Tỉnh An Giang hu jalan tapen negar haong Campuchia atah jaik 100 km. rilo thun tapa, bruk tame tabiak negar suan hukum jeng bhian rah tabiak, ba tal dom bruk srau kadau yau ye pablei salih menuac, dui katung, pachot urang ngak tapa gah daih negar. Abih di nyu lac dom bruk tame tabiak negar suan hukum piah pablei salih, pajeng ba pandap lậu, pandap pakauk tapa jalan tapen negar.

Piah samar mboh, pacang cakak dom menuac tame negar suan hukum tapa jalan tapen negar, abih di nyu lac dalam tuk puac thun ini, dom gah chức năng daok harei melam kham merat pacang cakak. Langiu di gah biên phòng, daok hu bruk pambuak gauk catang di công an, hải quan ba gauk ngak bruk. Bahrau ini, di labik khóm Vĩnh Xuyên, phường Núi Sam, ban sit Châu Đốc, Cảnh sát kinh tế  Châu Đốc saong tỉnh cap mek hu 2 urang gam haong pandap panda lac: 400 mbaik pakao lậu, 1 ghe jamriak saong 4 radaih mô tô. Thượng tá Nguyễn Đăng Khoa, Phaok akaok Cảnh sát kinh tế Công an tỉnh An Giang daok brei thau lac: “Jalan talei pablei salih lậu pakao hala meng bloh njauk cap mek, tok cap mek hu 400 mbaik pakao, min dalam jalan talei nan saong tuk nan kol nyu pajeng mangaok vỏ lãi labaih 1.000 mbaik pakao, pandap panda yau nan oh lac takik. Urak ini, pambak tame bilan ia ndik, kol pablei salih pandap lậu bhian salih jalan, salih labik, nan ye pandap lậu meda hu rilo jang”.

Đại tá Lý Kế Tùng, Phaok Chỉ huy trưởng Bộ đội Biên phòng An Giang brei thau, kol pablei salih lậu dak harei dak kandauk jang, nyu pajeng pandap lậu tui abih jalan halei bo nyu meda ngak hu. Tuk pajeng ba bo mboh kapul urang jakar pacang buôn lậu, kol nyu klaak veik pandap, ghe pajeng, hu tuk kol nyu daok ngak brei kram ghe pajeng pandap, piah plaih njauk khởi tố tuk njauk cap mek, gaok mai, kol buôn lậu nyu padauk pandap hu yaom tame pandap lap jien piah tapa mbaok gah chức năng meng jalan pabah mbang negar… Bruk njauk biai nan lac, bahrau ini hu dom bruk pajaeng ba ma túy, kol ini daok hu ba tui phao. Đại tá Lý Kế Tùng brei thau:“dalam bruk mesruh haong kol buôn lậu hu biak rilo kan kandah, nan lac dom menuac njauk katung dui tame buôn lậu tagok rilo, ka 2 lac kayua laba rilo nan ye ba gauk nao buôn lậu saong kham merat khik caga pandap di po pandap, plaih njauk cap mek, plaih njauk đầu nậu taong phạt, nan ye dom urang nan bhian mesruh veik haong urang jakar. Langiu di nan, kol nyu daok pambak tame bruk payeng harak gar; pajeng pandap medil lac nhập lậu, ye pajeng pandap lậu meng tỉnh karei mai An Giang atau pajeng pandap lậu nao tapa An Giang. Công an, Hải quan… hu mboh saong cap mek hu rilo bruk pajeng pandap meng TP. HCM saong meng Bình Dương mai ini”.

Meng akaok thun tal ini, dom gah chức năng dalam tỉnh An Giang hu pasang iek, mboh hu saong cap mek labaih 140 bruk, pablei salih, pajeng ba pandap pakauk, pandap nhập lậu, bleik saleik dalam pablei salih haong pandap ja, yaom abih tih jaik 120 tỷ đồng. Dalam thun ini, abih tih yaom jien taong phạt ngak suan gah hành chính saong pandap panda cap mek rilo jang labaih 6 tỷ đồng duk haong thun bloh. Gah chức năng hu khởi tố 29 vụ án; khởi tố 31 urang, yaom pandap njauk khởi tố lac labaih 30 tỷ đồng.

Piah ngak hu siam bruk mesruh pacang tame tabiak negar suan hukum, pacang buôn lậu, bleik saleik dalam pablei salih saong pandap ja dalam tukvak anak tal, An Giang daok brei khik dom kapul ngak bruk pacang caga buôn lậu di labik tapen negar. Dom gah chức năng daok patagok bruk pambuak gauk mesruh pacang buôn lậu, pajeng ba suan hukum pandap panda tapa jalan tapen negar. Abih di nyu nan lac sangka salih bahrau, paglaong bruk pathau khan, pato pakai, jak ba bhap bini oh ba tangin tame daong ka kol pablei salih pandap lậu, tacei brei karja thau kol ngak suan, mesruh pacang buôn lậu, bleik saleik dalam pablei salih saong pandap ja. Gam haong nan, paglaong bruk ngak, trách nhiệm di urang dang akaok, kiểm điểm trách nhiệm urang dang akaok meyah dalam labik di drei hu bruk buôn lậu praong, khang. Patagok talei pambuak bruk dunya haong 2 tỉnh Kandal saong Takeo - Campuchia dalam bruk khik iek bhum tapen negar, abih di nyu lac bruk khik iek, mesruh pacang cakak dom bruk tame, tabiak negar suan hukum saong bruk pacang caga buôn lậu, pajeng ba suan hukum pandap panda tapa jalan tapen negar./.