Tui dak pak, Binh Duong pok yam tal bruk jeng sa ban daok dalam pakat nagar di thun 2030, jeng pasak kinh te lagaih, bahrau di Asia – Tenggara labik Dong Nam A. Piah mek hu bruk ini, meng thun 2019, tinh hu peih ngak sarak panduol dom gah ngak mbang pablei salih daok di langiu labik, kapul labik tame dom labik ngak kong pataom, piah jhul tagok gah ngak kong, pabahrau saong caik kadung jien taneh ka bruk pablei salih, yitvu, jeng banriya do thi.

Bruk panduol ini hu ngak pambuak tal yaok ribau urang ngak mbang pablei salih hu buh jien tame meng lavik mai di langiu labik, kapul labik, ngak tabiak dom bruk duh hatai oh sit ka jien padai, urang ngak bruk saong bruk ngak mbang.

Tui ong Vương Siêu Tín, Phaok Akaok Kapul lan am meng sứ tinh Binh Duong, urak ini, dom gah ngak mbang pablei salih bahrau rah tapa kan daman kayua jit ruak Covid-19, anak meta bahrau pakaro tani tanat ka ngak mbang pablei salih yau nan ye daok duh hatai ka bruk panduol nao labik karei. Gah ngak mbang pablei salih ba tagok panuac likau tinh maong iek veik, hu sarak ka njauk lagaih piah daong saong samar khan ka dom gah ngak mbang pablei salih brei panduol nao. Ong Tín patui ndom mayai lac: "Khol dahlak hulin caong khin hu pilih ruah labik hu pambuak haong jalan mbak, taneh hu jien buh tame siam abih. Kayua rilo meng lac gah ngak mbang pablei salih dalam Kapul lan sứ daok gaok kan kandah. Dom gah nan sangka tal bruk taneh urak ini di dom gah nan brei hu pandar yau habar, hu sarak salih taneh daok atau brei mbaoh tangin ka bruk pablei taneh, ngak bruk karei piah hu jien panduol atau oh”

Amuk Phan Lê Diễm Trang, Phaok Akaok Kapul jhik Binh Duong, jeng brei mboh duh hatai yau nan. Amuk brei thau lac gah ngak mbang pablei salih biak njauk hatai haong jalan ngak di tinh ka bruk panduol, min brei hu sarak daong ka cambaih laih, njauk lagaih. Tui amuk Trang, asal kadha ka bruk ngak lac bruk njauk sangka iek praong abih tuk panduol nao.

"Langiu bruk kham merat di gah ngak mbang pablei salih, khol dahlak hulin caong khin hu bruk buh jien tame suai atah meng dom gah, dom labik piah urang ngak daok pambuak bruk haong Binh Duong. Khol dahlak hulin mboh lac brei hu rilo gah buh jien tame jang dalam dom gah y te, pato megru, daok dang, me-in. Piah ngak hu bruk ini, dom jabat karja tinh brei hu sarak dui pachreih buh jien tame, ka hu kein lagaih”.

Tui urang pan akaok di tinh Binh Dương, bruk panduol salih dom labik ngak mbang tame labik, kapul labikn gak kong oh cap ngak, bruk brei tui hatai. Bruk ngak ini daong ka urang ngak mbang blei salih pasiam padang bruk ngak, pakaro ngak patabiak ndap nda atah dhua jeng ye brei caga alam langik tasik.

Urang dang akaok tinh ndom mayai lac, dom gah ngak mbang pablei salih hu brei adat, pah taneh daok harei pandar ye brei peih ngak bruk, ngak tui njauk adat hukum ka alam langik tasik, caga apui khuah, dak padang tui bruk peih ngak. Bruk Karja mek taneh, gah ngak mbang pablei salih brei hu bayar jien hu lagaih hatai.

Ong Võ Văn Minh, Akaok UB Bhap bini Binh Duong janji sinya lac, bruk panduol nao brei hu jalan cambaih laih, sarak daong tantu, khik kajap samu kein lagaih di urang ngak bruk, gah ngak mbang pablei salih haong Karja. Urak ini, Binh Duong hu dak padang 8 labik ngak kong haong di mblang taneh labaih 5.840ha. Dom labik, kapul labik bahrau jeng hu buh jien tame ka ha tang jalan mbak saong xa hoi samu yau gauk, urang ngak bruk. Ong Minh patui ndom veik:

 “Karja tinh dang kuhria ka taneh, dom labik, kapul labik ngak kong, mai ini brei hu mbang tui yaom lap jang dut haong yaom di darak pasar, tui jalan tinh brei pandar gah pabak ha tang (po buh jien tame labik ngak kong) brei mek trun jien meng 15-30%, meng nan brei kein lagaih ka gah ngak mbang pablei salih panduol meng gah Meraong tagok. Langiu di nan, brei kein lagaih ka gah buh jien panduol nao ye taneh di gah nan hu mbang tui pandar taneh tui dak padang quy hoach”

Hadei di tuk ngak iek dahlau, tinh brei peih mbang nyaom biai saong mek hu ilamo meng bruk ngak iek dahlau nan, khik kajap bruk samu kein lagaih di gah ngak mbang pablei salih, urang ngak bruk saong jalan patagok saong gauk. Bruk ini daong ka gah ngak mbang pablei salih sahnang hatai truh tapa tukvak pasalih pandol, rik daong padang Binh Duong patagok karo kajap./.