Dom tal bac ini, langiu di pato akhar haroh, daok hu pato dom adei ka jalan ngak menuac, ka ilamu meng kan di bangsa Khmer, gam daong ka dom adei hu labik me-in siam dalam bilan hè. Urang vak Sa Oanh hu kadha vak brei thau ka bruk nan:

 Tukvak ini, nao tal baoh baha Khmer halei di Trà Vinh jeng mehit sap bac akhar haroh yau ini. Dom adei mai bac akhar haroh Khmer dalam tuk padeih hè, rilo abih lac meng tal 1 tal tal 5. Langiu di bac akhar haroh, dom adei daok hu me-in bui sambai, taom gaok ayut sahabat dalam labik siam mekre, nan ye dom anaik ame sahanang hatai lo. Adei Kim Thi So Phai 4 thun ini mai bilan hè halei jeng tame baha Kom Pong Đung, xã Hiếu Tử, huyện Tiểu Cần bac akhar haroh. Adei khan lac, hè halei adei jeng likau amaik ame nao tame baha bac akhar haroh Khmer. Di labik ini adei oh lac hu bac akhar haroh bo daok hu taom gaok ayut  sahabat bahrau, hu me-in dom kadha me-in bhap bini. Urak ini, adei bac hu akhar haroh biak gheih min adei daok tui bac tra piah naih joi sap Khmer jang”.

Yaom lac tal bac hu peih dalam tuk padeih hè, dalam labaih 2 bilan, min dui pachreih hu biak rilo dom adei mai bac, saong thun hadei tuk halei jeng rilo jang thun dahlau. Thun ini baha Kom Pong Đung peih hu 5 tal bac meng tal 1 tal tal 5 saong hu 311 urang tui bac. Kadha ini brei mboh lac urang daok ranaih dak harei dak sangka jang tal akhar haroh vak, tal ilamu meng kan di bangsa drei.

Hè thun ini, tỉnh Trà Vinh hu 134 dalam 143 baha Khmer peih bruk pato pabak veik akhar haroh Khmer meng tal 1 tal tal 7, dui pachreih hu jaik 18 rabau anek saih tame bac. Piah pachreih ba, daong palagaih ka bruk bac ta-a hu siam jang, dom adei oh lac hu pato brei saoh, bo baha daok hu buh jien tabiak saong jak ba dom urang ngak pahla daong siphau, but, kalam ka dom adei. Langiu di bac akhar haroh, dom adei daok hu duah thau ka ilamu meng kan, ka adat cambat tanarakun di bangsa, hu me-in dom kadha me-in bhap bini ... Nan ye, dom labik baha tukvak ini daok lac mblang me-in, sinh hoạt hè kein laba ka dom uraniah, abih di nyu lac uranaih bhum palei pala. Đại đức Giang Thanh, urang dang akaok iek bruk baha Bãi Xào, xã Kim Sơn, huyện Trà Cú, lac sa dalam dom baoh baha hu rilo uraniah bac akhar haroh Khmer yaok thun tuk bilan hè, khan lac: Langiu di bac akhar haroh, dom gru daok hu pato dom adei ka đạo đức, ka jalan ndom puac, daok dang, thau akaok, thau iku, thau mangaok, thau mala … tui adat cambat di bangsa. Gam haong nan, daok hu pato dom adei thau ka ilamu, ka dom ragu tamia, daoh bhap bini, khan ao ngui cuk di banghsa… piah ka dom adei thau saong tapa nan khik ramik ilamu di bangsa drei.

Piah dak harei dak paglaong ilamu pato akhar haroh Khmer, Sở Pato Megru Trà Vinh bhian pambuak bruk haong Sang bac Đại học Trà Vinh peih tal pato pasram paglaong ilamu tui jalan di Mintri Pato Megru brei ka dom gru pato akhar haroh Khmer di dom labik baha. Dalam tuk nan, Mintri Pato Megru hu dang ngak saong patabiak dom baoh tapuk Ngữ văn Khmer meng Tiểu học tal THCS; bộ tapuk brei ka Sang bac Pabak ilamu trung cấp Pali  - Khmer meng tal 10 tal tal 12; bộ tapuk Ngữ văn Khmer ka anek saih phổ thông meng tal 1 tal tal 9; giáo trình lang, pato akhar haroh Khmer...Abih di nyu lac, dom ong bhik, Àcha – urang oh lac menuac mbang jien bilan di karja tuk tame pato akhar haroh Khmer di dom labik baha tuk hè hu tỉnh daong 35.000đ sa tiết pato. Amuk Nguyễn Thị Bạch Vân, Yam ndok Sở Pato Megru tỉnh Trà Vinh daok brei thau lac: “Bruk pato sap Khmer dalam baha, danak dak jeng hu dom À cha pato tui tapuk di Nhà xuất bản Giáo dục. Daok gah sarak, tỉnh Trà Vinh biak sangka saong hu patabiak Sarak daong 132 tiết bac dalam 2 bilan hè, yaom jien daong lac 35.000 đồng sa tiết. Langiu di nan, tỉnh daok hu daong jien blei tapuk, siphau ka dom adei”.

Meng lavik mai, bruk tame baha bac akhar haroh Khmer hu jeng bruk oh kurang hu dalam tuk padeih hè di dom uraniah daok di Trà Vinh jeng yau di bhum ĐBSCL. Tapa dom tal bac ini, meng gru tal saih jeng hu pabak ilamu, paglaong sap ndom, panuac puac, akhar haroh vak di bangsa drei. Ini lac bruk ngak biak siam, rik daong khik ramik ilamu bangsa Khmer./.