Sa-ai Trần Thị Bình, daok di xã biên giới Ia Dom, huyện Đức Cơ, tỉnh Gia Lai hu palih ruah ba tame ngak urang ngak cao su Đội 2 Công ty 72, Binh đoàn 15 hu labaih pluh thun ini mai. Sa-ai brei thau, meng yaom jien bilan tani tanat labaih 7 triệu đồng, hadei di rilo thun, sang sa-ai blei hu hamu apuh, patagok bruk pala drak hadei di tukvak ngak bruk, meng nan bo hu labaih jien ndo, drap ar, anek bhik hu mbang bac tal labik tal dhua. Nan ye, sa-ai tuk halei jeng ngak siam bruk di urang ngak dalam sa jabat kinh tế, quốc phòng: “Lac urang ngak di jabat ngak bruk di bhum tapen negar, hu thei oh bhian randap tame bein phun, ye khaol dahlak khan brei jabat saong bol lin thau, piah khik siam mekre bruk ka khaol dahlak ngak saong khik kajap bhum tapen negar".

Daok di bhum tapen negar Chư Prông, Gia Lai, meng hu palih ruah tame ngak di đội 5, Trung đoàn 710, bo rai diuk di sang sa-ai Kpuih Kớt hu salih bahrau mboh di anak meta. Diuk pasang bahrau tabiak daok karei, taneh pala drak takik, bo daok thu lagu, nan ye rai diuk biak kan kandah. Meng akaok thun 2022, dua diuk pasang sa-ai Kớt hu palih ruah tame ngak cao su, rai diuk di dak harei dak tani tanat jang:  “Urak ini dua diuk pasang hu cadu prein jang. Tuk tame ngak, jabat hu daong palagaih ka 2 diuk pasang ngak bruk. Urak ini, sang hu jien mek tame tani tanat, ruak kik ye hu quân y. Anak tal, dua diuk pasang kham merat ngak bruk siam jang, bac megru ilamu meng urang ngak klak, paglaong tangin ngak, piah patagok jien mek tame”.

Nduac tapa 3 xã tapen negar Ia Pnôn, Ia Nan, Ia Dom, sa binah xã Ia Kla saong ban sit Chư Ty (huyện Đức Cơ), glai cao su di Công ty TNHH sa  thành viên 72, Binh đoàn 15 daok pambuak pagam haong 18 labik daok di bhap bani, puk palei tỉnh Gia Lai. Gam haong bruk salih bahrau, paglaong kein laba di bein phun, jabat daok hu peih bruk iek ruak, brei jru oh mek jien, pambuak pagam baoh sang urang ngak lac urang Yuan saong urang bangsa takik gam daong ba gauk cak rok patagok bruk ngak mbang kinh tế. Thiếu tá Phan Tiến Toàn- Phaok akaok Công ty 72, Binh đoàn 15 brei thau: “Yaok bilan, jabat hu brei manuac mai pambuak gauk khik kajap an ninh chính trị, sron mbon palei pala dalam bhum jabat khik iek; ngak siam bruk khik ramik pandap panda; pambuak bruk haong dom gah pasang iek bruk tạm trú, tạm vắng. Yaok bilan, gah khik caga di jabat hu mbaok tame pacang khik jalan tapen negar, cột mốc. Dom thun tapa, jabat hu pakat uỷ, karja palei taong yaom glaong".

Ngan haong kadha “Binh đoàn pambuak haong tỉnh, huyện; công ty pambuak haong huyện, xã; kapul pala drak pambuak haong puk palei; sang urang  ngak lac urang Yuan pambuak haong sang urang bangsa takik”, dom thun tapa, dom jabat hu caik hatai tal bruk pato bruk ngak, jao brei ilamu raong glang, pala drak, daong brei pajaih, jien phun… daong ka bhap bani cak rok patagok bruk ngak mbang kinh tế sang. Meng nan, rilo sang urang ngak lac urang bangsa takik hu tabiak truh kan kathaot, yam tagok ngak kaya meda.

Thiếu tướng Hoàng Văn Sỹ, Phaok bí thư Đảng ủy, Tư lệnh Binh đoàn 15 brei thau, Binh đoàn urak ini hu labaih 15.000 urang ngak, rilo meng lac urang bangsa takik. Thun 2022, jien mek tame kuhria rah tapa di urang ngak hu 8 triệu đồng/bilan. Rai diuk di urang ngak di bhum tapen negar dak harei dak glaong tagok,  bruk kinh tế- quốc phòng dak harei dak khang kajap: “Bruk gun pataom di dom bangsa, giao lưu ilamo bahrau dalam bol bhap rah ra dak harei dak tagok glaong; bruk  pambuak gauk di bhap bani, urang jakar, urang ngak di binh đoàn ye tuk halei jeng khang kajap. Abih di nyu lac bhap bani hu caik hatai jang dalam bruk pacang khik jalan tapen negar, bhum taneh tapen negar, samar duah thau dom kadha oh siam, pathau khan samar drah, tapa nan khaol dahlak hu pambuak bruk haong puk palei saong pakat angaok, samar drah langyah dom bruk cuang kandah". 

Meng dom jalan ngak njauk, sarak njauk haong hatai di bhap bani, dom mblang taneh glai cao su hu daong ngak jeng dom labik pacang khik hijao khang kajap bhum tapen negar gah Barak bhum taneh Tây Nguyên../.