Taom mbaok urang bangsa Cam harei Roya

Di Ban raya HCM, hu labaih 6.500 urang bangsa Cam daok di 17 quận, huyện. Dalam dom harei ini, tame dom labik mikva Cam daok di quan P.Nhuận, jeng hu mboh bruk bui sambai di mangaok yaok mbaok meta. Sa-ai Ro-Ki-Giah dok di  153 Duy Tân, Phường 15, quận Phú Nhuận bui sambai lac: Baoh sang halei jeng caga, jeng ngak ganup ahar, ngak cari limo piah mbang Roya Eid Adha bui sambai.

Daok mikva daok di P7, Q6, melam dahlau harei Roya, dom urang dalam baoh sang daok pataom gauk meyai ndem tal lavik melam piah klak rabha dom bruk kan kandah kayua jit ruak, jeng yau dom bruk oh ka ngak hu dalam thun tapa. Sa-ai Mohamad Sền lac urang dalam BQT Sang megik Jamia Sha'adah, Phường 7, Quận 6, TPHCM brei thau: Tal mon 7 mesup, urang pataom gauk sampahyang  dalam sang megik, hadei di nan cap tangin ma-ah brei ka gauk dom bruk oh njauk dalam thun klak saong jak ba gauk kham merat ngak mbang patagok dalam raidiuk.

Thun halei jeng yau nan, tal harei Roya Eid Adha, yaok baoh sang, urang Islam kaya meda, labaih jien ndo bhian blei limo ngak Kurbal, brei ralow ka urang kathaot mbang Roya. Ini lac bruk ngak siam gheih  piah pambuak talei rohim anit ranam gauk, klak rabha haong gauk dalam bhap bini. Ong Châu Ly, 1 urang dalam  BQT sang megik  Jamia Al Anwar, Q8 brei thau:Mikva Cam labik Sang megik  Jamia Al Anwar,  Phường 1, Quận 8  rik jien blei 7 drei limo, kuhria abih tih jaik 140 trieu dong.

Tukvak tapa, Đảng saong Karja hu rilo sarak daong ka urang bangsa Cam di Ban raya HCM. Ta-eng UB bhap bini Ban raya HCM hu kaoh brei rilo jien ndo ka bruk trun kathaot, patagok baoh sang kaya meda, paglong raidiuk bhap bini. Labaih 30 danak dak pakat ban daong ka bhap bini urang bangsa takik hu peih ngak yau ye: brei ka anek saih bangsa Cam nao bac oh abih jien; 5 thun tapa , Mban bangsa Ban raya hu alin brei rilo pandap saong paok jien bac kuhria tui  jien jaik pluh tỷ đồng ka baoh sang urang kan saong anek saih  bangsa Cam; daong ka gru pato akhar huroh Cam  labaih 2 tỷ đồng; daong 30% jien blei harak BHYT ka urang Cam baoh sang dalam sarak jaik kathaot…Meng nan, raidiuk mikva urang bangsa  Cam dak harei dak tani tanat.  Ong Mach Dares Samael, Phaok  kaok  Ban đại diện cộng đồng Islam TP Hồ Chí Minh brei thau: “Langiu di bruk sangka kuhria ka mbang ngui mikva, karja Ban raya kham merat daong gah ilamu, jalan sahaneng, abih di nyu nan lac dom harei Roya praong di urang Cam”.

Dom harei dahlau di tuk Roya, karja Ban raya hu  peih var taom mbaok dom urang Imam, hakim, na-ep naih joi dalam bhap bini Cam, gam nao rivang, alin pandap ka dom baoh sang urang Cam raidiuk kan kandah. Tapa nan, Uỷ ban MT negar ban raya hu brei jien daong ka mikva labaih 120 triệu đồng.

Thun ini, bhap bini urang Cam daok di Ban raya HCM mbang Roya dalam bui sambai kayua langik tasik siam lagaih, raidiuk mikva hadei jit ruak COVID -19 hu trun meneing kan kandah. Karja ban raya hu tacei pato dom gah ngak brei mbuan lagaih piah mikva urang Cam mbang Roya siam mekre./.

Urang lang: Ai Nghiem -10/7/2022