Ong Trần Thanh Bình (hu 50 thun Ndang), di palei Thanh Thịnh, xa Hồng Phong, huyen Bắc Bình, ieu lac urang hu mbaok tame mesuh metak daok dalam labik Khu Lê Hồng Phong khan lac: Akaok bilan 4/1975 Labik katmang Lê Hồng Phong oh daok danei mbom yava siu. Mikva bhum taneh ini harei melam tui iek khau tin jayah bui sambai hu khan ba mai.

Sap ndom puac chreih chrai di mikva Khu Lê gam haong rahra gah Meraong negar: Hu peih paha biak paje, bebat mai biak paje. Menuac urang pan kaja tangin gauk, kuan gauk caok hia uan ka jayah ini. Gam haong hatai bui sambai peih paha lac bruk ba tangin padang raidiuk di palei pala klak hadei mesuh metak.

Ong Bình khan: Mikva labik ini tuk nan tuk halei jeng suah sah, duh hatai anak bruk kurang rilo bruk meng pandap mbang tal gom jalan, sang bac, kadai…

" Mikva di labik ini meng dalam glai nao tabiak, urang lakei dahlak hulin jeng hu dua blah khan ao, sa blah nilon piah ngak sang, sa blah nilon thrah piah gam thrah pacang hajan gam piah ngak tanang padang ia, bahrau tabiak tok hu yau nan min. Meng dua plak tangin oh hu hagait, blaoh jeng ta-eng cakak gak piah pacang labik daok, ramik apuh, mek prein ngak di drei tabiak ngak piah raong drei. Meng hatai gul pataom di labik sang gak taik tahak, dak harei dak patagok."

Hadei peih paha, bhum taneh Khu Lê ini lac xa Hồng Phong saong xa Hòa Thắng, huyen Bắc Bình hu dom yam patagok khang.

Bilan 4/2012, danak dak pabak ia Khu Lê hu peih ngak, haong taong abih jien jaik 400 ty dong, langyah ka bruk kurang ia pandar. Danak dak ini daok duh ka bruk pala drak, patagok bruk jirah rivang.

Amuk Mãn Thị Thu Hà, Phaok Akaok UB Bhap bini xa Hòa Thắng, huyen Bắc Bình, brei thau, meng sa bhum taneh pandiak, thu lagu, jaik 10 thun tapa xa hu rilo labik pala drak hu rilo janih baoh karaoh ba mai yaom kaom kinh te glaong yau: thanh long, nho, tamun ia: "Dahlau daih dom labik nan, baoh sang rahra pala habei, ritak, tamun, min bruk pala drak tui jalan meng kal ye yuak kuak biar, oh siam lagaih. Meng tuk hu dom kapul, urang ta-eng ngak tabiak dom jalan farm pala tamun ia jeng yau pala dom phun yau: amraik, pluai…brei bruk ngak ka dom urang ngak bruk di bhu palei."

Khu Lê urak ini hu ba mai mbaok meta biak bahrau haong ket cau ha tang hu buh jien tame padang praong laneing, jien mek tame kuhria rah tapa labaih 50 trieu dong. Dom kein lagaih karei di bhum taneh ini jeng dak harei hu ngak siam. Pandiak, angin jeng sa kein lagaih piah patagok bruk ngak kong,abih di nyu nan lac nang luong tai tao, yulit karei, dui pachreih rilo tuai damuai.

Ong Bùi Tấn Vinh, Phaok Bi thu thuong truc Huyen uy Bắc Bình brei thau, bhum palei caong khin hu tinh patui veik sangka salah blaoh he thong quy hoach, dalam nan hu quy hoach ka patagok yulit: " Rahra Hòa Thắng, Hồng Phong jeng daok patui veik cang raok bruk sangka di ndang saong karja. Saong rahra Hòa Thắng, Hồng Phong jeng patui veik patagok bruk dang tagok meruh metak daong taneh ia di drei dalam mbang masuh metak mek hu bebat ka taneh ia, yasa baoh negar, daok patui veik hu hatai caong uak drei tagok ngak meda".

50 thun tapa, rah tabiak rilo bruk bui sambai bruk suh sah di bhum taneh Khu Lê. Dom tukvak nan jeng hu ginup piah ka dom rairah patui veik bruk ngak jeng thaik thaot di bhum taneh anh hùng, patui veik patagok pok yam tal harei hadei siam gheih jang./.