di urang raong hadang saong aring pambuak gauk lac trun hu meneing jien sahui saong abih takik prein sangka jang. Tuk palao raong aring, njauk caik hatai ngak ar pacang ka nyu kajap. Abih di nyu lac, yaok 3-4 harei meng brei aring mbang sa mbang. Pandap mbang lac ikan phi diuk rilo di mala danao raong hadang. Kadha praong abih di urang raong aring lac pilih ruah hu drei pajaih siam saong halau ia siam lac raong hu siam, hu jak jeng. Ong Nguyễn Thanh Đoàn, sa urang daok di xã Tân Hưng khan lac: "Nguyễn Thanh Đoàn: Raong aring ye abih jien rilo ka aring pajaih, daok jru pasiam labik raong ye tuk raong hadang hu ngak bloh paje, tok palao pabak aring tame min. Laba di labik lac oh abih jien blei jru tra".

Dom huyện hu taneh glai dauk ia mbak praong di Cà Mau yau: Ngọc Hiển, Năm Căn, Phú Tân saong huyện Đầm Dơi jeng lagaih piah raong aring. Dalam nan, hu angan di abih lac huyện Năm Căn. Labik ini daok hu ngak po angan nhãn hiệu tập thể “Aring Năm Căn - Cà Mau” hu Cục Sở hữu trí tuệ (Mintri Khoa học - Công nghệ) pok brei angan di puac thun 2015.  Aring Cà Mau hu tauk tem tuk tabiak darak pasar urang blei mbuan duah thau hu asal di nyu tapa mã vạch angaok dom phone tangin.

Aring Cà Mau oh lac hu darak pasar dalam taneh ia takre, bo daok hu pablei tapa dom taneh ia: Trung Quốc, Campuchia; Thái Lan,... Min biak di nyu, darak pasar blei aring Cà Mau rilo abih, jeng lac Trung Quốc. Tukvak hu jit Covid-19 di thun bloh saong tuk Trung Quốc takik brei blei pandap meng negar langiu tame, yaom aring Cà Mau nyu laik trun. Ong Dư Thái Bình, Yam ndok Cty TNHH Dư Thái Bình (daok di ban sit Năm Căn, huyện Năm Căn), bhian pabak aring pablei tabiak negar langiu brei thau, piah ka drei aring Cà Mau tagok hu khang kajap, bruk camereip lac njauk paglaong chất lượng drei pajaih, patui di nan lac brei hu darak pasar pablei tabiak negar langiu tani tanat: "Anak meta mboh lac tuk Trung Quốc blei ye yaom tagok glaong, min tuk kreik pabah mbang negar atau oh mbang ye yaom trun biak biar. Aring lac sa janih raong hu yaom phun jien glaong, min daok pagam pambak tame darak pasar Trung Quốc. Drei aring daok caong hu darak pasar negar langiu tani tanat jang, oh pagam pambak tame darak pasar Trung Quốc tra, aring Cà Mau meng tagok khang hu".

Tỉnh Cà Mau hu jaik 250.000 ha taneh raong hadang haong aring pambuak gauk. Abih tih aring di tỉnh Cà Mau thun 2021 hu 25.000 tấn. Dom thun dahlau daih jeng hu labaih 20.000 tấn sa thun. Dom aring di tỉnh tuk halei jeng oh ginup pablei ka darak pasar dalam taneh ia saong negar langiu./.