Min bruk patrun kathaot khang kajap bhum bhap bini bangsa takik di bhum ini jeng oh ka hu yau tanut ba tabiak. Kadha vak “Bhum taneran kraong Cuu Long: Njauk langyah bruk “tabiak truh kathaot khang kajap” ka bhap bini bangsa takik di urang vak Hồng Phương, lac urang vak di rayo sap ndom VN daok di bhum taneran kraong Cuu Long.

Danak dak bruk ngak negar patagok KT-XH bhum bhap bini bangsa takik saong bhum ceik, (ieu katut lac Danak dak bruk ngak negar 1719) hu ba tame ngak meng kreh thun 2022, min meng bruk kham merat di rilo tỉnh ban bo dom chỉ tiêu kuhria tal harei 31/12/2023 hu ngak salah, yam tapa bruk hu jao brei. Bruk peih phun jien di bhum hu jaik 26%. Dom tỉnh ban hu bruk peih phun jien glaong lac Hậu Giang, Kiên Giang, Cà Mau, Sóc Trăng, Bình Phước, Tây Ninh. Yaom lac bruk peih phun jien piah ngak Danak dak di bhum gah Meraong glaong duk haong kuhria rah tapa dalam taneh ia, min bruk patrun kathaot bhum bhap bini bangsa takik di bhum daok biar, bahrau hu 1,89%.

Tapa peih ngak, lambaok mBan bangsa tỉnh Cà Mau ndom lac, Cà Mau saong bhum taneran kraong CL hu rilo kraong ribaong ngak ka bruk nao mai, pablei salih biak kan kandah, tui nan prein buh tame ngak biak glaong. Abih di nyu lac bhum bhap bini bangsa takik di Cà Mau lac labik bhian gaok kan kandah di biến đổi khí hậu, mbuan glut jaleih tapen kraong, tapen tasik nan ye jien buh tame ngak dak glaong jang: “Phun jien di Danak dak brei ka tỉnh Cà Mau dalam vaktu 2021 - 2025 lac labaih 161 tỷ, dalam tuk daok buh brei ka dom bruk ngak karei di Danak dak nan ye phun jien brei ka Danak dak sit ka 1 di Danak dak 4 yaok thun lac oh praong rilo. Nan ye dom bruk ngak, hạ tầng jalan mbak hu daong jien ngak yaok thun oh hu rilo, bahrau pabak hu sa binah biak sit duk haong phun jien caong hu piah ngak di dom puk palei, mboh lac bahrau daong hu ka dom bruk njauk ngak samar drah piah pabak ka raidiuk bhap bini dalam bhum”.

Dom tỉnh Hậu Giang, Sóc Trăng, Trà Vinh,... jeng gaok kan kandah ka phun jien hu pabak brei. Langiu di nan, dom thun jaik ini, urang bangsa takik kan kathaot daok di bhum gah Meraong daok gaok kan kandah di bruk biến đổi khí hậu oh siam nan ye Danak dak peih ngak lac kan kandah, urak ini daok kan kandah jang.

Tui Phó Chủ tịch Hội đồng Bangsa di Quốc Hội Trần Thị Hoa Ry, ngan saong dom tỉnh ban bhum gah Meraong, piah ngak hu bruk lac bhum bhap bini bangsa takik tabiak truh kan kathaot, brei sangka tal dom sarak pambuak tal anek menuac yau ye: pato megru, ba brei bruk ngak, ba ilamu công nghệ tame ngak tabiak dom pandap karei, siam:  “Sangka jhul khang gah salih bahrau cơ cấu kinh tế, salih bahrau jalan peih ngak ka nyu lagaih haong bhum bhap bini bangsa takik di dom tinh ban saong njauk daong palagaih jang dalam cakrok jalan ngak mbang duah jien ka sang bhum bhap bini bangsa takik. Dalam bruk quy hoạch, kol drei njauk pasang iek, ramik veik piah pabak quy hoạch ka patagok KTXH ngan saong bhum bhap bini bangsa takik.”

Tui pathau khan di UB Bangsa, bruk patrun kathaot bhum bhap bini bangsa takik di bhum gah Meraong biar lac kayua urang bnagsa takik kan kathaot rilo meng lac kan kathaot “khang kajap”, oh eng drei padang jalan ngak mbang duah jien saong daok pagam pambak tame sarak; dom sang “di dân tự do”, sang urang bangsa takik kan kanthaot daok di dom xã, palei biak kan kandah daok kurang taneh daok, taneh pala drak, pandap piah ngak mbang, ia pandar…

Piah tukvak patui veik peih ngak Danak dak hu siam lagaih, kein laba, ong Hầu A Lềnh – Akaok Mintri, Chủ nhiệm UB Bangsa ndom lac, dom tinh ban njauk padang hệ thống dữ liệu ka bhum bangsa takik kayua urang bangsa takik lac menuac piah peih ngak bruk salih số di bruk dân tộc, yau nan meng thau cambaih dom bruk njauk salih karei piah peih ngak hu siam bruk patruh eik, patrun kathaot di palei.

Danak dak bruk ngak negar patagok KTXH bhum bhap bini banghsa takik saong bhum ceik lac sa sarak praong di bhum bhap bini bangsa takik, daok jeng sa danak dak karei piah ka bhum bhap bini bangsa takik tui samu dom labik karei dalam taneh ia. Caong lac meng bruk tacei pato saong ba tangin tame meng Trung ương, bhum bhap bini bangsa takik meda hu hadah hadai dalam bruk patrun dom sang kan kathaot saong tabiak truh kan kathaot khang kajap./.