Hu sang danaok tani tanat ka meng ngak mbang, yau nan jaik 60 thun ngak mbang duah jien rambah tal urak ini ong Nguyễn Văn Trẹm di ban sit Cờ Đỏ, ban Cần Thơ jeng oh ka patak pataom hu ginup jien piah padang sa baoh sang kajap ka baoh sang. Bahrau ini tapa bruk taong yaom meng bruk brei oh daok baoh sang taik tahak ong Trẹm hu daong jien piah padang baoh sang. Ini lac bruk caong takre bo sa raidiuk ong jeng oh khin saneng tal: “Meng nan sang taik tahak abih mbong, thei nao pagan mboh jeng lac taik tahak yau nan bo habar oh ka padang sang bahrau, dahlak hulin ndom meyai lac bruk ini caik piah ngak hadei. Meng hu karja taneh ia, karja palei daong dahlak hulin meng hu sa baoh sang ini, jeng biak thau dhar phol karja taneh ia, karja palei saong dom gah”.

Bui sambai haong baoh sang ong Sơn Cường tuk bahrau hu tinh Soc Trang taong yaom piah daong padang baoh sang praong 40m2, ini lac baoh sang bo ong Sơn Cương oh tuk halei khin saneng tal kayua kinh te di baoh sang daok kathaot, oh hu jien piah padang hu sa baoh sang kajap piah daok. Hu sa baoh sang, ong Sơn Cường jeng sanang hatai ka baoh sang tuk yam tame bilan hajan angin.

“Hu baoh sang drei jeng oh daok duh hatai rilo kayua meng dahlau baoh sang taik tahak abih mbong, hajan angin rabuk lac hadiuk anek oh khin ndih. Urak ini oh daok duh hatai tra. Urak ini hu sang paje, dahlak hulin tok sangka ka prein yava piah nao ngak raong hadiuk raong anek, tok sangka nao ngak duah jien piah raong baoh sang dahlak hulin min”

Ban Can Tho hu 955 baoh sang taik tahak brei hu padang. Bruk brei oh daok baoh sang taik tahak brei hu daong tapak tal yaok baoh sang piah khik kajap bruk samu gauk, tantu, cambaih laih, njauk haong adat cambat saong bruk bhian rah tabiak di yaok bhum palei. Ong Nguyễn Ngọc Thanh, Phaok Bi thu thuong truc huyen Cờ Đỏ brei thau, huyen Cờ Đỏ ndom meyai lac bruk brei oh daok baoh sang taik tahak lac bruk chinh tri hu makna, gam haong nan lac pataom tame daong dom gah piah ngak salah blaoh bruk brei oh daok baoh sang taik tahak ka rahra, piah ka yaok urang thei jeng hu sang daok tani tanat, meng nan uak drei tagok dalam raidiuk.

“Dalam tukvak anak tal huyen patui veik ngak dom harak hukum ngan haong baoh sang kathaot, jaik kathaot piah samu likau hu bruk daong. Pato tacei ka dom pakat uy Ndang, karja bhian pasang iek, daong, tagok pakat, pasiam veik piah ka rahra hu baoh sang tani tanat piah diuk rai jeng yau lac patagok kinh te dalam tukvak anak tal”.

Dalam tukvak 2021-2024, tinh Soc Trang hu jak ba padang labaih 5.200 baoh sang urang kathaot, jaik kathaot haong jien labaih 280 ty ndong. Urak ini daok labaih 8.000 sang daok payua, sang taik tahak brei hu padang bahrau atau pasiam veik. Tui amuk Từ Tố Quyên, Phaok Akaok Uy mban Mat tran Negar Viet Nam tinh Soc Trang, tapa dom gah ngak pahla, bruk jum tangin daong daom baoh sang “Gul pataom” hu daong dom baoh sang rahra tani tanat raidiuk, dak harei dak uak drei tagok truh kathaot.

 “Ngak bruk pathau khan jak ba, daong jien piah daong bhum palei hu jien piah sangka ka bruk padang sang daok, brei kein lagaih ka urang kathaot, jaik kathaot, urang baoh sang kan kandah hu sang daok, bruk ngak tani tanat jang. Tapa padang sang daok jeng daong mikva hu kein lagaih uak drei tagok dalam raidiuk.”

Ngan haong bruk tame ngak catang di karja palei, bruk jum tangin klah rabha di dom urang ngak pahla, dom gah ngak mbang pablei salih rik prein ngak bruk brei oh daok baoh sang taik tahak kayua jalan ngak sangka ka baoh sang kathaot, jaik kathaot uak drei tagok dalam raidiuk. Dalam dom baoh sang bahrau tuk halei jeng ndaih ndaih sap klao, bruk bui sambai, haniem phol, raok salam bal pataih mai, ngan haong rilo hatai caong takre, kuhria dalam thun bahrau, thun Ula Naih di rahra di bhum taneran kraong Cuu Long./.