Tui Viện Khoa hoc thủy lợi gah Meraong, urak ini dom binek thủy điện gah angaok kraong Mê Kông daok takik brei tathuak ia piah pataom ia peih mac điện, ba tal bruk ia mbak njom tame meda hu aval di Bhum taneran kraong Cuu Long dalam bilan thu thun 2021-2022. Meng di bilan 2 thun 2022, di dom bhum kreh yau ye ban Cần Thơ, dom tỉnh Tiền Giang, Long An, Kiên Giang, Hậu Giang, Ðồng Tháp, Vĩnh Long saong bhum pacang ia mbak di Bạc Liêu, Sóc Trăng, Trà Vinh, Bến Tre), ia mbak di tanut 4‰ meda njom tame dalam 50-65km. Bhum tapen tasik  dom tỉnh Long An, Bến Tre, Trà Vinh, Sóc Trăng, Bạc Liêu, Cà Mau saong Kiên Giang meda njom ia mbak samar drah, pandiak bhang tua riya kurang ia taba meda rah tabiak di dom bhum oh ka pacang ia mbak hu abih; ia mbak njom tame dalam meng 50 tal 60km.

Tui kuhria mboh dahlau, ia mbak di Bhum taneran kraong Cuu Long rah tabiak  aval, nan ye dom tỉnh dalam bhum hu caga dom jalan ngak piah pacang pandiak bhang saong ia mbak. Di tỉnh Tiền Giang, Mban Khik iek danak dak padang bruk ngak nong saong patagok palei pala di tỉnh haong gah padang ngak, hu padang binek meng thép pacang ia mbak, khik ia taba di ribaong Nguyễn Tấn Thành (huyện Châu Thành) haong yaom jien abih labaih 10 tỷ đồng. Danak dak kuhria ngak salah di harei 25-2, rik daong khik caga ia pala drak saong ia pandar ka bhap bini 2 tỉnh Tiền Giang saong Long An. Dom tỉnh jeng daok peih bruk kuac 26 ribaong njauk haluk pataom pabak di huyện Gò Công Đông, piah pacang hu ia mbak, khik caga hu ia taba ginup pruh ka 11.650 ha phun pala di bhum.

Di tỉnh Bến Tre, tal akok bilan 2 ini, tỉnh ngak salah bruk pasiam 34 dalam abih tih 59 danak dak, pakajap veik dom labik glut jaleik, khik pacang ia ndik saong pacang ia mbak; dom danak daok veik dalm tuk peih ngak. Dom danak dak ini hu ba tame pandar hu daong ka bhap bini khik hu ia tame dom kraong ribong, mblang hamu, binek padang ia.

Daok ban Cần Thơ, mBan Khik ramik Danak dak ODA ban Cần Thơ hu pataom tame ngak dom bruk njauk ngak dahlau di Danak dak 3, hu yaom jien buh tame ngak abih tih tagok tal labaih 7.343 tỷ đồng, patagok prein palagaih di ban anak bruk biến đổi khí hậu dak harei dak khang…

Njauk uan tabuan lac thun ini, yaok pluh ribau baoh sang urang ngak nong di dom tỉnh Kiên Giang, Hậu Giang, Cà Mau, Bạc Liêu saong Sóc Trăng caga hu ia taba piah pala drak saong piah pandar, kayua pabah kraong Cái Lớn, Cái Bé hu ba tame pandar tukvak ka 1, pacang ia mbak meng tasik Tây piah khik ia taba ka sa bhum praong 384.120ha, dalam nan hu  346.241ha taneh pala drak, raong kaya ikan dalam ia. Yau ye, di Cà Mau, 120.000 ha taneh hu pabak ia taba rilo jang, dui atah tukvak pala drak. Daok di tỉnh Kiên Giang oh beik binek pacang ia mbak  khik ia taba tapen kraong Cái Bé, patak pataom hu yaok tỷ đồng…

Tui kuhria mboh dahlau tabung glong pandiak bhang ia njom mbak di Bhum taneran kraong Cuu Long dalam bilan pandiak thun 2021-2022 rah tabiak di bilan 3 saong bilan 4 anak tal. Tổng cục Thủy lợi di Mentri Ngak nong saong Patagok palei pala hu panuac kakei dom tỉnh, ban dalam bhum brei ramik bilan pala drak ka lagaih, jhul pakhang bruk trun pajaih aval bilan đông xuân 2021-2022 di dom bhum tapen tasik piah plaih khat lahik kayua njom ia mbak. Abih di nyu lac, dom tỉnh brei pandar dahlau dom pajaih padei pahe, đặc sản, asar siam, tukvak pala tal tuk yuak katut panak, dom pajaih diuk hu dalam ia mbak, taneh njom likhun…piah lagaih ba ia pruh./.

Urang lang: A.Nghiêm -21/2/2022