Palei Lăng, phuong Thắng Nhì, Ban Vũng Tàu, atah di ini meng 10 thun dahlau hu maong yau ye sa labik “pandiak” brei ka bruk ikak ikaiy pablei salih menuas urang, me-in jru njuk aphil di tinh Ba Ria – Vung Tau. Dalam dom thun 2016 – 2019, tok dua Khu pho 4 saong Khu pho 5, kuhria rah tapa yaok thun hu labaih 200 urang hu ba nao caga pataba njuk aphil, hu 50% urang brei ba nao caga pataba njuk phil di Ban Vũng Tàu.

Tui urang bhap bini daok di Xóm Lăng, meng bruk kham merat di dom kapul, dalam nan hu Bien phong urang caga nagar di tapen tasik hu peih ngak samu dom jalan bruk ngak hu daong pacang cakak, dui trun patakik manuac urang ma-in aphil, dak yam ngak hacih sa-at labik tapen tasik. Ong Nguyễn Văn Linh, rahra urang bhap bini daok di palei Xóm Lăng ndom meyai lac:  "Labaih meng 10 thun dahlau, tuai damuai haong rahra bhum palei karei oh khin nao mai tal palei Xóm Lăng me-in, blei kaya tasik kayua huac mboh dom kol me-in njuk aphil dang dang di anak meta. Tukvak bahrau blaoh bruk ini oh daok di mata, urak ini labik darak kaya tasik Bến Đình hu tuai damuai jirah duah tal jeng ye tame tabiak mbuan sanang."

Meng harei 2/2025 harei padang kapul pacang caga urang bleik urang main jru aphil di Bol lin caga nagar di tapen tasik tinh Ba Ria – Vung Tau dang akaok ngak, pambuak gauk saong dom jabat gigah roh duah mboh, cap mek hu 825 mbang haong 918 urang; cap mek hu labaih 96kg jru aphil saong rilo radaih lamo ndap nda, karei karei gam tui nyu …

Dom thun jaik di ini, bruk di dom janih kol bleik di labik tapen negar, bhum tasik daok rah tabiak reing srau kadau. Dom kon bleik salih jhul khang bruk ngak mang xa hoi saong dom bruk pablei salih meyit meyao ndien tu… piah vak vah, meyit meyao, pajeng ba, jao haong tok mek ndap nda bleik salih tapa jalan tapen negar biak rilo.

Trung ta Nguyễn Văn Tiện, Phaok akaok jabat Pacang caga aphil haong kol bleik kol duas, Bol lin Bien phong tinh brei thau, dang di anak bruk di ilamo kong nghe 4.0 tagok glaong, urang duas urang bleik pandar rilo bruk ngak bahrau piah pacang meta jabat karja chuc nang, ini lac bruk biak jak haong ngak kan kandah ka kapul pacang caga jru kasa aphil haong urang duas bleik salik: "Dak kan daman kandah kandaiy ralo ye kapul pacang caga urang duas, kasa aphil di tinh Ba Ria – Vung Tau dak brei hu kham merat, dalam bruk roh duah piah thau tani tanat ilamo, thau ka bruk ngak piah ngak hu siam hu lagaih saong dom janih kadha urang duas kon bleik salih ba tabiak".

Thuong ta Phan Anh Hiệp, Phaok akaok gah Pato tacei Bol lin Bien phong tinh Ba Ria – Vung Tau brei thau, kuhria dalam tukvak di anak tal, bruk di dom janih urang duas urang bleik di labik tapen tasik, bhum tasik Ba Ria – Vung Tau jeng daok rah tabiak ralo kadah kan si thau, abih di nyu nan lac kol bleik salih daok pandar ilamo kong nghe glaong. Mai meng bruk nan hu ba tabiak rilo kan kandah ngan haong kapul pacang caga kol bleik kon duas saong jru phil di Bol lin Bien phong tinh: " Bruk kon bleik di tapen lamnge tasik nagar di tinh hu rilo srau kadau, kayua yau nan njauk brei ka kapul pacang caga kasa aphil haong urang duas, Bol lin Bien phong tinh brei padang bruk taong tayah, ngak catang dom jalan ba tabiak, bruk pato tacei di urang ngak bruk pakat angaok, pataom tame dom bruk hu makna, pathau khan siam ka Ndang uy, Mintri Pato tacei, pan akaok bruk pacang caga kasa aphil, urang duas di dalam tinh."

 Dalam luac luruh jalan dak padang, kham merat masuh pacang caga saong dom janih urang duas janih di kon bleik salih yaom lac mada bhian dang tapak anak dom bruk kan kandah saong dom bruk plue pachreih di jien padai… min tapi, urang jakar, bol lin pacang caga urang duas kol bleik salih, kasa aphil Bien phong tinh Ba Ria – Vung Tau tuk halei jeng jum pataom gauk, njauk hatai, padang hatai khang kajap, oh huac hagait, thau ka bruk đi drei, khik kajap ilamo, njauk haong angan “Bol lin Wa Ho” siam glaong di jaman bahrau./.