Hè - Thu lac sa dalam dua bilan pala praong dalam thun, yaom lac padai urak ini yaom tagok glaong min kayua pandiak bhang dui atah, dom puk palei di huyện Ninh Phước brei salih tukvak trun pajaih. Labaih 200ha taneh padai Đông - Xuân di mblang hamu Hậu Sanh yuak hu salah blaoh 2 adit ini mai, mikva daok  la-ua hamu min taong abih mbaok taneh ini jeng hu pacang veik, brei padeih pala drak. Dom sang raong glang daok pataom mek dom pandap klaak meng kaya nong piah ngak pandap mbang ka tapon athur raong. Piah ka tapon lamo 20 drei hu ginup pandap mbang dalam bilan pandiak, yaok harei, amuk Phú Thị Sum nao meng Hậu Sanh mai dom mblang hamu bahrau yuak di palei La Chữ, Hữu Đức.

“Lamo di sang hu 20 drei. Kayua langik pandiak nan ye dah page drei ba lamo nao mbang, tal jala pandiak ba nyu mai sang blaoh nao kaoh hareik ka lamo mbang….”.

 Tukvak ini langik pandiak dui atah, oh hu hajan nan ye ia dalam dom binek kavei di Ninh Thuận biar jang yaok thun. Dom taneh ngak sa vụ pandar ia pruh meng binek Tân Giang saong binek Bầu Zôn brei padeih pala bilan Hè - Thu thun 2024 saong brei trun pajaih veik tuk hu ginup ia. Sa-ai Thiên Quang Tuệ, iek gah ngak nong xã Phước Hữu, huyện Ninh Phước brei thau:

“Xã Phước Hữu bilan hè thu ini njauk pandiak bhang, dom binek ia daok takik.. UBND xã Phước Hữu hu tabiak panuac khan kakei mikva…”.

Dalam pandiak khang di bilan bhang, jaik 3ha taneh pala tamekai di sang sa-ai Nguyễn Thanh Trực daok di palei La Chữ, xã Phước Hữu daok kaoh mek baoh. Sa-ai Trực khan lac, pala tamekai abih takik ia pruh, tukvak hu baoh pablei jeng samar jang ngak padai. Urak ini tamekai pablei di puh yaom 8.000 đồng sa kg. Dalam bilan pala ini, sa-ai Trực laba hu 180 triệu đồng meng pala tamekai.

 “Daok dalam bilan pandiak bhang, ia kurang. Padai oh ginup ia min tamekai sang dahlak pala baoh halei jeng trak labaih 3kg. Nyu takik ia min baoh praong. Ngak padai ye kurang ia. Daok pala tamekai 60 harei ye baoh pablei hu. Nyu takik harei jang ngak padai, halak halin jeng mbuan pacang jang phun padai”.

Ong Đàng Năng Tom, Phaok akaok UBND huyện Ninh Phước brei thau: piah pacang caga pandiak bhang, UBND huyện hu tacei pato dom puk palei dalam bilan Hè - Thu brei rami ramik veik bruk pala ngak ka nyu lagaih haong halau ia, dom taneh pala mbuan kurang ia pruh ka abih vụ, brei ramik veik tukvak trun pajaih:

“Thun ini, tui kuhria mboh dahlau, pandiak bhang meda khang jang. Nan ye piah palagaih ka bruk pala ngak, huyện Ninh Phước hu tacei pato dom xã khan brei mikva thau dom bhum oh brei pala ngak.”

Meng hatai kham merat oh caik brei kurang ia pandar, oh caik brei eik lapa, oh luai brei tamuh jit ruak saong pataom tame ngak khang bruk salih janih phun pala abih takik ia, khik caga tapon athur raong, huyện Ninh Phước daok pataom tame bruk pacang caga haong pandiak bhang piah khik tani tanat raidiuk ka bhap bini. Min bruk praong urak ini, lac rahra brei ngak njauk tui “lịch thời vụ”, bhian tui iek tui pang bruk langik tasik, oh trun pajaih langiu bruk ba tabiak piah plaih khat lahik kayua pandiak bhang, tua riya./.