Ini jeng lac sa dalam 4 danak dak salih bahrau khang bo Nyaom roya Đảng bộ tỉnh Bình Dương mbang ka 11 ba tabiak dalam tukvak 2020-2025, pamaong tal thun 2030. Thiên Lý, urang vak di rayo sap ndom VN daok di TP.HCM hu kadha vak ndem ka bruk ini:

Hadei di jaik 1 thun padang ngak, tatua cầu vượt di labik nút giao 550 angaok jalan ĐT.743, labik nao tapa ban Dĩ An saong ban Thuận An, tỉnh Bình Dương hu brei radaih nduac. Tatua atah labaih 203m, praong 4 jalan radaih, yaom padang ngak labaih 115 tỷ đồng. Nút giao 550 lac labik pambuak haong rilo labik ngak kong dalam tỉnh, lac labik tabiak nao Đồng Nai, TP.HCM nan ye bhian njauk gar radaih. Kayua yau nan ye, bruk ba tame pandar tatua cầu vượt meda daong ngak pasiam bruk nao mai di labik ini.

Ong Lê Văn Hựu, sa urang bhian nao tapa jalan ini brei thau: “Dahlau deih, di labik ini dalam rilo thun tapa bhian gar radaih, jalan. Bruk gar radaih nyu ngak kan kandah oh sit tal bruk nao mai dalam bhum. Tuk tatua ini hu ba tame pandar, khol dahlak mboh bruk salih biak cambaih laih saong bruk gar radaih di labik jalan ini oh daok rahtabiak".

 Chreih chrai, uan tabuan nan lac bruk di rahra saong doanh nghiệp dalam tỉnh Bình Dương tuk jalan ĐT.746 labik meng canah klau Tân Thành (huyện Bắc Tân Uyên) tal canah klau Hội Nghĩa (ban sit Tân Uyên) hu padang ngak, peih praong meng 2 jalan radaih tagok 6 jalan radaih, atah 11,4km. Amuk Trương Thị Minh Trang, sa urang daok di khu phố 5, phường Hội Nghĩa khan lac: “Mayah jalan ini ngak salah khu phố 5 meda samu haong dom khu phố karei di phường Hội Nghĩa, kayua dahlau deih tal urak ini khu phố oh cak rok patagok samu kayua jalan mbak nao mai oh tagok samu”.

Jhul khang bruk cak rok patagok jalan mbak dalam tỉnh, Bình Dương daok patui bruk peih ngak danak dak BOT paglaong, peih praong jalan Roya 13; Danak dak ba mbaok meta gheih ghang, pacang gar radaih di jalan Mỹ Phước-Tân Vạn; ngak salah jalan Bắc Tân Uyên-Phú Giáo-Bàu Bàng; paglaong pasiam dom jalan ĐT.746, ĐT.747B, ĐT.743. Jhul samar bruk peih ngak dom danak dak jalan mbak, urang par akaok tỉnh Bình Dương hu pato tacei padang ngak saong khik ramik dom kapul ngak bruk, tui iek, tacei pato peih ngak dom danak dak jalan mbak praong.

Piah ngak jeng prein khang ka bruk cak rok patagok dom Bhum, Bình Dương jeng daok pataom prein peih ngak dom danak dak, yau ye: Vành đai 3, Vành đai 4, jalan cao tốc TP.HCM-Thủ Dầu Một-Chơn Thành; pambuak haong dom tinh, ban peih ngak danak dak tatua Bạch Đằng 2 pambuak haong Bình Dương-Đồng Nai; paglaong tĩnh không tatua Bình Triệu 1 di kraong Sài Gòn pambuak haong TP.HCM...

 Ong Võ Văn Minh, Akaok UBND tỉnh Bình Dương brei thau, piah hu phun jien buh tame padang ngak jalan mbak nao mai, Bình Dương daok pandar biak rilo jalan ngak:  “Tỉnh meda pataom jien mek tame tapa bruk pasang iek, to yaom dom taneh di kanja, cak rok patagok dom labik đô thị, labik daok di bhap bini rah tui dom jalan, tapa nan mek tame sa paok praong ka jien pandar taneh, pabak gilac veik ka bruk buh jien tame, padang ngak hạ tầng.”

Meng dom danak dak jalan mbak daok ngak jaik salah oh lac ngak brei salih bahrau mbaok mata đô thị di Bình Dương, lang talaih dom labik gar tavak dalam cak rok patagok kinh tế xã hội di tỉnh, bo daok samar jhul patagok bruk pambuak gauk dalam cak rok patagok di bhum kinh tế Đông Nam Bộ./.