Mada ieu lac sa urang di dalam dom gru pato ndam gam haong rilo thun haong rai anek saih pakat sa di xa Lạc Hòa, anai gru Đỗ Thị Hồi, urang pato di Sang bac Tiểu học Lạc Hòa 1 tuk halei jeng khik hatai chreih chrai, anit ranam haong bruk pato bac, luac suluruh labaih 30 thun dang pato, anai gru tuk halei jeng abih hatai rik prein yawa ka bruk pato magru.

Hadar veik dom tuk wak camriep bahrau tame pato, anai Hồi brei thau lac, thun 1992, tuk bahrau umo 19 thun, bac tamat Trung học Sư phạm Soc Trang, anai gru hu taduan harak mai pato di Sang bac Tiểu học Lạc Hòa 1, tuk nan sang bac daok ralo kan kandah, daok kurang rilo pandap nada, min anai saong dom gru pato karei di sang bac oh huac kanda kan kandah, kham marat pato akhar huruh brei ka dom adei gauk anek saih naih di bhum atah biyah piah ka dom anek saih hu ilamo akhar huruh ka harei hadei.

“Ngan haong drei ye caong ngak bruk hagait ye drei tuk halei jeng caong maong mek hu kein lagaih glaong di abih, kayua yau nan ye drei tuk halei jeng roh duah, salih bahrau saong duah jalan ngak bahrau dalam bruk pato. Min blaoh piah ngak hu bruk ini ye dahlau di abih drei njauk maong anek saih di drei mek hu dom hagait, hu hagait saong dom adei caong hagait, piah meng di nan drei duah jalan pato ka lagaih haong tal pato, lagaih haong anek saih.”

Lạc Hoà ieu lac sa bhum taneh biak karei, hu labaih 80% anek saih urang bangsa takik, daok urang Yuan urang Viet biak takik yau nan ye bruk pato bac biak kan. Mai meng hatai anit ranam gam saong bruk ngak di sa urang gru pato, anai caik hatai tal yaok anek saih dalam yaok mbang bac, biak caik hatai tal dom anek saih bac ka oh ka jeng. Langiu di maong bac di mangaok tal bac, nai gru Hồi jeng buh tukvak masa hadei var bac piah pato pabak ka dom adei ka oh bac tani tanat. Kayua yau nan ye mboh yaok thun, dom tal bac kayua anai dang pato tuk halei jeng mek hu jak jeng glaong, anek saih bac salah blaoh danak dak bac saong rilo anek saih hu brei pok mayaom kayua bac naih joi saong mek hu jai glaong dalam dom danak dak. Anai Đỗ Thị Hồi brei thau lac:

“Dahlak hulin caong maong khin sa janih yau habar ka tal bac di drei pato tuk halei jeng hu dom adei bac naih tui njauk prein di dom adei saong oh caik ka dom anek saih halei bac ka oh tani tanat saong oh caik ka anek saih halei kayua makna hagait bo klak bac mateh dhih.”

Oh ieu lac sa janih pato naih, anai gru Hồi daok kham marat daong ka dom anek saih hu kein lagaih piah nao bac. Yaom lac jien mek tame oh glaong, min anai gru hu buh tabiak sa paok jien bilan biak takik di drei blei alin hadiah ka dom anek saih dom blah tapuk siphau, mbut klam, caga jak ba dom urang ngak pahla daong pandap panda, saong prein ka dom adei patui hu nao tal sang bac, yau ye daong jien bac, radaih juak, tapuk siphau, khan aw ngui cuk, brah,… 

Langiu di nan, anai gru jeng daok gam haong kanja di bhum palei peih tal bac pato ka dom rahra ka oh thau akhar huruh di tuk melam sup hadei di tukvak masa nao ngak hamu puh. Gru Thạch Thanh Hòa, Akaok Sang bac pakat sa Lạc Hòa 1, ndem mayai brei ka anai gru lac:

“Anai Hồi lac sa urang gru pato naih joi, urang hu ilamo biak khang kajap, biak anit ranam haong bruk pato, abih hatai sahaneng ka anek saih anit ranam, blaoh, nai daok ieu lac sa urang kham marat dalam bruk ngak, hu dom panuac rik tame biak gheih, biak naih piah dak padang jabat ini dak harei dak siam makre jang. Blaoh di nan, anai gru Hồi tuk halei jeng klah rabha dom ilamo, dom bruk ngak bahrau tal kapul adei saai gru pato dalam sang bac, oh thau huac glaih glar. Kayua yau nan ye, anai gru Hồi hu dom adei saai biak anit ranam.”

 Langiu di bruk pato bac, anai gru Hồi daok hu rilo padah krah, dom asal kadha roh duah ilamo, dalam nan hu yaok piluh dah krah hu pok brei angan pakat di labik, 3 dah krah hu pok brei angan mayaom di pakat tinh. Rilo dah krah kreih camin, asal kadha hu pandar dalam bruk pato bac.

Ngan haong dom jak jeng nan, thun 2017, anai gru Đỗ Thị Hồi hu pok brei angan Gru pato naih joi; thun 2018 nai gru mek hu Huân chương Lao động  lek ka Klau; thun 2022 anai hu hadah mbaok mata ieu lac sa urang di dalam 400 urang gru pato hu angan je dalam nagar pahadar 40 thun Harei Gru Việt Nam. Harei 27/6/2024, anai gru hu Akaok negar pok brei angan Gru di bhap bini./.