Bilan hè tagok baha, dom adei oh lac hu bac akhar haroh piah thau jang, piah mboh anit ranam jang sap ndom di bangsa drei, bo daok hu bac ka ilamu, ka adat cambat meng kan di urang Khmer, hu bac hukum di nhà Phật piah thau bruk suan, bruk njauk…Kadha vak di urang vak Thúy Ngọc.

Baha Tà Mơn daok di xã Viên Bình, huyện Trần Đề, tỉnh Sóc Trăng sa harei akaok bilan 6. Di labik praong, laneing taphia chánh điện, jaik 30 adei sit daok pasram bac sap Khmer, sap gru, sap anek saih sring tagok di sa binah baha. Anek saih dalam tal bac jeng lac anek kamuan di dom baoh sang urang Khmer daok dalam bhum, hu adei bahrau tame bac hu dua klau adit, min jeng hu adei hu bac meng thun bloh, saong thun ini tuk padeih hè mai bac veik. Adei Dương Triệu An, thun ini umo 14 thun jeng daok melau tuk gaok urang oh ka bhian randap, min ia mbaok adei hadah tagok bruk bui sambai tuk yaih khan ka bruk bac ta-a di drei: "Anek bac hu 1 thun paje. Anek thau  đánh vần, thau bac, thau vak akhar haroh Khmer. Kol anek caong khin hu rilo tal bac yau ini piah ka dom ayut di anek jeng hu bac."     

Baha Tà Mơn thun ini peih 4 tal bac saong hu labaih 150 anek saih tui bac. Dua - klau bilan dahlau di tuk padeih hè, baha hu tabiak panuac khan brei thau piah ka dom Phật tử hu anek oh ka thau akhar haroh Khmer ba anek mai bac. Dom tal bac bo baha peih tabiak lac pato brei saoh. Piah daong palagaih ka dom adei bac ta-a, baha brei sa labik praong, laneing, hu ginp kik, papan, bảng praong, kadik…. Dang pato lac dom tăng sư dalam baha, hu dom urang bahrau nao megru di negar langiu mai yau sư Kim Chí Thành. “Drei lac urang Khmer, drei brei thau sap Khmer” – nan lac makna praong abih ngan saong sư Kim Chí Thành tuk hu dang pato bac ka dom adei: "Thun ini baha peih meng tal 1 tal tal 3. Drei pato sap Khmer brei ka dom adei, pato vak chính tả. Tal bilan padeih hè dom adei tame ini bac sap di bangsa drei lac sap Khmer. Dom thun ini mai, hu Đảng, Karja sangka daong palagaih nan ye bhap bini brei anek tame ini bac rilo. Drei lac urang Khmer brei thau sap bangsa di drei".

Dreih yau baha Tà Mơn, dom anek saih tame bac dom tal bac sap Khmer di baha Prey Chop, xã Lai Hòa, ban sit Vĩnh Châu, Sóc Trăng jeng dak harei dak rilo jang saong thun ini hu labaih 100 anek saih. Dom tal bac hu parabha tui prein bac, lac: tal bac akhar haroh, tal bac puac, bac vak, glaong jang lac tal bac dom môn Văn, Lịch sử… meng sap Khmer. Piah ngak brei dom adei pachreih bac, taphia bruk pato akhar haroh, dom ong bhik dalam baha daok hu peih dom kadha me-in meng kan, tapa nan daong ka dom adei hu thau jang ka ilamu, ka adat cambat di bangsa drei. Sư La Sô Phép, urang dang pato di baha Prey Chop khan lac: "Sư pato thun ini hu  2 thun paje. Thun ini hu biak rilo, dom adei mai bac biak rilo.  Langiu di bac akhar haroh, drei daok hu pato ilamu, adat cambat tanarakun, jalan ndom puac daok dang, kayua dom adei jeng daok sit. Dalam tuk bac, daok hu peih bruk me-in sambai ka dom adei, piah gam thau ka ilamu meng kan di bangsa, gam ba chreih chrai ka dom adei bac ta-a hu siam jang."

Anek kamuan hu bac akhar haroh, bo daok hu bac bruk siam, bruk njauk, jalan ndom puac daok dang, nan ye bhap bini bangsa Khmer thei jeng bui sambai, pachreih tui dom tal bac di baha, tui nan dom anek saih tame bac dak harei dak rilo. Dom thun jaik ini, langiu di anek kamuan urang Khmer, daok hu urang Việt, urang Low tut angan tame bac. Thượng tọa Trần Văn Tha, urang dang akaok baha Tà Mơn brei thau: "Tuk bilan  hè tal mai, baha peih tal bac sap brei ka dom adei mai bac, piah thau akhar haroh di bangsa drei, piah praong tagok oh melau mbaok meta lac drei  urang Khmer bo oh thau sap Khmer. Drei daok haong dom bangsa adei sa-ai, ye bangsa drei jeng kham merat daong ka anek kamuan di bangsa drei".

Urak ini dalam tỉnh Sóc Trăng hu jaik 100 baoh baha Phật giáo Nam tông Khmer. Bruk pato akhar haroh ka dom adei sit tuk bilan hè mai tal, lac bruk hu dom baoh baha peih ngak dalam rilo thun ini mai. Karja tỉnh Sóc Trăng jeng biak sangka tal bruk ngak ini nan ye hu daong jien, jak ba mikva ba anek kamuan tame bac. Meng labaih 30% menuac sia lac urang bangsa Khmer, dom tal bac akhar haroh di baha daok rik daong tame bruk khik ramik sap ndom biai, akhar haroh, lac sa binah oh kurang hu dalam ilamu hadah krah di urang Khmer daok di Sóc Trăng./.