Kol dahlak hulin hu mbang nao rivang Sang bac THCS Thuận Hòa, huyen Châu Thành, tinh Soc Trang, anak meta mboh hu mblang taneh praong jaik 6.000m2 gam saong paga kajap vil taom dan, mblang sang bac hijao-hacih sa-at- gheih ghang - salamat, sang bac hu padang ngak laneing lanoi.

Sang bac yaom lac bahrau padang jaik 5 thun ini, min dom jak jeng dalam bruk pato saong bac tuk halei jeng hu yaom hadah. Dalam thun bac 2023-2024, sang bac THCS Thuận Hòa hu 2 adei anek saih mek hu yaom ka Dua di mbang pakacah bac naih joi pakat tinh. Daok pato bac dalam thun bac bahrau blaoh di sang bac mek hu labaih 99% anek saih nao bac. Sang bac ini jeng hu labaih 70% anek kamuan urang bangsa Khmer tui bac saong bahrau hu mbaoh tangin ka sang bac mek hu tanut asal pakat negar. Adei angan Kim Huỳnh Ái Như, anek saih di sang bac THCS Thuận Hòa, brei thau:

"Hu tame bac di ini adei mboh hu ginup pandap kaya angui piah duh brei ka bruk pato saong bac, sang bac praong laneing lanoi, duh brei siam lagaih ka khol adei bac magru, cei gru nai gru jeng biak sangka, tuk halei jeng pachreih khol adei kham merat bac magru siam, daong khol adei truh tapa kan kandah dalam bruk bac magru."

Gam hu urang pan akaok caik hatai, bih drei pato tacei di karja tinh, bruk kham merat di pakat Ndang, karja saong rahra dalam huyen, dom gah kinh te – xa hoi di Châu Thành tal ini mek hu jak jeng biak siampurna, raidiuk di mikva hu salih oh padeih tagok glaong, raidiuk daok dang mbang ngui dak harei dak siam makre. Ong Trần Kim Tâm, daok di puk Giồng Chùa A, xa An Hiệp, huyen Châu Thành bui sambai anak bruk salih bahrau di palei:

“Urak ini hu kein lagaih paje, dahlak hulin mboh hu cakrok patagok, jalan mbak urak ini hu ngak mblaoh drei nao ngak atau nao hamu apuh jeng biak mbuan lagaih. Rah tui tapen jalan urak ini mikva padang sang danaok praong laneing lanoi jaik si abih paje.”

Châu Thành ieu lac sa baoh huyen hu rilo urang bangsa takik daok, urang bangsa Khmer di ini hu jaik 48%, urang bangsa Viet hu 49% saong bangsa Hoa hu 3%. Hadei di labaih 13 thun padang palei pala bahrau, urak ini, raidiuk di rahra dalam nan hu urang bangsa Khmer oh padeih salih bahrau, abih di nyu dalam nan, mboh dom baoh sang kathaot haong jaik kathaot biar trun  daok 3%. Ong Nguyễn Văn Mỹ, Phaok Akaok UB Bhap bini huyen Châu Thành, brei thau lac veik:

“Huyen hu pataom bruk pachreih jak ba dom gah rik daong, dahlau abih hu dom danak dak, dalam nan, hu danak dak brei ka palei ngak nong bahrau, danak dak ka urang bangsa takik, tapa 2 danak dak ini hu daong padang ha tang palei pala, daong ka mikva hu pajaih pala, ndap nda kaya ngak mbang, ngak dom bruk ngak ba tabiak ndap nda, blaoh daong ka mikva ka dom sarak karja brei patrun kathaot, daong mikva ka gah bao hiem y te, bac megru, sarak ini hu paglaong siam lagaih hu rik daong biak praong ka mikva kham merat uak drei tagok truh kathaot. Langiu di nan ye mikva hu hatai ta-eng uak drei patagok kham merat truh kathaot jeng lac sa dalam dom bruk hadah di huyen.”

Urak ini, jalan mbak, kraong ribaong, sang bac magru hu dak padang salah blaoh, dom janih ilamo hu sangka buh jien tame piah pabak hatai caong khin bui sambai, pasram pahat padhih ka rahra, bruk iek pasiam mekre hu khik kajap, mikva huyen Châu Thành raok thun barau Ula Naih bak 2025 dalam bruk bui sambai, haniem phol; mikva jeng caong lac, mbaok meta palei gheih ghang laneing lanoi, hacih sa-at, raidiuk daok dang tuk halei jeng oh padeih hu patagok./.