Di vụ padai ini, urang ngak nong pak Vĩnh Long trun pajaih labaih 38.000 hecta. Urak ini, mikva urang ngak nong daok pataom prein tame yuak dom mblang padai praong. Hadei di sa tukvak trun biar, dom harei tapa, yaom padai tagok hasit, meng 8.000 đồng tal 11.000 đồng/kg. Tui yaom padai yau ini, urang ngak nong laba hu labaih 2 triệu đồng/công. Saai Nguyễn Thanh Tâm, xã Thiện Mỹ, huyện Trà Ôn brei thau: “Dut saong bilan blaoh, padai yuak hu rilo jang. Yaom padai urak ini pablei hu labaih 142 ribau đồng sa jak, tui nan, mayah drei pablei sa công laba hu labaih 2,5 triệu/công.”

Yaom lac yaom padai tagok min ka oh tani tanat nan ye dom urang mai blei ka oh khin caik jien takai rilo. Mayah dahlau deih, urang mai blei bhian caik jien takai dahlau di tuk yuak padai labaih 10 harei ye urak ini, tok caik jien takai dahlau 2 harei. Daok gah urang ngak nong ye caong pablei chip kayua padai tathak blaoh, mayah caik lavik oh siam ka chất lượng padai.

Meng mblang taneh padai Đông Xuân di Cần Thơ praong labaih 72.800 hecta. Urak ini, yaom padai tagok jang 200 đồng/kg di pajaih Đài Thơm 8 dut saong adit blaoh, yaom padai that daok hu urang nong pablei yaom meng 7.100 đồng/kg tal 7.800 đồng/kg. Tui ong Trần Thái Nghiêm, Phó Yam ndok Sở Ngak nong saong Patagok palei pala ban Cần Thơ, tui yaom bo urang mai blei ba tabiak saong langik siam lagaih ye urang ngak nong hu jayah. Min, piah ka gah padai brah hu cak rok patagok khang kajap, ye bruk pambuak gauk di urang ngak nong, doanh nghiep jeng daok lac bruk praong. Tui ong Nghiêm, danak dak 1 triệu hecta padai chat luong glaong pambuak haong bruk patagok hijao hu peih ngak di bhum ĐBSCL meda ngak jeng bruk jhul tagok khang ka gah padai brah chất lượng, tantu cambaih laih, thau hu bruk ngak di drei. Taphia di nan, bruk hu makna praong lac danak dak meda daong ka dom doanh nghiệp khang hatai, sahanang hatai cak rok darak pasa saong pambuak bruk khang kajap haong rahra jang dalam tuk pala, ngak padai brah:“Ban Cần Thơ jeng thau lac bhum hu mbaok di danak dak praong labaih 50.000 hecta di dom bhum hu mbaok tame danak dak VnSAT praong labaih 38.000 hecta. Ban Cần Thơ jeng daok pataom prein tame peih ngak dom bhum pala drak, kol dahlak daok pasang iek piah padang ngak dom mã bhum pala di dom bhum hu mbaok tame danak dak 1 triệu hecta. Jhul khang bruk ba brei dom paok ilamo yau ye sa njauk 5 trun, jalan ngak padai thông minh piah jhul khang dom jalan pala ngak khang kajap.

Daok tui Sở Công Thương tỉnh Vĩnh Long, hadei di tuk hu Sarak ka 10 di Thủ tướng Rajaei ka bruk jhul khang ngak mbang, pablei padai brah tabiak negar langiu khang kajap, tantu cambaih laih, hu kein lagaih, Sở Công thương Vĩnh Long jeng hu harak payua tal UBND dom huyen, ban sit, dom doanh nghiệp ngak gah pablei salih padai brah, nan ye yaom padai hu siam veik. Ong Trần Nhựt Thanh, Yam ndok Sở Công thương tỉnh Vĩnh Long brei thau:“Sarak di Thủ tướng kol dahlak ngak tui biak catang, pambuak haong dom sở mBan ngành saong puk palei piah peih ngak. Hu harak payua trun dom huyện, dom HTX pataom blei padai, dom công ty padai brah pandap mbang piah daong ka mikva ngak njauk tui jalan ba tabiak di di sarak. Bilan đông xuân ini lac bilan bo mikva pala njauk abih, pala drak rilo abih nan ye yaom padai trun hasit, min harei ini jeng tani tanat gilac paje.”

Dom mblang hamu padai Đông Xuân hu yuak blaoh, rahra daok ngak hacih mblang hamu, ngak taneh piah caga ka bilan padai Hè Thu 2024, khik kajap tukvak paatah di 2 vu takik di nyu lac 3 adit. Di dom mblang hamu hu trun pajaih blaoh, gah ngak nong kakei urang ngak nong tui iek, ba ia tame tani tanat piah pacang hareik hareim tamuh tabiak, pacang ka phun padai mada plaih bruk palai kaik di rầy nâu saong tui iek siam jit ruak meng di tuk akaok bilan pala./.