Dom  tỉnh daok jhul khang bruk klauk vắc xin mbang 3, mbang 4 ka bhap bini

Di dom tỉnh dalam bhum taneran kraong CL dalam dom adit bloh jeng hu rilo meuac njauk ruak COVID - 19 dalam bhap bini. Anak bruk jit ruak mboh yau daok njaom mbak samar, mbuan tamuh khang veik, dom tỉnh daok jhul samar dom jalan ngak piah pacang caga.

Bác sỹ Văn Công Minh, Yam ndok Sở Y tế tỉnh Vĩnh Long brei thau, gah y tế tỉnh jeng hu jalan pasang iek bruk jit ruak dalam bhap bini, pok panuac tagok mBan tacei jalan pacang caga jit tỉnh pasang iek veik puk palei, jamriak pandap panda, pabak ginup tuk hu bruk rah tabiak. Langiu di nan, pok panuac brei pasang iek veik taong abih menuac urang dalam nyaom, umo thun halei piah klauk vắc xin hu ginup. Bác sỹ Văn Công Minh kakei lac, kayua biến chủng phụ BA.4, BA.5 di Omicron hu prein njaom mbak samar jang nan ye bhap bini jhui iek lap bo brei klauk vắc xin ginup mbang, njauk harei, cuk pataih pacang mbaok tuk nao tal labik hu rilo menuac saong bhian rao tangin meng ia jru: “Mbang 3 haong mbang 4 tỉnh Vĩnh Long klauk hu rilo, min jeng daok rilo menuac oh ka klauk. Nan ye brei hu jalan ngak, pok panuac ka mban tacei pato piah tacei jalan ka dom gah, dom pakat pasang iek, yaok pataom dom menuac oh ka klauk di dom jabat, mban ngành, dom sang bac, doanh nghiệp daok veik piah padang angan piah tapa nan gah y tế hu jalan piah klauk dalam bilan 8 ini ka nyu ginup”.

Jalan ngak siam lagaih di abih bo tỉnh Bến Tre daok ngak lac pathau khan, jak ba, palagaih ka bhap bini klauk vaccine hu ginup dom mbang klauk. Tui Sở y tế Bến Tre, tal urak ini, bruk klauk mbang 3 ka urang umo mangaok 18 thun hu labaih 95% menuac sia, mbang 4 hu labaih 65%; uranaih umo meng 5 tal 12 thun hu klauk mbang 1 lac mangaok 95%, mbang 2 lac jaik 74%. Ong Võ Văn Nhân, urang daok di xã An Khánh, huyện Châu Thành, tỉnh Bến Tre hadei di klauk mbang 4, khan lac: “Dahlak klauk 4 mbang ye, mboh prein yava siam mekre oh hu hagait rah tabiak. Dahlak hu da-a tagok klauk, hu klauk brei siam mekre. Taong abih dom xã dalam huyện Châu Thành jeng hu ngak yau nan. Bhap bini biak sanang hatai. Daok hu takik menuac oh ka khin klauk, kayua sahneng oh tal. Daok dahlak saneng, karja brei adat, mintri y tế taong yaom bloh, drei huac hagait bo oh klauk”.

Dom harei jaik di ini, tỉnh Hậu Giang jeng jhul khang bruk klauk vaccin pacang Covid-19 ka bhap bini. Urak ini, bhap bini nao klauk vaccine mbang 3, mbang 4 di tỉnh ini tagok biak rilo. Urang pan akaok tỉnh Hậu Giang hu tacei pato Sở Y tế pambuak bruk haong dom gah chức năng, dom puk palei pataom tame pathau khan, paglaong hatai sahneng di bhap bini dalam bruk klauk vaccine pacang COVID - 19. Kuhria tal harei ini, dalam tỉnh hu klauk labaih 2.075.000 mbang vaccine pacang COVID - 19, samu labaih 99% dom jru hu parabha brei. Urak ini uraniah umo meng 12 tal mala 18 thun klauk mbang 3 hu jaik 72%; dom urang umo meng 18 thun tagok hu klauk mbang 3 lac labaih 72% saong klauk mbang 4 hu jaik meteh. Bác sĩ chuyên khoa 2 Lê Công Trứ, Phaok Yam ndok Pasak Y tế ban sit Long Mỹ brei thau: “Bhap bini drei klauk hu 80-90%, lac ngak siam bruk klauk jru pacang caga ruak, min jeng daok hu urang oh ka thau cambaih kein laba di bruk klauk vaccine. Pasak Y tế ban sit Long Mỹ pataom tame jhul khang pathau khan piah bhap bini thau hu kein laba di vaccine, khik siam mekre prein yava ka bhap bini”.

Urak ini jit ruak COVID - 19 mboh yau daok tamuh veik di rilo tỉnh dalam bhum taneran kraong CL, rilo meng lac dom biến chủng phụ BA.4, BA.5 di Omicron. Jaik abih dom urang ruak jeng hu triệu chứng hanjul hu brei daok karei taong ruak di sang. Dom tỉnh urak ini daok jhul khang bruk klauk vắc xin pacang caga ka taong abih bhap bini piah pacang caga jit tamuh veik dalam tukvak anak tal./.

Urang lang: M. Phuong - 23/08