Cty cổ phần pabak ia Sóc Trăng urak ini daok khik ramik saong peih ngak 24 sang mac/ bilai pabak ia ngan haong prein hu brei adat lac 97.770 m3 sa harei melam. Min, kayua langik pandiak bhang saong njom ia mbak, Sóc Trăng urak ini jeng daok gaok kan kandah dalam bruk pabak ia pandar. Ong Đặng Văn Ngọ, Taong Yam ndok Cty cổ phần pabak ia Sóc Trăng brei thau, urak ini tinh daok hu tani tanat kayua hu ia njar biak siam. Min, suai lavik jeng meda gaok dom kan kandah kan thau dahlau. Kayua yau nan ye, Cty hu ba tabiak panuac ieu buh jien tabiak padang ngak sang mac ia haong prein khang lac 200.000 m3 sa harei melam di xã Hồ Đắc Kiện, huyện Châu Thành di mblang taneh praong 110 ha. Ong Đặng Văn Ngọ brei thau:“Dahlak hu thau lac kreh thun ini meda hu dom tatua pambuak meng Tiền Giang, Bến Tre saong Trà Vinh piah ngak vành đai tapen tasik, hadei di nan meda nao tal Cà Mau tapa Kiên Giang. Ye urak ini, pambuak haong ngak tatua ye drei ngak binek gam haong ngak tatua. Mayah peih ngak hu, meda khik ia hu dalam bilan hajan, pandar dalam bilan thu, oh huac ka bruk ia meng gah angaok tuh mai. Mayah harei ini ia mbak mbang tame Sóc Trăng, Hậu Giang, patui veik bo tal Cần Thơ, An Giang ye nyu yau habar”.

Daok tui langyah di PGS.TS Lê Anh Tuấn – urang langyah ilamo ka Viện roh duah biến đổi khí hậu, Sang bac ĐH Cần Thơ ye meda lac tui tukvak meng thun 2016, 2020 saong ini lac 2024, yaok 4 thun sa mbang meda hu mbang pandiak bhang, njom ia mbak glaong jang kuhria rah tapa di rilo thun. Min, dom thun jaik ini, njom ia mbak dak harei dak khang jang. Piah pacang caga haong njom ia mbak, rahra jeng thau jalan salih bruk ngak mbang, pala drak, yau ngak padai gam raong hadang, piah lagaih haong langik tasik. Min, bruk rilo urang ilamo haduh hatai lac langiu di bruk kurang ia taba, ye bruk glut jaleih taneh pak bhum ĐBSCL dalam bilan thu jeng brei mboh bruk trak damak. Tapa rilo mbang nao pasang iek di dom bhum glut jaleih, ong Tuấn mboh makna lac kayua padang ngak dom danak dak pacang ia mbak ka oh lagaih: “Kol dahlak mboh lac dom danak dak pacang hu ia mbak, min damen lac ia taba pabak tame oh ginup, nan ye taneh mbuan gaok kan kandah saong glut jaleih. Gaok tuk kol drei caong khin pacang ia mbak, khik hu ia taba, min ba tal cuang kandah karei, saong ngak kan kandah oh sit, taneh glut jaleih oh daok jalan halei piah pok tagok hu. Nan ye njauk pilih ruah dom jalan ngak piah oh palai, damen.”

Tui ong Trần Anh Tuấn - Phó akaok kapul pabak ia Việt Nam,  Mintri padang ngak, Mintri Kế hoạch saong Đầu tư caong peih bruk padang ngak sang mac pabak ia ka 13 tinh, ban di bhum ĐBSCL, khik kajap bruk pabak ia ka đô thị, labik ngak kong saong 30% rahra bhum tapen palei pala, tapen tasik, meda hu pandar ia ini. Min, ini lac kan kandah njauk kuhria tal, oh caik rahtabiak sit sot di yaok labik, oh kuac rok ia njar hu tra. Tui ong Tuấn, meng yaok piluh bingun dalam bhum, ia mbak tui nan njom tame ia njar, nan ye ia njar oh daok lac pandap khik piah. Kayua yau nan ye, ia mbaok hu kuhria ka abih rahra dalam labik đô thị, labik ngak kong, ia pandar saong ia ngak mbang, pala drak. Ong Trần Anh Tuấn brei thau:“Kol drei njauk sahaneng tal bruk pabak ia tamo ka dom sang mac. Urak ini, dom sang mac tok kurang ia min. Dom sang mac jeng daok ngak bruk yau yaok harei. Urak ini kuhria piah pabak ia oh njauk njom mbak. Kayua ia mbaok njom mbak, nan ye caong hu buh jien tame  ngak jalan nding ba ia meng gah angaok kraong Tiền, kraong Hậu ba mai piah ka dom sang mac urak ini langyah pabak ka rahra.”

Pandiak bhang, njom ia mbak saong glut jaleih daok rahtabiak di bhum ĐBSCL brei mboh lac, langiu di dom bruk pambuak tal langik tasik ye manuac jeng rik tame oh sit. Bruk khik ramik saong peih ngak kaya ia mala taneh ka oh lagaih, ba tal bruk glut jaleih di bhum taneran jang yau bruk kuac mek cuah di dalam kraong ba tal bruk ngak bier trun mbaok mala kraong, lagaih ka ia mbak njom tame dalam mblang hamu. Bruk salih jalan pandar taneh oh lagaih jeng lac sa dalam dom makna ba tal bruk ba ia mbak tame dalam mblang hamu. Kayua yau nan ye, bruk padang ngak saong ngak pasiam dom danak dak khik ia taba jang yau dom danak dak pabak ia di dom bhum lac bruk bo drei njauk buh jien tame ngak saong sangka caik hatai jang./.