Bein phun amriak kalu umo 8 thun praong labaih 2 ha di sang ong Lê Quang Cường daok di palei Phước Tiến, xã Hưng Phước, huyện Bù Đốp, thun pala 2022-2023 paik hu labaih 2 tấn. Thun ini meng hu langik lagaih saong  iek glang siam nan ye bein phun mariak kalu paik hu labaih 4 tấn. Tui ong Cường, bilan amriak kalu thun blaoh tuk amriak kalu tabiak bingu gaok hajan nan ye oh ndam baoh,  daok thun ini, langik lagaih nan ye baoh ndam rilo. Langiu di nan, bein mariak kalu di sang ong pala tui jalan huu co nan ye hu Kong ty TNHH che bien gia vi Nedspice Việt Nam blei veik haong yaom 105 ribau đồng sa kilo.

Ong Cường chreih chrai khan lac: “ Bilan pala thun ini, mariak kalu hu rilo asar jang bilan pala thun 2022- 2023, bo daok pablei hu yaom. Thun blaoh, bein amriak kalu takik baoh, yaom pablei tok 70 ribau đồng sa kilo, thun ini yaom glong jang 100 ribau đồng sa kilo. Urang pala amriak kalu thun ini biak chreih chrai kayua mariak kalu hu rilo asar, pablei hu yaom”.

 Daok bein amraik kalu labaih 1.300 got di baoh sang ong Trần Đăng Nhuệ daok di ấp Tân Bình, xã Tân Tiến, huyện Bù Đốp yaom lac yam tapa thun ka 13 min brei baoh glong jang thun dahlau labaih 8 tạ. Bilan amriak kalu thun blaoh, ong Nhuệ  pablei yaom 56 ribau đồng sa kilo, thun ini pablei hu 97 ribau đồng sa kilo. Brein mariak kalu di sang ong oh pala tui jalan huu co nan ye dom urang blei yaom biar jang. Yau nan min, ngan haong asar amriak kalu saong yaom nan thun ini daong ka baoh sang ong jeng yau dom urang pala amriak kalu  karei hu laba. Ini lac bruk bui sambai ka urang pala nyu.

Bilan amriak kalu thun ini, langiu dom baoh sang njauk amriak, hu yaom ye jeng hu rilo bein takik baoh. Kayua hadei di rilo thun yaom amriak kalu trun biar, dalam tuk yaom pandap kaya nong tagok glong, nan ye bhap bini oh iek glang tani tanat. Hu dom bein mariak kalu labaih 600 got min paik tok hu labaih 1 tạ, hu biak ralo bein amriak kalu klaak saoh. Tui yaok pataom di gah ngak nong huyện, tukvak tabung glong Bù Đốp hu tal labaih 4.000 ha, min urak dalam huyện tok daok jaik 3.000 ha bein amriak kalu.

 Ong Trần Văn Thành, Akok jabat Ngak nong saong Patagok palei pala huyện Bù Đốp brei thau, oh lac phun amriak kalu bo taong abih phun pala karei, yaom kaom darak pasar pambak khang tal bruk pala di mikva. Nan jeng lac bruk ba tal taneh pala amriak kalu trun khang dalam tukvak tapa.

Hadei di rilo thun amriak kalu takik baoh takik asar, laik yaom,  thun ini yaom daok tagok gilac veik daok ngak ka urang pala bui sambai. Urak ini hu biak rilo sang dalam huyện Bù Đốp daok rami ramik, pala veik bein amriak kalu. Sang sa-ai Hà Thị Lơi daok di palei Tân Nghĩa, xã Tân Tiến dahlau diah hu jaik 2 ha amriak kalu. Kayua tuvak atah yaom amriak kalu trun biar, oh iek glang bein nan ye phun amriak kalu thu taha saong metai jaik meteh taneh pala. Thun ini, amriak kalu brei rilo baoh, pablei hu yaom, nan ye sa-ai kuhria pala veik taneh phun amriak metai, gam iek glang buh khak phun amriak daok veik caong khin duah hu siam mekre dalam bilan amriak kalu thun tal.

Sa-ai Lơi khan lac: “ Sang hulin kak kajap haong phun amriak kalu jaik 20 thun, ini jeng lac bruk duah jien tame ka sang. Tukvak tapa, sang gaok ralo kan kandah kayua yaom amriak kalu biar, oh hu jien piah buh tame iek glang nan ye nyu metai ralo. Thun ini mariak kalu hu yaom, sang kuhria caga jien piah pala vek bein amriak kalu saong pacang ruak  siam piah hu rilo baoh rilo asar.

Ong Hoàng Đức Cảnh, Akok Kapol urang ngak nong xã Tân Tiến brei thau: urak ini xã daok Tân Tiến daok hu labaih 30 ha amriak kalu, dalam nan taneh pala amriak labaih 10 thun meblah jaik metah. Anak bruk amriak kalu daok hadah hadai veik, rilo sang pala amriak kalu daok caga pala veik. Yau nan min, piah plaik khat lahik, bhap bini meyah pala mariak kalu njauk palih ruah jalan ngak khang kajap, abih takik phun jien. Abih di nyu nan lac, brei pala meng phun jien hu dalam sang, oh nao duah mesre piah mblak tui gauk peih praong taneh pala./.