Rilo halau janeng pambuak bruk song Cong An xã duah thau dom labik rah tabiak kanjah jhak

  Di Bình Thuận, bhap bani Cam daok rilo abih di huyện Bắc Bình ngan haong 3 xã harat urang Cam nan lac Phan Hoà, Phan Hiệp, Phan Thanh saong 3 palei daok pablak haong bangsa karei di ban sit Lương Sơn saong xã Bình An. Bhap bani Cam tui dua agama nan lac Ahier saong Awal..

Dahlau diah, dom xã harat urang Cam mboh biak srau dhau, abih di nyu lac bruk dam dara bhian pataom gauk jeng dom kapul nyaom blaoh mek kiak, patau, to thong piah taong gauk ba tal njauk rambuis. Hu dom urang dam tuk nao radaih patuh oh tuak nduan bảo hiểm, peih nduac radaih lạng lách, nẹt pô, gaok mai daok preo puac công an... Anak bruk yau nan, Công an huyện Bắc Bình hu padang bruk “Halau janeng hu mbaok tame khik ramik siam mekre, sron mbon puk palei” di palei Châu Hanh, xã Phan Thanh. Tapa peih ngak, gah công an gam haong Ủy ban MTTQ Việt Nam xã kham merat nao jak ba, pathau khan brei dom halau janeng, urang hu angan je, bon bhap rahra thau ka kein laba, siam lagaih bo bruk ngak ini ba mai. Meng nan, dom halau janeng, bhap bani hu mbaok tame saong abih hatai peih ngak bruk ini jeng yau bruk taong abih bhap bani khik caga siam mekre sron mbon Palei negar.

Tapa dom jak jeng saong dom rik daong di bruk ngak tame bruk khik ramik siam mekre, sron mbon puk palei, Công an tỉnh hu pambuak bruk haong Ủy ban MT negar Việt Nam dom pakat tham mưu pakat ủy, karja puk palei pambak prong bruk “Halau janeng hu mbaok tame khik ramik siam mekre, sron mbon puk palei” piah patagok bruk ngak di dom halau janeng, urang hu angan je. Dom urang hu mbaok tame dom tổ mô hình nan lac dom halau janeng, urang hu mbaol hu meta, urang hu angan je. Tal harei ini, dalam 3 xã harat urang Cam di huyện Bắc Bình padang hu 7 tổ ba akaok nao dahlau dalam bruk “Halau janeng hu mbaok tame khik ramik siam mekre, sron mbon puk palei”. Langiu di nan, dom xã daok caik hatai sangak padang dom bruk “Eng drei pacang caga, eng drei khik iek” yau bruk “Camera an ninh”, “Tổ bhap bani nao pasang iak khik kajap siam mekre sron mbon puk palei”, “But pajaih eng drei pacang caga, eng drei khik iek”...

Tui taong yaom di Công an tỉnh, dom thun tapa dom halau janeng bhum urang Cam hu ngak siam bruk ngak di drei, abih hatai dalam bruk pathau khan, jak ba bhap bani ngak siam jalan ba, sarak di Đảng, hukum di karja. Gam haong nan, thau cambaih dom bruk pambuak pagam tal siam mekre sron mbon puk palei piah khan tagok MBan tacei pato bruk, Công an xã saong pambuak bruk haong kapul langyah, dom kapul nyaom, dom gah chức năng langyah, ba brei siam yaok pluh bruk meriak gauk dalam bol bhap rah ra.

Meng bruk ngak “Halau janeng hu mbaok tame khik ramik siam mekre, sron mbon puk palei”, dom halau janeng, urang hu angan je bhum urang Cam daok khan brei thau rilo bruk biak hu yaom, daong ka gah chức năng duah thau, pacang cakak samar drah dom bruk parai tabiak dom harak gar hu asal kadha oh njauk adat hukum; daong ka gah công an cap mek hu rilo bruk khik piah, pandar ma túy suan adat hukum, me-in mbia - taong bài, pacang cakak hu yaok pluh bruk likei dam pataom gauk ngak srau kadau puk palei. Dom rik daong biak siam nan di dom halau janeng, urang hu angan je dalam bhum urang bangsa takik hu rik daong ka pakat ủy, karja, gah chức năng peih ngak siam bruk khik kajap siam mekre, sron mbon puk palei. Tapa nan hu rik daong praong ka bruk ba 3 xã harat urang Cam lac Phan Thanh, Phan Hiệp, Phan Hòa mek hu chuẩn palei pala bahrau. Yaok thun, dom xã ini jeng mek hu chuẩn “Siam mekre  gah an ninh, trật tự” saong khik kajap tiêu chí 19 dalam bruk padang ngak palei pala bahrau.

Siam lagaih di dom bruk ‘Eng drei pacang caga, eng drei khik iek”, dalam nan hu bruk “Halau janeng hu mbaok tame khik ramik siam mekre, sron mbon puk palei” hu jeng talei pambuak bruk di karja haong mikva bhum urang bangsa Cam. Tapa nan, ngak brei khang kajap jang talei pambuak bruk di dom halau janeng haong pakat ủy, kajar, Công an dom pakat, patagok dom ilamo siam mekre meng kan di bhap bani Cam, dak padang talei gun pataom taong abih bangsa, rik daong khik kajap siam mekre, sron mbon di puk palei./.

Urang lang: Jasi - 29/5