Jalan Trần Xuân Soạn, daok di Quan 7, Ban Raya Ho Chi Minh, yaok mbang tuk tame akaok bilan tui saka ia bulan saong harei parami tuk halei jeng ia tagok dauk. Dang di angaok tatua Tân Thuận maong ieik trun, kan si thau jalan mbak nao mai, halei ribaong kayua maong labik halei jeng mboh ia dauk.

Jalan 67 nduac tame jalan Bùi Văn Ba pambuak tal jalan Huỳnh Tấn Phát (di Quan 7) jeng njauk ia dauk tuk yaok mbang ia ndik ia tagok, rilo mboh di nyu meng lac tuk ia ndik gam haong hajan praong. Rahra bhap bini di ini brei thau lac, mada hu dom baoh sang bahrau padang hu pok glaong takai sang meng plaih nyaik hu ia dauk, daok veik labaih 90% baoh sang rahra jeng lac diuk haong ia:

“Jalan ini labaih si 90% ia dauk, mada hu urang payua radaih di langiu. Biak kan kandah rilo, min mikva thau mbuah kan haong gauk min, oh thei thau ka bruk ini, oh thei langyah brei ka.”

Rilo jalan karei daok di labik taneh biar, tapen kraong di Ban Raya Ho Chi Minh jeng njauk ia dauk kayua ia ndik tagok, yau ye jalan Đào Sư Tích, jalan Huỳnh Tấn Phát, Nguyễn Bình, Lê Văn Lương, Phạm Hữu Lầu…

Bruk ia ndik ia tagok, bruk ia dauk saong bruk ngak di danak dak pacang caga klah ia dauk bih jien labaih 10.000 tỷ đồng jeng lac asal kadha hu ndom tal rilo di abih dalam dom mbang nyaom ndom biai rahra bhap bini haong urang Quoc hoi bhap bini nagar. Panuac javap chlei di urang pan akaok Ban Raya Ho Chi Minh jeng oh hu hagait bahrau tuk... danak dak jeng daok rilo cuang kandah tavak tavaiy.

Danak dak langyah ka ia ndik ia tagok di Ban Raya Ho Chi Minh mada hu pambuak tal bruk salih di langik tasik salih, ka 1 ieu lac danak dak asal pasak di Ban Raya Ho Chi Minh, haong dom jalan ngak pacang caga ia tagok saong pacang caga bruk salih di langik tasik salih ka 570 km2 taneh hu labaih 6,5 trieu rahra daok gah tapen hanuk kraong Sai Gon saong pasak Ban Raya Ho Chi Minh.

Danak dak hu peih ngak meng kreh thun 2016 saong kuhria salah blaoh dalam bilan 4/2018. Min, kayua dom kan kandah tavak tavaiy susah dalam bruk peih praong mblang taneh saong phun jien kayua yau nan ye bruk ngak salah blaoh kuhria meng dahlau hu kadun veik jeng suai rilo mbang.

Ong Phan Văn Mãi, akaok Uy mban Bhap bini Ban Raya jeng hu khan brei thau, lac dalam thun 2023, Ban Raya Ho Chi Minh hu ramik dalam phun jien piah bayar ka gah buh jien lac 6.700 tỷ đồng min meda oh bayar jien hu kayua oh ka salah blaoh hu gah hukum harak gal. Ong Phan Văn Mãi brei thau.

“Anak meta lac ban raya hu ginup taneh, ginup jien piah bayar min tapi daok cang ginup gah harak gal tui hukum piah bayar jien, njauk mada ngak ka drah ka samar blaoh, thun hadei ka meng bayar jien hu.”

TS Nguyễn Đức Kiên, urang dalam Kapul Pathau khan sarak jien padai, jien Nagar brei thau, brei hu kuhria ka kinh tế taong abih lac meyah jhul samar drah bruk ngak ye daong hu kein lagaih ka Ban Raya?

“Kol dahlak var sa asal kadha kinh te lac dui atah 4 thun veik ye jien laba hu dom saong sa asal kadha oh ka kuhria hu lac bruk di rahra dalam labik ngak danak dak gaok kanjak jhak labaih 4 thun kol drei meng hu kuhria atau oh.”

 Bahrau meng blaoh di ini, tuk ndom biai mayai ka bruk rah tabiak di kinh te – xa hoi, di Mbang nyaom biai ka 8, Quoc hoi mbang ka XV, di bier harei 26/10 bahrau blaoh, Tổng Bí thư Tô Lâm hu tacei tal danak dak ini haong ndom mayai lac, “danak dak pacang ia dauk di Ban Raya Ho Chi Minh tapa 2 jaman ngak bruk blaoh rahra jeng daok haong ia dauk, dalam tuk jien Karja hu buh tabiak paje. Meyah caik tamo yau nan jeng ieu lac chung, oh mbang jien ye jeng ngak palai jien.”./.