Thun ini, ngan haong kadha “ Bhum taphia negar di taneh ia dahlak”, danak dak hu dam dara Cần Thơ pataom tame peih ngak 3 nyaom asar kadha: Nyaom jhul khang bruk pathau khan, pato pakai ka urang ndoan thau ka ilamo, hatai anit ranam taneh ia saong bruk ngak di dam dara ngan haong bruk ngak po taneh ia, salamat bhum taphia negar dalam tukvak birau; Nyaom dom bruk ngak dhar phor urang dahlau diah ngak bol lin, dom urang jakar, urang lin bien phong saong nyaom dom bruk ngak ka an sinh xa hoi. Đại úy Trần Văn Non, Bí thư đoàn cơ sở Trung đoàn Cảnh sát cơ động Tây Nam bộ brei thau:

 “Raidiuk di mikva daok di An Giang- lac sa dalam dom bhum taphia negar daok ralo kan kandah nan ye Trung đoàn Cảnh sát cơ động Tây Nam bộ saong Thành đoàn Cần Thơ palih ruah labik ini piah peih ngak danak dak“Bilan 3 bhum taphia negar”. Tapa bruk ngak nan, Trung doan saong Thanh doan jeng caong khin hadei ini hu rilo đơn vị mai tal ini daong ka mikva piah pak ini dak harei dak cakrok jang”

Meng sahaneng mboh lagaih haong bruk di anak meta, Hội Liên hiệp Dam dara  Việt Nam Ban Cần Thơ pambuak haong dom đơn vị di An Giang peih ngak danak dak “Truac hadah jalan tapen negar”, alin brei 20 baoh gom truac meng ia harei ka Đồn Biên phòng Vĩnh Nguơn; alin 100 hala dok Negar  ka bhap bini. Gam haong nan, kapol dam dara hu peih bruk iek ruak, brei jru ka yaok ratuh uranaih, urang taha..alin brei 400 paok pandap ka baoh sang kan kandah.

Meng angan iew “ Kadha caong khin ka adei”, 100 saih bac kham merat yam tapa kan kandah bac da-a naih joi di dom xã bhum taphia negar  tỉnh An Giang jeng hu taduan paok pandap bak hatai anit ranam. Adei Thạch Thuận, Sang bac tiểu học A Cần Đăng, huyện Châu Thành bui sambai khan lac:

“Anek hu taduan katap kadung bac, tapuk siphau. Urak ini, anek daok haong muk saong ame, sang anek kathaot lo, hu alin brei pandap anek biak uan tabuan”

Meda mboh lac, danak dak “Bilan 3 bhum taphia negar” lac bruk ngak biak siam brei mboh hatai ranam, bruk ngak di dam dara Cần Thơ ngan haong bhum taphia negar drei. Tapa danakdak, dom urang doan dam dara hu ba drei tame ngak, pasram megru, buh prein di drei daong ka bhum palei. Tapa nan, hu thau jang ka raidiuk di rahra labik jaik taphia negar, meng nan dak anit ranam saong iek praong bruk oh sahneng hagait tal rup drei dalam joa kandang di dom urang jakar, urang lin daok khik caga bruk ngak po taneh ia.

Tui sa-ai Phương Tấn Đạt, Yam ndoc Pasak daong anek saih - sinh vien Ban Can Thơ, pachreih tui bruk jak ba “ Hadah mbaok meta taneh ia palei negar” di Ban Bí thư Trung ương Đoàn dam dara CSHCM, kapol urang hu chào cờ ngan haong kadha “ Dahlak anit ranam taneh ia drei” di cot moc 265; nao rivang, pachreih ba, taom gaok urang jakar, urang lin Đồn Biên phòng; peih ngak dom danak dak “Daong ka dom adei anit ranam”…

 “Tuk mai tal ini meng mboh hu hatuang hatian di bhap bini biak iek praong bruk daong di Mban peih bruk. Dalam tukvak anak tal, khol dahlak brei peih ngak tui dom caong khin di palei, yau ye iek ruak, tacei pato iek glang prein yawa, abih di nyu nan lac caik hatai tal bhap bini bangsa daok di bhum tapen negar. Khol dahlak jeng peih ngak dom bruk khik caga halau ia, khik hacih alam moi truong; gam haong nan, khol dahlak jeng hu bruk ngak, jao brei ilamu ky thuat piah rik daong tame bruk ngak mbang duah jien ka mikva”. 

Yaok cambuai klao, meta hadah di mikva bhum taphia negar tuk taduan  hu dom paok pandap ndung bak hatai anit ranam nyu ngak brei medeih tagok hatai anit ranam taneh ia, bruk ba akaok nao dahlau, hadah krah, halan hatian daong ka bhap bini di dam dara bhum taneh Tây Đô. Gam haong nan, tapa dom bruk ngak hu pabak prein khang ka urang jakar, urang lin saong bhap bini labik taphia negar sahanang hatai ngak bruk, hu mbaok tame patagok kinh te, patruh eik patrun kathaot, ngak siam bruk padang ngak palei pala birau./.