Sang ong Điểu Út – urang bangsa S’Tiêng daok di palei Mười Mẫu xã bhum tapen negar Phước Thiện, huyện Bù Đốp mai daok di palei Mười Mẫu hu jaik pluh thun, hu karja brei taneh, daong padang ngak sang, biak bui sambai. Thun 2017, sang ong haong mikva dalam palei ini hu bruk bui sambai praong, tuk talei điện negar hu dui mai tal palei, bruk bo mikva cang maong meng lavik mai urak ini hu jeng biak.

Tiểu khu 67 daok dalam palei Mười Mẫu, xã Phước Thiện, huyện Bù Đốp hu 200 saong haong yaok ratuh menuac, 95% menuac sia lac urang bangsa takik, dalam nan rilo meng lac urang S’tiêng. Dahlau daih labik ini lac labik eik lipa, kan kathaot kayua ilamu rahra daok biar, jalan mbak nao mai kan kandah, dom sang danaok khang kajap saong hu điện pandar biak takik, uranaih oh hu nao bac. Min meng di tuk hu điện, raidiuk di mikva hu salih karei biak rilo. Mikva hu salih jamriak tapa bơm điện, trun biak rilo jien buh tame ka bruk pruh ia ka phun pala. Oh lac hu điện piah truac hadah, dom sang daok hu blei tivi, tu la-an, kadik máy, gaok lisei điện..., meng nan, raidiuk di bhap bini hu glaong tagok mboh di anak meta. Sa-ai Điểu Thâm daok di tiểu khu 67 brei thau, meng tuk hu điện, rilo sang tari taring ngak mbang jang, raidiuk hu salih bahrau biak samar: “Karja hu ngak yau nan, blaoh daok kuhria duah brei bruk hit ngak mbang piah pambuak sang atah tabiak, pasiam veik sang danaok, blei ti vi, tu la-an, mac papah khan ao ye rilo sang hu blei bloh. Urak ini cakrok patagok, hu pandap panda ni daih”.

Meng pasak xã Phước Thiện nao tal Tiểu khu 67 lac jalan nhựa tapak-samu, tapon pabe, limo daok mameh hareik mala halui phun pa-ok blait, phun cao su pala bahrau, talei điện negar hu bak abih, ia mbaok di rahra pak ini hadah tagok bruk bui sambai, chreih chrai.

Sa-ai Điểu Phúc, sa urang daok di tiểu khu 67 khan lac: “diuk pasang dahlak daok pak ini hu 11 thun paje, dahlau daih rambah rambup lo, sang hu 4 urang min kham ngak lo jeng tok ginup mbang. Yau nan min, hu Đảng, Karja sangka, dui talei điện mai, urang halei oh hu lamo ye hu brei lamo, oh hu pabe ye brei pabe, oh hu sang ye padang brei sang, urak ini thei jeng kham merat ngak mbang, mikva hu trei tian, biak jia tame Đảng, Karja”.

Taha palei Điểu C’re, sa dalam dom urang hu angan je di palei khan lac, hu brei taneh pala drak tui Danak dak 134 meng thun 2005, tal thun 2017 Tiểu khu 67 hu karja buh jien dui talei điện, ngak jalan, padang sang bac, bilai iek ruak. Dom thun jaik di ini, meng Danak dak bruk ngak negar ka padang ngak palei pala bahrau saong patrun kathaot, mikva pak ini daok hu karja brei sang saong pandap ngak, pandap pala drak. Meng hatai kham merat yam tagok, mikva khang hatai ba ilamu kỹ thuật bahrau tame ngak mbang, pala drak. Tal urak ini, dalam palei Mười Mẫu daok 5 baoh sang kathaot min, trun hu labaih 90% duk haong dom harei Tiểu khu 67 bahrau yam tame bruk ngak. Bhap bini daok pak ini uan tabuan lo.

Meng “4 oh” (lac: oh hu điện, oh hu jalan, oh hu sang bac, oh hu ia pandar) di Tiểu khu 67 dahlau daih, urak ini hu yam tagok jeng “6 hu” (lac: hu điện, hu jalan, hu sang bac, hu bilai iek ruak, hu taneh riya saong hu ia pandar). Hu raidiuk dak harei dak salih bahrau yau nan, lac meng hu bruk sangka di Đảng, Karja, di urang pan akaok karja puk palei saong bruk kham merat yam tagok tabiak truh kan kathaot di bol bhap rahra”./.