Du lịch rahra ieu lac bruk ngak di sa kapul urang rahra hu mbaok tame ngak main jirah rivang. Urak ini, dom bhum palei daok caik hatai brei patagok bruk main jirah rivang, rik tame ngak salih biak rilo bruk mbang ngui, duah jien tame sang di rahra bhum palei. Langiu di nan, bruk rik tame biak hu yaom glaong di main jirah rivang rahra ngan haong bruk cak rok patagok ekonomi bhap bini, abih di nyu nan lac jalan cak rok patagok main jirah rivang khang karo kajap. Kayua bruk cak rok patagok di bruk main jirah rivang rahra, dom siam gheih ilamo meng kan, raidiuk mbang ngui di mikva dom bangsa jeng lac prein khang piah dui pachreih tuai damuai mai main jirah rivang. Tapa nan, dom yaom glaong ilamo siam gheih di mikva urang bangsa oh lac hu khik ramik saong pambak tabiak bo daok rik tame tadi ngak tabiak dom bruk ngak du lich dui pachreih tuai damuai, biak siam gheih di nagar Việt Nam. 

Di Sóc Trăng, xã Đại Tâm, huyện Mỹ Xuyên jeng lac xa mek hu tanut chuan palei pala bahrau kieu mau lac kayua cak rok bruk ngak ilamo pambuak gam bruk ngak main jirah rivang, patagok dom yaom glaong ilamo di bangsa Kinh, Khmer, Hoa. Kayua gam cak rok bruk ngak nong gam ngak gah main jirah rivang, rahra dalam xa hu jien mek tame tui kuhria lac mboh labaih 76 trieu dong sa urang dalam sa thun.

Ong Phòng Phú Thịnh, daok di puk palei Đại Ân, xã Đại Tâm brei thau, yaok thun hu labaih 200.000 tuai mai rivang ieik paha Chén Kiểu – sa baoh paha urang Khmer danei angan dalam xa. Gam Tui di nan, tuai damuai daok roh duah rilo adat cambat, maong ieik dom kadha daoh tamia, phlieng lima ragam ngũ âm di urang bangsa Khmer, pablei salih dom janih pandap mbang, kaya nong kayua rahra di ini ngak tabiak saong dang yaih, parang tabiak pablei. Kayua yau nan ye, mikva hu jien mek tame lac yaih ka tuai thau cambaih jang ka dom yaom ilamo di bangsa drei.

Di ban sit Phước Dân, huyện Ninh Phước, tỉnh Ninh Thuận, bruk ngak main jirah rivang rahra, ba tuai damuai mai rivang ieik palei ngak lan Hamu Traok di mikva urang Cam, roh duah ilamo ngak lan biak gheih makre oh pandar meng mban pareng, duah thau ka ilamo, adat cambat brei mboh tapa yaok janih pandap lan saong pablei salih ba bruk ngak ka rahra, khik ramik dom yaom glaong ilamo meng kan. Ong Phú Hữu Minh Thuần, Yam ndok HTX ngak lan Cam Hamu Chrraok brei thau, ngak patabiak parilo janih lan ngak gheih, lan pabak ka bruk pandar dalam sang, gam tui di nan jeng pato tacei ka tuai damuai ba drei tame ngak lan, urang dalam HTX hu jien mek tame tui kuhria labaih meng 4 tal 10 trieu dong dalam sa urang sa bilan, karo tani tanat dalam raidiuk, mbang ngui harei harei.

Tui dom urang roh duah ilamo brei thau lac, ndem tal janih ngak du lich rahra, tuai damuai bhian caik hatai tal dom yaom glaong ilamo bangsa saong langik tasik, he sinh thai di bhum palei piah ngak tabiak bruk ngak du lich hu dui pachreih tuai damuai, hu siam gheih halei oh. Kayua yau nan ye, caong ka bruk ngak du lich rahra hu siam, dui pachreih hu rilo tuai damuai ye caong hu bruk pambuak biak lagaih di bruk khik ramik saong patagok dom yaom glaong ilamo, tani tanat dom bruk daok tamo di ilamo bhum palei, gam tui di nan jeng khik ramik alam langik tasik saong he sinh thai di bhum palei.

Tiến sĩ Trần Quốc Hùng, Học viện Bangsa brei thau lac, patagok parilo janih bruk ngak dich vu du lich, dom bhum palei njauk caik hatai tal taneh riya, langik tasik di yaok labik ngak du lich rahra, plaih nyaih bruk deih yau gauk, njauk pilih ruah padang ngak du lich meng dom kaya du lich saong pamaong tame di hatai di tuai damuai. Taphia di nan, njauk paglaong ilamo ngak du lich ka kapul urang dang ngak tadi di labik ngak du lich rahra, abih di nyu nan lac di bhum mikva urang bangsa takik piah ka gah ngak kinh te taong abih gah ini hu cak rok patagok khang kajap, ba kein lagaih glaong abih ka mikva ka urang bangsa.

Ba tabiak jalan langyah cak rok bruk ngak du lich rahra pambuak gam haong ba drei tame ilamo bhum mikva urang bangsa takik, pagap yau labik tal lac palei ngak lan Hamu Traok di urang Cam di tỉnh Ninh Thuận, Thạc sĩ Hồ Lưu Phúc, gru pato di Sang bac Đại học Văn Hiến brei thau lac, labik tal ini meda cak rok veik dom bruk ba drei tame ilamo di palei Cam piah khik takai tuai damuai dalam tukvak masa suai lavik jang di var melam. Nan lac bruk ba drei tame di tuai damuai gam ngak saong mbang dom janih pandap ahar meng kan di urang Cam, ba drei tame dom kadha daoh tamia, parang ieik dom alak ragam di urang Cam…

Min, piah cak rok dom janih ma-in du lich ba drei tame ini hu kein lagaih, bhum palei, urang ngak mbang blei salih gah du lich, dich vu saong gah chuc nang njauk hu bruk pambuak, daong buh jien tame ngak co so ha tang pabak ka bruk cak rok di gah du lich hu siam lagaih jang. Dom kadha daoh tamia, ba drei tame ilamo caong hu asal kadha biak lagaih, siam gheih. Dom labik ngak du lich ba drei tame mbang dom pandap mbang njauk caik hatai khik tani tanat, hacih saat, salamat pandap mbang, ba bruk takre hatai ka tuai damuai./.