Maong tame raidiuk urak ini, saai Huỳnh Ngọc Tuấn (umo 42 thun, daok di phường Phú Lợi, ban Thủ Dầu Một, tỉnh Bình Dương) mboh lac yau ndih lipei. Atah di ini 16 thun, saai njauk bala jalan mbak, ngak lahik gu mata saong  meng nan sang saai biak kan kandah kayua nduac jru taong ruak ka saai. Hadei di sa tukvak pandik harao, saai kham marat padang veik raidiuk di drei. Tuk camriep, saai masaiy phun jien  brei ka sang kan kathaot piah blei limo mai palao raong, hadei di nan saai nao bac bruk xoa bóp, bấm huyệt. Hu bruk ngak dalam tangin, saai khang hatai masaiy 22 triệu đồng phun jien masaiy laba lap brei ka dom sang kan kathaot piah peih labik xoa bóp di urang sup meta. Meng hu tuai tani tanat, jien mek tame yaok bilan jeng tagok nan ye sang saai takik glaih glar jang. Saai Huỳnh Ngọc Tuấn brei thau, bruk salih mbaok meta di sang saai lac meng hu dom sarak daong di kanja: “Dahlak kuhria dalam 1 tal 2 thun anak tal, kham marat pataom phun jien  peih quan sit ka diuk pablei salih saong ba anek nao bac, tuk nan meda tabiak truh kan kathaot.Mayah hu brei ka sang kan kathaot,  sang jaik kathaot ye hu masaiy  glaong jang hasit piah mbuan buh jien tame ngak mbang pablei salih siam jang”

Di dom tukvak dahlau deih, Bình Dương sangka daong tapak ka sang kan kathaot, sang jaik kathaot yau ye padang bahrau, pasiam veik yaok ribau baoh sang jum pataom, daong pandap mbang, brei sổ tiết kiệm, pato bruk ngak oh mek jien. Min tukvak ini, Bình Dương salih tapa bruk daong hu điều kiện, hu biyar jien tapa bruk brei masaiy cak rok patagok kinh tế, brei ka anek saih, sinh viên masaiy. Ini lac jalan ngak salih ka bruk brei “drei ikan” tapa brei  “gai vah” piah paglaong jalan saneng ka bruk ngak, pamedeih tagok hatai kham merat eng drei yam tapa kan kandah piah tabiak truh kan kathaot khang kajap di dom baoh sang kan kathaot.  Jeng meng hu sarak ini, rilo urang kan kathaot di Bình Dương hu tabiak truh kan kathaot khang kajap, oh daok sang halei kan kathaot veik.

Langiu di bruk daong meng jien padai, pandap panda ye bruk pachreih hatai jeng lac jalan ngak hadah krah di Bình Dương. Tapa dom bruk ngak yau ye “sa urang jakar tacei ba sa sang kan kathaot”, “ urang jakar, urang đảng daong ka sang kan kathaot”…., urang jakar, urang đảng bhian sua tangi, klaah rabha, pachreih sang kan kathaot kham marat ngak mbang yam tapa kan kandah, yam tagok tabiak truh kan kathaot. Bình Dương jeng hu pasang iek, ba sang kan kathaot oh daok prein ngak bruk tame angan hu mbang jien daong yaok bilan piah ka dom sang ini hu jalan diukrai siam jang. Ong Trịnh Đức Tài, Yam ndok Sở Lao động-Thương binh saong Xã hội tỉnh Bình Dương brei thau:“Karja palei jeng hu rilo jalan ngak, pachreih ba urang kan kathaot kham marat saong ba mbuan lagaih di abih. Gah Lao động-Thương binh saong Xã hội jeng hu pato tacei ngak habar piah ka karja palei, dom kapul nyaom, mặt trận pachreih ba saong hu dom jalan ngak khang jang piah ka urang kathaot kham merat,  abih di nyu nan lac dom urang hu prein yava khang kadang piah kham merat yam tagok tabiak truh kan kathaot”

Meda mboh lac, dom jak jeng dalam bruk patrun kathaot di Bình Dương mai meng  thau ngak siam sarak, sahneng duah dalam jalan ngak, min praong di baih jeng lac bruk jak ba, pathau khan paglaong hatai saneng saong ngak ka bhap bini khang hatai yam tagok tabiak truh angan “sang kan kathaot./.

Urang lang: Thu Thảo