Dom thun tapa, Bình Dương hu rilo jalan peih ngak hu siam Danak dak “yaok xã sa pandap (OCOP)". Tal urak ini, di dalam tỉnh hu 47 pandap mek hu 3 patuk saong 4 patuk. Hadei di tuk hu pok brei angan OCOP, dom pandap panda hu lagaih piah pablei hu siam jang saong jien mek tame di urang nong, doanh nghiệp jeng hu tagok jang. Thiên Lý, urang vak di rayo sap ndem Viet Nam daok di ban raya HCM hu kadha vak ndem ka bruk ini, da-a mikva saong taong abih gauk tui pang:

Meng labaih 30 thun hu ilamo ngak pandap panda y tế, Labik ngak pandap cơ y hoá di phường Tân Phước Khánh, ban sit Tân Uyên caong hu rilo jang pandap panda siam ka prein yava angan Bình Dương nan ye hu roh duah, raong pala bimau đông trùng hạ thảo. Hadei di 4 thun, tal urak ini Bimau đông trùng hạ thảo CYH saong Alak đông trùng hạ thảo CYH hu rilo urang blei pandar jia tame. Thun 2021, dua pandap ini mek hu tanut chuan OCOP 3 patuk pakat tỉnh saong bahrau ini hu Mintri ngak nong saong patagok palei pala pok brei Angan Ameh di gah ngak nong Việt Nam 2022. Ong Lưu Nguyên Quảng, Yam ndok Labik ngak pandap cơ y hoá brei thau lac pandap di công ty hu mbaok di grauk dom tỉnh, ban dalam taneh ia: 'Tal urak ini, dom pandap di đông trùng hạ thảo CYH meda yam tabiak atah jang, hu rilo janih pandap duh ka mikva, daong patagok prein khang pacang ruak, khik caga prein yava di urang pandar."

Meng bruk ngak trại tổng hợp saong pabak pandap ngak nong, thun 2012, amuk Tăng Thị Hằng daok di xã An Long, huyện Phú Giáo peih bruk raong cim yến. Tal urak ini, 3 sang yến praong labaih 1.600m2 yaok bilan mek hu labaih 15kg sruh yến tamo, haong yaom pablei meng 20-22 triệu đồng/kg, jien mek tame labaih 3 tỷ đồng sa thun. Thun 2019, pandap Tổ yến Hiếu Hằng di công ty mek hu angan lac pandap puk palei angan je di tỉnh Bình Dương, tal thun 2021, mek hu angan lac OCOP 3 patuk pakat tỉnh. Tui amuk Tăng Thị Hằng, piah mek hu angan ini, dom jalan ngak meng di tuk pataom mek tal tuk ngak tabiak brei khik kajap salamat, hacih saat:  " Tuk halei jeng ba chất lượng yến tagok dang akaok, taong abih lac nguyên chất, oh pandar janih jru khik piah. Yến lac “pandap ameh” nan ye jeng ngak tui njauk “chất lượng ameh"

Tal urak ini, Bình Dương hu 47 pandap mek hu angan OCOP di 31 menuac urang, kapul nyaom, dalam nan hu 8 pandap 4 patuk, daok veik lac 3 patuk. Dut saong dom pandap panda kaya nong, langiu bruk ngak nong dalam tỉnh ye dom pandap hu pok brei angan OCOP daok biak takik. Ong Phạm Văn Bông, Yam ndok Sở Ngak nong saong patagok palei pala Bình Dương langyah lac, pak ini iek praong chất lượng nan ye dom bruk pasang iek, taong yaom biak catang: "Hội đồng pok brei angan hu pato tacei dom puk palei, abih di nyu nan lac pathau khan, jak ba rilo mbang di dom jalan khau tin piah ka urang hu mbaok tame pok brei angan OCOP thau cambaih bruk ini saong peih ngak dom adat. Kayua yau nan ye, dom pandap mek hu OCOP di dalam tỉnh Bình Dương yaom lac biak takik min chất lượng siam." 

Gam haong bruk ba mbuan lagaih piah ka dom pandap mek hu harak brei angan, Bình Dương hu rilo danak dak peih ngak bruk pablei salih saong yaih khan, daong ka dom pandap OCOP pablei hu siam tapa bruk pandar công nghệ thông tin, yaih khan di mangaok dom blah web pablei salih điện tử; padang labik parang pandap saong pablei pandap panda OCOP; pambuak haong dom siêu thị, sang pablei salih piah ka urang nong, hợp tác xã, payua pablei pandap panda. Bahrau ini, UBND tỉnh Bình Dương peih mbang darak pasa yaih khan “Bình Dương EXPO 2022” ngan haong labaih 100 gian hàng yaih khan dom pandap OCOP. Amuk Phan Thị Khánh Duyên, Phaok Yam ndok Sở Công Thương tỉnh Bình Dương brei thau lac:  “Tapa EXPO thun 2022, Sở Công Thương caong khin bruk pambuak gauk pablei salih dak harei dak hu peih praong, ba mbuan lagaih ka doanh nghiệp, hợp tác xã, labik raong glang pambuak gauk, pablei pandap panda hu siam di abih. Anak tal EXPO Bình Dương daok hu peih praong jang”

Tui jalan ba tabiak, tal thun 2025, Bình Dương hu 109 pandap OCOP tui dom nyaom praong saong hu prein khang yau ye nyaom pandap mbang, pandap manyum, jru tavao, pandap khik piah, ngak gheih, dịch vụ du lịch rahra saong labik du lịch. Dom kapul, dom tinh, ban daok kham marat padang dom jalan ngak tui tanut chuan VietGAP, HACCP, ISO... ka dom pandap hu mbaok tame taong yaom parabha tanut, paglaong pandap OCOP./.