Ong Võ Quan Nhơn, sa urang ngak mbang taong mek kaya ikan tasik daok di Phường 5, Ban Vũng Tàu, tinh Ba Ria – Vung Tau brei thau, tukvak masa tapa, di dom pabah lamnge tapen tasik daok di dalam phường, urang jakar, bon lin Balai Bien phong Bến Đá bhian pathau khan, brei harak bi-ar ndom mayai brei ka kat kanyik di EC ka urang nao gilai kapal tasik. Ong Nhơn brei thau lac, ong jeng bhian kakei dom urang nao gilai kapal tasik ngak njauk adat hukum bruk tame tabiak tasik, taong mek kaya ikan njauk labik njauk dhua dalam tasik:

“Balai Bien phong Bến Đá jeng dakwah pathau khan brei ka urang nao mai meng gilai kapal taong ikan di dalam tasik negar langiu, srap gap pasang iek ginup harak gal adat hukum tabiak tasik, jeng yau brei ngak njauk dom harak gar di dom gah ba tabiak. Ini lac sa jalan ngak, sarak praong di Ndang dalam mbang ini. Kayua yau nan ye dahlak hulin njauk thau cambac lac brei ka bruk ngak suan tui IUU, mikva di ini jeng yau nan, thau saneng thau tani tanat jang piah ngak njauk, ngak siam, kham merat dalam masa mbang ini piah mek hu kat kanyik di EC mai, brei ka mikva sanang hatai tabiak tasik.”

Daok ong Lý A Sáng, sa urang pan akaok kapal BV99198 TS khan brei thau lac, meng di tuk EC kakei dahlau brei ka kat kanyik tal ka bruk ngak mbang dalam tasik Viet Nam ye gah Bien phong caga tasik dak harei dak jhul khang bruk pasang iek yaok mbang gilai kapal tame tabiak pabah lamnge. Kapul bol lin Bien phong bhian pathau khan dakwah ka urang pan akaok kapal, urang nao gilai kapal oh ngak suan adat hukum di IUU saong adat di Hukum kaya Ikan tasik. Ong Sáng ndom mayai lac:

“Bien phong bhian pathau khan ka po kapal gilai, urang peih kapal gilai saong urang nao kapal gilai di yaok mbang tabiak tasik brei hu ginup harak gar, pasang iek bruk di angaok tasik. Balai bien phong jeng dakwah pathau khan ka mikva njauk taong mek kaya ikan di bhum tasik nagar Viet Nam. Meyah taong mek kaya ikan di bhum jaik taphia gam haong tasik negar langiu, taong tapa negar langiu ye urang taong mek kaya ikan njauk taong bhat biak trak, cuang kandah tal gah kaya ikan, pandap panda oh pablei tabiak hu. Urang nao gilai caong paok trun thẻ kat kanyik piah peih bruk ngak mbang hu kein lagaih jang.”

Thau mbiah bruk pacang caga taong mek IUU ieu lac bruk chinh tri politik dang anak mata hu makna, samar chip, Mentri Pato tacei Bol lin Bien phong tinh Ba Ria – Vung Tau, Mentri pandar dom balai jhul khang bruk ngak; pambuak gam haong bruk pasang iek saong dakwah pathau khan jak ba ka bruk pacang taong mek IUU.

Kapul bol lin bien phong peih bruk pasang iek luac harei malam di dom pabah kraong ribang tame pabah lamnge saong patagok dom bruk ngak tui hukum, kham merat oh brei luai ka gilai kapal taong mek kaya ikan tabiak tasik bien halei oh ka ginup harak adat tui hukum tame tabiak tasik. Đại úy Phạm Anh Tuấn, Akaok balai Pasang iek Bien phong Bến Đá, Balai Bien phong Bến Đá, Ban Vũng Tàu brei thau:

“Ngan haong dom gilai kapal lahik talei pambuak ralo angak 6 mon ye balai taong phone pandar urang peih kapal ngak gilai pasiam bruk nan, dalam bruk oh ka pasiam hu kayua khut atau tayah ye pandar po gilai kapal samar drah ba gilai kapal mai tame ar piah pasiam. Daok meyah caik tapa 10 harei blaoh oh pasiam ye po gilai kapal njauk brei taong bhat tui hukum.”

Piah ngak brei ka bruk taoh kat kanyik di EC hu siam lagaih, samar drah, meng tukvak masa tapa, Bien phong tinh hu padang 5 kapul ngak bruk nao tal dom tinh ban di Nam Định, Đà Nẵng, Bình Thuận, Trà Vinh saong Bến Tre piah ginum biai dalam bruk pasang iek gilai ikan. Gam haong nan, pambuak peih ngak dom bruk ngak piah brei thau, pasang iek langyah dom gilai kapal taong mek kaya ikan tasik di dom tinh, ban karei ngak suan chung di bruk taong mek ikan gadang IUU.

Gam ngak dom jalan lanyah samar chip di kapul Bien phong Ba Ria – Vung Tau jeng ye pambuak  gam haong bruk ngak catang khang di pakat uy karja palei, dom kapul jabat karja saong mikva nao gilai kapal, Viet Nam patagok tui gah jalan khang kajap, thau ka bruk di drei saong pambuak samu dil haong dunya./.