Sa-ai Sa-Roh po Nhà hàng Halal 641, Nguyễn Trãi, Phường 11, Quận 5

Dom harei akaok thun 2022 ini, Ban raya HCM langik la-ar, ong Ysa-Ma-En umo 70 thun, sang daok di Phường 9, quận Gò Vấp peih radaih kuan harei halei jeng hu mbaok di darak Phú Nhuận piah cang urang eiw pajeng. Sa harei duah oh hu hadom jien min ong kham ngak, harei halei jeng tal kreh melam meng mai sang veik. Ong Ysa-Ma-En khan lac, oh ka mboh thun halei radiuk kan kandah yau urak ini.

Oh huac glaih glar, bhap bini Cam daok di Ban raya HCM thuvi thuvar ngak bruk piah duah jien raong baoh sang. Ngan saong muk Hap-Sa -Roh 50 thu daok di Phường 17,  quận Phú Nhuận ye dom harei dahlau meng Tet nan lac tukvak piah amuk kham ngak duah jien. Muk  Hap-Sa -Roh brei thau, meng blaoh muk ruak Covid-19, njauk taong ruak labaih 10 harei. Meng tuk abih ruak, harei halei muk jeng nao ngak pah ka po labik pablei khan ao tal mong 11 melam meng mai sang padeih. Bruk di muk lac lauk khan ao, tanyiak tame kadung, yaok pataom…

Oh lac dom urang ngak apah gah langiu glaih glar, sa-ai Sa-Y-Dah po cửa hàng Khan ao Cam Islam Abul Aziz & Saedah jeng daok kham ba abih preih yawa nduac pacah haong tukvak piah duah jien tame, khik bruk ngak mbang di cửa hàng. Dahlau diah, labik pablei khan ao di sa-ai daok di Darak Bến Thành, Quận 1, yaok thun sa-ai duah jien tame jaik tỷ đồng. Sa-ai Sa -Y- Dah jeng hu ba bruk ngak ka 10 adei sa-ai kumei, yaok urang yaok bilan hu 5 trieu. Tukvak jiak ini, kan kandah kayua jit Covid-19 trak damak, takik hu urang kakei blei pandap yau nan ye jien mek tame di sa-ai jeng trun tui. Sa-ai Sa-Y-Dah brei bayar veik labik pah, ba pandap mai sang di quận Phú Nhuận piah pablei online. Bruk pablei pandap online yaom lac oh trak hagit min abih rilo tukvak oh lac harei atau melam. Sa-ai megru thaot brei mekre meta, vak panuac habar ka nyu pachreih urang blei. Sa-ai duah thau, ka dom khan ao hu rilo urang takre, piah tacei brei ka urang blei… Sa-ai Sa-Y-Dah brei thau, yaom lac jien mek tame meng bruk pablei khan ao online oh hu rilo min ngan saong sa-ai, duah hu nde halei uan nde nan.

Jeng yau sa-ai Sa-Y-Dah, sa-ai Sa-Roh po Nhà hàng Halal 641, Nguyễn Trãi, Phường 11, Quận 5, Ban raya Hồ Chí Minh piah duah jien tame, dom harei tapa, langiu di bruk pablei pandap mbang ka urang mbang di labik, sa-ai daok pablei ba nao tal sang ka urang. Sa-ai Sa-Roh khan lac, piah patak pataom jien pah urang ba pandap tuk hu urang iew phone mai blei, sa-ai eng drei ba pandap tal sang ka urang.

Yaom lac bruk glaih glar piah pabak veik sa thun kan kandah kayua jit praong, min ngan saong dom urang ngak mbang pah gah langiu, po cửa hàng khan ao, po nhà hàng pandap mbang  lac urang Cam di Ban raya HCM ngak mbang dalam dom harei jaik tal Tet oh huac, urang jia lac thun 2022 dom kan kandah, trak damah samar tapa nao./.

Urang lang: Ai Nghiem – 16/2/2022