Daok kreih bhum ceik glaong tinh Kon Tum, huyen Kon Plông glaong meng 1.200 - 1.500m dut saong tanut ia tasik, lac sa bhum taneh la-an luac thun hu langik kuhria rah tapa meng 18 - 22 độ C, ngak jeng labik siam ka phun pala ciuk la-an, abih di nyu nan lac phun kaphe Arabica. Ong Lê Nhật Tiến, Phaok yam ndok hop tac xa Măng Đen Forest, huyen Kon Plông brei thau, yaok thun hop tac xa ngak tabiak labaih 100 tấn kaphe arabica. Labik ini hu 5 pandap kaya ngak meng kaphe daok hu pablei dalam darak pasar, mek hu angan OCOP 3 tal 4 patuk.

 “OCOP daong ka hop tac xa thau tani tanat jalan ba pandap kaya meng camereip tal tuk tabiak darak pasar piah ka pandap kaya hu siam gheih abih. Langiu di 25 hec-ta hop tac xa daok pala bahrau saong sangka ye hop tac xa caong peih praong bhum pandap kaya tamo, anak meta lac mbaoh tangin tame harak pambuak bruk haong yaok baoh sang saong pagun sanya bruk pablei tabiak ka yaok baoh sang. Meng akaok meti hop tac xa hu jalan ngak ba dom yaom glaong ilamo di mikva bangsa Mơ Nâm tame pandap kaya di drei nan HTX hu pagam craok thaik hala bingu di urang bangsa Mơ Nâm tame pandap kaya.”

Kong ti Co phan Pyloherb gah pala, blei saong ngak tabiak pandap kaya jru di huyen Đắk Glei  saong huyen Kon Plong, lac labik mek hu 15 angan je OCOP di tinh Kon Tum. Amuk Lê Thùy Kim Loan, Pajum abih yam ndok Kong ti Co phan Pyloherb, brei thau: hu mbaok tame danak dak OCOP, gah ngak mbang pablei salih taduan hu bruk daong di karja palei tapa dom sarak ka taneh riya, meng nan padang bhum pandap kaya tamo tui bruk pambuak talei, buh jien tame bruk ngak tabiak thaik thaot siam gheih piah pandap kaya mbuan tame dalam darak pasar:

 “OCOP lac harak brei adat di pandap kaya hu angan je dalam bhum taneh biak glaong. Drei maong tame harak brei adat OCOP ye drei mboh pandap kaya di drei ndung bak ilamo bangsa dalam bhum palei. Janih jru siam glaong, urang ngak di bhum palei, ngak tabiak di bhum palei saong pandap kaya tamo di bhum palei. Taong abih jeng ngak hu bruk ndung bak thaik thaot di bhum taneh lac biak glaong. Tem OCOP bo hu pabak di tinh Kon Tum ye hu ndung bak thaik thaot pandap panda di bhum Kon Tum ini paje.”

 Huyen Kon Plông lac sa dalam 4 bhum palei hu pandap kaya OCOP rilo abih dalam tinh Kon Tum, hu 68 pandap kaya. Biak rilo pandap kaya nong hu darak pasar njauk hatai yau: pluai Japon, bắp sú, traong ndaiy, dâu tây, kaphe bhum la-an Măng Đen, tapung sâm đương quy, ia jalako tagok tapai, ia baoh kayau tagok tapai, tapung sâm dây tagok tapai v.v…  

 Ong Đặng Quang Hà, Akaok Uy mban bhap bini huyen Kon Plông brei thau, dalam tukvak anak tal, huyen brei padang dom pandap kaya OCOP tui jalan yaok pandap kaya lac sa bruk lambaok, khan dom kadha ndom ka bhum taneh, langik tasik saong menuac di ini:

 “Huyen jeng daok pataom tame prein daong yaok thun yau nan, ramik prein daong meng danak dak jalan ngak negar piah daong patagok, abih di nyu nan lac pataom tame padang dom pandap kaya OCOP dalam gah hu kein lagaih lac kaphe bhum la-an saong taiy. Ini lac 2 gah bo huyen caik dahlau piah ngak tabiak pandap kaya hu yaom glaong saong hu angan dalam darak pasar.”

Siam lagaih ba mai meng danak dak OCOP hu daong tinh Kon Tum ngak madeih kein lagaih dom pandap kaya di bhum palei, daong ngak pasiam veik gah ngak nong pagam haong patagok bruk ngak kong sit dalam baoh sang di drei saong yutlit dalam bhum palei; jhul tagok kinh te dalam bhum palei hu patagok, daong padang palei pala bahrau nao tame dalam, siam lagaih saong khang kajap./.