Yaom lac hu labaih pluh công taneh saong lac menuac tari taring, oh huac kan kandah glaih glar, min dahlau daih, sang ong Lâm Văn Năm (daok di xã Lương Hòa A, huyện Châu Thành) jeng kurang anak, kurang likuk, kayua jien mek tame di sang ong lac meng ngak padai saong ngak mbang pah. Thun 2019, tuk palei hu bruk salih phun pala, ong Năm khang hatai salih 01 ha taneh ngak padai tapa pala phun kruac bhung kanduh hijao. Thun blaoh, yaom lac bein kruac bhung hu jaik 80% phun ndam baoh, min sang ong mek jien tame hu jaik 80 triệu đồng hadei di tuk kaoh nao dom jien sahui.

Ong Lâm Văn Năm khan lac, dahlau daih bhap bini daok pak ini thei jeng kan kandah. Hadei ini xã hu jalan ngak saong pachreih ba bhap bini salih phun pala di mangaok taneh padai takik kein laba, abih di nyu lac salih tapa phun hu pasiu, daong pato, pasram ilamu kỹ thuật, urang ngak nong khang hatai salih saong mek jien tame hu glaong jang meng 3 tal 4 mbang duk haong phun padai.“Dahlau daih ngak padai thun halei jeng khat nan ye salih tapa pala kruac bhung. Pala kruac bhung mboh hu jang ngak padai saong takik glaih jang ngak padai, yaok bilan hu menuac mai blei tal bein. Yaom kaom jeng tani tanat duk haong baoh kayau karei, pluh dom rabau, dua pluh rabau sa kg. Daok tuk tết ye pablei hu yaom klau pluh, labiah klau pluh rabau, nan ye jien mek tame jeng hu rilo jang”.

Dalam bruk salih phun pala brei jien mek tame glaong, njauk ndom tal bruk pambuak gauk pala njam patam baoh kraoh ilamu glaong di xã Lương Hòa A. Sa-ai Huỳnh Sa Rây, bangsa Khmer, lac urang dalam kapul pambuak gauk pala njam patam baoh kraoh ilamu glaong brei thau, thun 2020 sa-ai tame kapul pambuak gauk pala njam patam baoh kraoh saong hu Kapul urang ngak nong tỉnh daong brei mesraiy 100 triệu đồng ngak sang halăm pacang piah pala dưa lưới. Dalam 3 thun tapa, dưa lưới yaom meng 40.000 đồng/kg tagok, 1.000m2 sang halăm, yaok vụ laba hu meng 40 tal 60 triệu đồng. Sa thun pala hu meng 3-4 vụ, ngan saong taneh praong 1.200m2 sa-ai Sa Rây mek jien tame hu jaik 200 triệu đồng, rilo jang yaok pluh mbang duk haong ngak padai. Min dưa lưới brei hu ilamu công nghệ glaong, nan ye phun jien buh tame jeng glaong jang duk haong pala yau dahlau daih. “Urak ini kapul pambuak gauk ngak jeng hu chứng nhận 3 patuk, tui nan hu pambuak bruk pablei ka urang blei salih langiu tỉnh. Urang blei blaoh ba nao pablei veik ka dom siêu thị. Anak tal jeng caong khin gah angaok daong ba pandap tagok sàn pablei salih điện tử, piah ka pandap hu rilo menuac thau tal jang. Daok kapul pambuak gauk ngak, jeng daok cakrok sang halăm saong khik kajap angan pandap OCOP 3 patuk”.

Lương Hòa A lac xã hu urang Khmer meblah labaih 72% menuac sia dalam xã, mikva rilo meng ngak nong. Meng tuk hu bruk salih phun pala di mangaok taneh ngak padai takik kein laba, Lương Hòa A hu pilih ruah janih phun pala hu năng suất, lagaih haong taneh riya saong hu prein pacang ia mbak piah ba tame pala, peih pato, pasram ilamu pala yaok janih phun pala ka yaok baoh sang piah patagok kein laba. Pablak tame dom danak dak piah peih dom bruk ngak iek, daong ka mikva bac megru, ngak tui. Tal urak ini, dalam xã salih hu labaih 360ha, rilo meng lac phun hu pasiu. Urak ini jien mek tame rilo jang dom mbang duk haong ngak padai. Ong Nguyễn Đức Anh, Phaok akaok UB bhap bini xã Lương Hòa A, huyện Châu Thành brei thau:“Piah ka bruk pala, ngak di mikva dalam xã hu kein laba, salih bharau raidiuk, yaok thun xã hu pachreih mikva salih janih phun pala, ngak dom bruk ba mai kein laba glaong. Anak tal, piah khik kajap bruk palagaih haong biến đổi khí hậu, xã daok jak ba bhap bini pala dưa lưới, pala kruac aik oh hu asar. Ini lac bruk ngak biak lagaih, ba mai kein laba glaong”.

Meng dom bruk ngak hu, gam haong bruk njauk hatai, pachreih tui di bhap bini dalam bruk padang ngak palei pala bahrau, jia lac raidiuk di rahra Lương Hòa A daok tagok glaong, rik daong tame bruk cakrok patagok kinh tế, xã hội di Trà Vinh – lac tỉnh daok kham merat ngak brei salah bruk lac Tỉnh palei pala bahrau dahlau thun 2025./.