Rilo DN daalm tỉnh mai rivang brei pandap tet ka urang ngak 

Di Công ty TNHH Apparel Far Eastern Việt Nam (Labik ngak cong Việt Nam - Singapore VSIP1) tỉnh Bình Dương, dom harei tapa, mboh urang ngak bruk sami samar jang dahlau di tuk yam tame mbang padeih  Tết Nguyên đán. Labaih 3.000 urang ngak dok ngak bruk dalam chreih chrai, bui sambai.

Ong Đặng Quang Duẩn, Akaok  Công đoàn Công ty brei thau,  dalam mbang jit meng bloh, hu  4 urang ngak di Cty metai kayua  COVID-19, tapa nan, Cty samar hu dom sarak dong  ka boh sang, klah rabha meneing bruk pandik harao nan. Kayua jit ruak  COVID-19 dui atah  ngak brei doanh nghiệp padeih ngak, rilo urang ngak njauk  COVID nan ye bruk ngak klaih klaoh. Yaom lac yau nan, min Công đoàn cty jeng kham merat khik bruk thưởng Tết yau yaok thun brei ka urang ngak . Langiu di nan, cong ty dok bayar jien radaih pasei ka gauk gar di urang ngak, meyah urang ngak mai ngak bruk njauk tuk vak song ba tui gauk gar mai ….Công đoàn daok hu brei dom pandap panda ka urang ngak. Ong Đặng Quang Duẩn daok brei thau lac:

Jien phúc lợi thun ni  tagok jang thun bloh  30-40%, kayua urang ngak dok veik mbang tết rilo, ye drei njauk kuhria caga siam jang. Oh trun takik bruk ngak min salih jalan ngak, oh peih ngak langiu mblang bein main  sambai, ye thun ni kayua jit ruak, hu salih tapa dom bruk brei jien ndo, pandap panda ka urang ngak .

Tui kuhria mboh dahlau,  dom urang ngak thun ni dok veik  Bình Dương mbang Tết Nguyên đán tagok glong dut song yaok thun, hu labaih  500.000 urang ngak, dalam nan hu 24.000 urang hu rai duik biak kan kandah . Muk Nguyễn Hoàng Bảo Trân, Paok akaok  Liên đoàn Lao động tỉnh Bình Dương brei thau, ngan song dom urang ngak kan kandah ni hu dong  500 ribau đồng sa urang. Công đoàn brei buh tabiak labaih  190 tỷ đồng jien mbaok dong ka jiak  640 ribau urang ngak, yaok urang taduan hu  300 ribau  đồng. Kayua jaik abih urang ngak dok veik tuk Tết, công đoàn tỉnh oh peih bruk brei radaih pajeng ba nao palei yau yaok thun bo caik jien nan dong ka urang dok veik, ngan song pok jien tui kuhria lac 200 tỷ đồng dong ka urang ngak kan kandah.

Langiu di nan, công đoàn jeng hu dong ka dom boh sang hu gauk gar metai lihik kayua  COVID-19. Dalam nan, 160 uranaih metui kayua jit hu brei yaok adei sa  sổ tiết kiệm 10 triệu đồng. Dom urang daok dalam dom labik sang  trọ hu dong  5 triệu đồng blei pandap Tết:

Kol dahlak  jeng hu daa dom boh sang hu gauk gar  metai kayua  COVID mai bui sambai tuk tết. Khol dahlak dok hu caik tabiak sa pok jien bo khol dahlak nao jak ba ieu pataom piah brei ka dom boh sang hu gauk gar metai piah ramik veik sang danaok ka urang mboh bui hatian.

Anak dom kan kandah trak damak  di jit ruak COVID-19 tal rai duik, bruk ngak, jien duah hu di urang ngak, dom doanh nghiệp, dom pakat  công đoàn di Bình Dương urak ni hu caga ginup danak dak, jalan ngak, kuhria caga Tết ka đoàn viên song urang ngak, tui jalan ngak lac “Tong abih đoàn viên song urang ngak jeng hu mbang tết”./.

Urang lang: Hanipha- 19/1