Meng bruk pandar ilamu công nghệ glaong tame ngak nong, amuk Ka Hằng lac sa dalam dom urang nong di palei Đarahoa, xã Hiệp An, huyện Đức Trọng, tỉnh Lâm Đồng jeng mek hu jien tame glaong jang thun blaoh. Amuk brei thau, darak pasar njam, bingu dalam thun blaoh pablei hu takik, yaom kaom oh grap tanat min cà phê biak hu yaom. Langiu di nan, taong abih 3 sào njam, bingu saong 2 ha cà phê jeng hu gam năng suất saong chất lượng, nan ye sang duah hu jaik 500 triệu đồng.“Jaik abih mikva thau bac megru saong pandar ilamu kỹ thuật tame pala drak. Mikva hu rilo jalan mek jien tame meng phun cà phê saong njam patam. Meng nan dom baoh sang hu padang ngak sang bahrau, blei mac moc piah duh ka bruk pala drak. Mikva jeng hu alin taneh ngak jalan bê tông, jalan nhựa, meng nan mbaok meta palei pala bahrau dak harei dak cak rok patagok saong pamaong tal padang ngak xã palei pala bahrau paglaong.

Jeng dreh yau nan, meng salih jalan saneng pala drak, khang hatai salih janih phun pala ka nyu laghaih, gam haong hatai saneng eng drei yam tagok di bhap bani, urang bangsa takik K’ho di Đạ K’Nàng, huyện Đam Rông hu cak rok patagok biak rilo dut haong dahlau. Tui ong K’Bát, daok di palei Păng Dung, xã Đạ K’Nàng, meng samar drah salih sa binah mblang taneh cà phê taha, brei năng suất biar tapa pala dâu raong tằm saong rilo phun mbang baoh bo kinh tế di baoh sang ong hu salih bahrau mboh di anak mata. Langiu di bruk pala dâu raong tằm, sang ong saong bhap bani dalam bhum daok hu pala pablak phun bơ, durian, patei laba, nan ye bilan halei jeng hu jien mek tame. Rai diuk mbang angui di puk palei jeng tui nan oh padeih cak rok patagok. Ong K’Bát, brei thau:“Dahlau diah mikva pala drak biak kan kandah. Daok urak ini hu bruk sangka di Đảng, Karja ka bruk ngak cà phê, pala dâu raong tằm, jalan mbak nao mai mbuan laghaih, pandap panda hu pablei tabiak rilo, nan ye rai diuk di mikva dalam palei hu kaya meda jang dut haong dahlau. Urak ini, mikva chreih chai pakacah gauk ngak mbang, thau bac megru ilamu kỹ thuật meng dom palei karei, hu urang khang hatai mek pagam phun cà phê, pala njam patam, pala chanh dây... meng nan rai diuk di mikva mboh kaya meda jang dahlau biak rilo”.

Tui panuac khan di ong K’Châu, daok di palei 3, xã Lộc Nam, huyện Bảo Lâm, tỉnh Lâm Đồng, meng salih jalan saneng, khang hatai pandar ilamu kỹ thuật tame pala drak, tari tareng ngak mbang saong dak padang rai diuk bahrau, bruk eik lipa kathaot rambah samar hu jhul kadhul likuk tabiak truh yaok baoh sang, yaok baoh ghing apui. Ong K’Châu, khan lac:“Rai diuk di mikva hu salih bahrau biak rilo. Dahlau diah radaih juak jeng oh hu piah nao, urak ini sang halei jeng hu radaih patuh, hu sang blei hu radaih ô tô lime, nam, tijuh rituh triệu. Blaoh sang krem la-a taik tahak jeng hu salih meng sang padang ngak khang kajap, gaok mai hu dom baoh sang padang sang lầu, sang daok pakat 3. Bruk salih bahrau ini tok mboh dalam dom thun gilac veik ini. Jeng mai meng bruk mikva thau mong iek phun pala, anek athur raong, abih di nyu lac salih tapa pala dom janih phun hu yaom yau bơ, durian... Rai diuk di mikva labik ini hu ginup meda, grap tanat saong cak rok patagok biak rilo”.

Rai diuk cak rok, an sinh xã hội hu grap tanat, bruk an ninh chính trị saong trật tự siam mekre dalam bol bhap rah ra di dom bhum atah bayah, bhum bangsa takik di tỉnh Lâm Đồng tuk halei jeng hu khik kajap. Mikva patagok hu siam bruk gul pataom bangsa, ba gauk padang ngak palei pala bahrau, puk palei siam mekre, kaya meda, văn minh./.