Dom harei ini, harei jum pataom dom bangsa hu peih ngak di dom labik daok dalam bruk bui sambai di rahra. Di huyen Ninh Phuoc, palei Caklaing saong khu phố 13, ban sit Phước Dân hu Mbang bhian dang mbaok Uy mban Mat tran negar Viet Nam tinh pilih ruah ngak labik padang Harei pahadar 94 thun Harei padang Mat tran bangsa yasa Viet Nam. Amuk Quảng Thị Thơ, palei Caklaing, ban sit Phước Dân, huyen Ninh Phước brei thau:

“Harei ini biak hadah mbaok tuk hu mai tal harei jum pataom dom bangsa. Urak ini hu Ndang saong Karja sangka tal labik daok di rahra dahlak biak bui sambai ka bruk srap gap tani tanat ini. Caong khin harei hadei Ndang saong Karja sangka rilo veik tal bol bhap Cam, piah harei hadei anek taco thau anit ranam gauk, jum pataom gauk.”

Ngak bruk jak ba “Abih tih rahra jum pataom padang palei pala bahrau, do thi ilamo”, palei Caklaing saong khu pho 13 hu rilo jalan ngak bahrau hadah krah, bruk ngak siam lagaih, yau: xã hội hóa padang bahrau labik pataom me-in bhap bini Caklaing; ngak jalan betong tame mblang caoh blong; truac hadah di dom jalan dalam labik daok rahra; patagok jirah rivang bhap bini pagam haong jirah rivang bruk menyim; dom kalup kapul ragu ragam bangsa, kapul daoh tamia…Ong Thọ Đẳng, Palei Caklaing ndom lac:

“Harei gul pataom gauk var ini, dahlak maong mboh bruk ngak hu Ndang, Karja, Rajaei ba tabiak hu maong dalam, maong tanat piah ka anek Cam jeng yau dom bangsa karei maong mboh bruk ngak, piah ka palei pala dak harei dak meda ginup. Anek taco grauk palei grauk negar dak harei dạ hu nao bac hu bruk ngak.”

Ninh Phước ieu lac sa huyen hu rilo mikva bangsa Cam daok rilo abih di dalam tinh Ninh Thuan, hu jaik 11 ribau baoh sang, labaih 49.700 urang. Bruk padang ngak harei jum pataom dom bangsa di dom bhum labik mikva Cam daong ka mikva hu taom mbaok, sua tangi javap caloi, kak kajap hatai anit ranam di rahra, patagok hatai pambuak pagam bol bhap rahra, klah rabha, ba gauk padang palei pala dak harei dak patagok. Ong Quảng Thúc Đoan, Akaok Uy mbang Mat tran Negar Viet Nam huyen Ninh Phước brei thau:

Di ban Phan Rang – Thap Cham, dom labik daok rahra bhap bini di khu pho 2,3 saong 8, phuong Đô Vinh lac dom labik akaok meti dalam tinh padang harei jum pataom dom bangsa. Thun ini, dom labik ini peih ngak siam lagaih dom danak dak pakacah anit ranam taneh ia. Tal ini, daok tok 2 baoh sang kathaot, 20 baoh sang jaik kathaot; dom baoh sang gap mbiah, ginup meda dak harei dak rilo. Amuk Nguyễn Thị Lệ, Phaok akaok Uy mban mat tran Negar Viet Nam tinh Ninh Thuan ndom lac: bruk padang Harei nyaom roya ini hu njom mbak, ba mai bui sambai, chreih chrai saong jeng sa harei nyaom roya di dalam rahra.  

 “Mat tran tinh jeng peih ngak gam gam tal dom huyen piah pato tacei jalan ka dom labik rahra jeng peih ngak dom bruk ma-in, kak kajap pambuak gauk dalam labik rahra. meng nan, ba bruk jumpataom gauk, kak kajap anit ranam haong gauk ngan haong dom baoh sang dalam harei pataom ini, ngak ngak harei ini jeng lac harei bui sambai di dom labik rahra’

Dalam bruk bui sambai chreih chrai di Harei Jum pataom dom bangsa, dom urang pan angaok di tinh Ninh Thuan hu alin hadiah rilo paok pandap ka dom urang lambaok di Mban Ngak bruk Mat tran dom labik daok di rahra, dom baoh sang mbang tui sarak  saong mikva gaok kan kandah./.