Gah  Y tế di  tỉnh Bình Dương hu ba tabiak rilo jalan ngak piah pacang caga song pasang iek jit ruak 

Yaok harei khoa Nhiễm, Sang iek ruak  Đa khoa tỉnh Bình Dương hu taduan meng  70- 90 urang ruak meng dom sang iek ruak sit gah mala ba tagok. Urang ruak tame sang iek tagok, yau nan ye, kapul  y bác sĩ njauk ba abih pren yava di drei tabiak ngak, oh caik ka ruak trak tagok.

Tui  bác sĩ Phạm Anh Tuấn - Akaok khoa Nhiễm, Sang iek ruak Đa khoa tỉnh Bình Dương, tuk mboh urang ruak gleih glar, taglaoh ta- ok, pandik tain, dok pandiak glong bloh trun pandiak chip, aik chraoh, sraiy darah tagei, sre  drah dhung, urang kamei ye sre drah âm đạo… rilo urang ruak, eng drei nao blei jru menyum. Hadei di rilo harei, oh abih ruak meng nao tal sang iek ruak, ye tuk nan, ruak trak jang, biak kan kandah saong mbuan metai. Bác sĩ Phạm Anh Tuấn hu panuac kakei lac: “Tuk kol drei pandiak hu ginup dom triệu chứng, ye brei nao iek ruak song samar tame sang iek ruak. Abih di nyu nan lac dom urang labaik kilo, limek, urang hu ruak dalam rup… ye ruak mbuan trak tagok. Ruak trak, daok kayua dom jalan tong ruak suan, oh ngak tui jalan iek ruak pandiak tabiak drah di Mintri Y tế”.

Meng labaih 1.100 urang njauk ruak dok jiak 200 sruh jit, dalam nan hu  5 urang metai, ban Dĩ An jeng labik "pandiak" di  Bình Dương ka urang ruak pandiak tabiak drah (SXH).  Njauk caik hatai lac, meyah dom thun dahlau, urang ruak rilo meng lac uranaih, ye thun ni mboh rilo di urang prong. 

Bác sĩ Lê Thị Thu Hảo – Phaok Yam ndok  pasak Y tế Dĩ An brei thau, piah samar pandam jit, tuk mboh hu sruh jit, urang jakar  y tế hu peih bruk langyah, pruh jru pametai anek ruak, oh caik ka nyu njom mbak. Taphia di nan, Pasak hu caga ginup  jru tavoa, pandap y tế…, piah tong ruak ka dom urang ruak trak: “Pasak Y tế Dĩ An hu 1 khoa nhiễm tong ruak kan kandah, yau pandiak tabiak drah, tangin takai cambuai. Bác sĩ hu pabak ilamu gam gam ka phác đồ tong ruak pandiak tabiak drah. Tong abih bhap bini njauk pandiak, mai tong ruak di sang iek ruak hu  sàng lọc pandiak tabiak drah. Tuk urang ruak mboh yau njauk ruak ye hu tame sang iek ruak piah tui iek , oh caik ka ruak trak di sang, piah trun bruk metai lahik.”

Kuhria tal puac bilan  6 meng bloh, Bình Dương hu labaih  6.500 urang ruak pandiak tabiak drah, jiak 1.180 sruh jit  song  8 urang metai. Piah patrun urang ruak, Bình Dương kham merat pathau khan tal bhap bini paglong akaok sahneng pametai lăng quăng song puh ramik sang danaok, labik daok. 

Tui  Tiến sĩ Nguyễn Hồng Chương, Yam ndok  Sở Y tế tỉnh Bình Dương, Pandiak tabiak drah lac ruak mai meng virus, min , makna prong lac mbak meng menuac ruak tapa menuac siam, kayua jamuk kaik. Nan ye, piah pacang caga ruak hu siam lagaih, yaok rahra brei paglong hatai sahneng, eng drei pacang caga, ngan song kadha “oh hu lăng quăng, oh hu pandiak tabiak drah”: “Pandiak tabiak drah oh lac ta-eng gah  y tế pacang, bo abih hệ thống karja, kapul nyaom gam pacang song prong di abih lac, bhap bini brei pacang meng  pandam hu jit . Akaok sahneng di kol drei dok iek lap, nan ye, hu panuac kakei bhap bini ba tangin tame pametai lăng quăng, taom dar sang oh caik ka glut baok, ia kandong veik. Dom labik halei hu  lăng quăng lac njauk pametai, kayua ni lac gha di pandiak tabiak drah.”

Pasak pasang iek ruak kik  tỉnh Bình Dương kuhria mboh lac, jit pandiak tabiak drah dok rah tabiak srau kadau, kayua urak ni dok tame tabung glong bilan hajan. Sa dalam dom sruh jit kan langyah, lac di dom labik sang trọ rilo urang ngak, sit giniuk song sup palup. Kayua yau nan ye, piah dui patrun dom urang ruak pandiak tabiak drah, gam song bruk pathau khan tal bhap bini, urang ngak dok trọ brei gam gam pasang iek, hu panuac kakei, tong phạt, meyah urang halei khin "rong" jamuk piah tamuh jit ruak./.

Urang lang: Hani Pha – 12/07