Cakrok khang kajap tui jalan đô thị hadah krah, văn minh, bahrau

Meng sa tỉnh hu jien mek tame bier, hadei di labaih 20 thun, GRDP  kuhria tui akaok manuac di Bình Dương daok di tanut jien mek tame kuhria rah tapa glaong: 7.000 USD sa urang sa thun, samu haong Thái Lan. Bruk ini jeng hu makna lac mbuan gaok njauk “bẫy thu nhập trung bình” di Bình Dương meda aval jang dom tinh, ban karei dalam taneh ia. Tui ong Phạm Ngọc Thuận, Tổng yam ndoc Tổng Công ty Becamex IDC, yam tapa cuang kandah nan saong jeng bhum taneh hu jien mek tame glaong oh njauk lac kadha cak rok patagok kinh tế, bo daok lac sa kadha pasang iek gah ilamu khik ramik di Bình Dương. Kayua yau nan ye, Bình Dương njauk samar salih bahrau bruk patagok, pataom tame cak rok dom hệ sinh thái kiểu bahrau, hệ sinh thái công nghiệp thông minh, mek bruk salih bahrau saong ilamo công nghệ ngak prein pachrieh tagok, mek bruk patagok manuac ngak hu chất lượng glaong ngak pasak.

Tui GS.TS Trần Thọ Đạt – akaok Kapul ilamo saong pato pakai, Sang bac Đại học Kinh tế quốc dân, caong yam tapa cuang kandah “bẫy thu nhập trung bình”, Bình Dương njauk duah tabiak dom bruk patagok bahrau, jalan patagok bahrau, ba mai năng suất glaong jang. Sa dalam dom prein khang cakrok bahrau, tui samu haong bruk di saman bahrau, nan lac patagok kinh tế số, meda lac prein pachreih patagok di Bình Dương.

PGS.TS Trần Đình Thiên, dahlau daih lac akaok Viện Kinh tế Việt Nam ndom lac, meng hadei di tuk neh tabiak meng tỉnh Sông Bé, Bình Dương hu 2 salih bahrau praong, nan lac padang ngak labik ngak kong Việt Nam – Singapore (VSIP) tui jalan bahrau, siam mekre, hadah krah. Ini lac bruk sahneng duah patagok hu makna praong meng bruk pambuak gauk di Việt Nam haong Singapore, hu peih ngak biak aval, hu mboh lac sa bruk ngak hu jak jeng. Bruk salih jalan cak rok patagok di Bình Dương hu ngak jeng bruk salih bahrau khang, praong. Min, Bình Dương ngan haong dom salih bharau “nao hadei bo mai dahlau” , ngak hu dom jak jeng, min gam haong nan, lac bruk mbuan gaok labaih kurang, rilo bala: “ Bình Dương njaiuk nao dahlau dalam bruk pok panuac tagok Trung ương njauk hu sarak, mayah oh hu, sa drei Bình Dương biak mbuan gaok bala. Brei hu sa bruk pambuak prein, pambuak gauk. Bình Dương oh njauk nao sa drei jar”.

Dalam tuk nan, Tiến sĩ Trần Du Lịch mboh lac, piah cak rok khang kajap, Bình Dương daok dang anak 3 kan kandah praong. Nan lac sarak khik ramik kanja di pak ini daok rilo tavak tavaiy, ka oh patagok hu bruk sami samar, duah jalan bahrau; tính tự chủ, eng drei taduan bruk ngak di drei dalam ieu pataom manuac ngak ka bruk cak rok patagok. Tiến sĩ Trần Du Lịch ndom lac, njauk caik bruk patagok di Bình Dương tui hatai saneng kinh tế bhum, abih di nyu nan lac “pak kieng cak rok” di Vùng kinh tế praong gah maraong. Njauk hu sarak pambuak bhum piah ngak tabiak sa labik patagok sami samar abih dalam taneh ia, ginup prein mariak gauk dalam bhum saong dunya: “Dahlak jia lac tukvak anak tal dalam bruk salih bahrau sarak jeng ba mai bruk tự chủ jang ka dom tinh, ban dalam bruk patagok. Yau nan, lang talaih gah hạ tầng, sarak saong dom tinh, ban pataom tame pambuak gauk ngak jeng darak pasa urang ngak haong gauk, pato pakai menuac ngak haong gauk. Klau bruk ini meda ngak jeng sa kadha bahrau, dalam nan công nghệ số saong kinh tế số meda jhul samar bhum ini dalam tukvak bahrau”.

Ngak tui tacei pato di Thủ tướng Rajaei lac njauk padang “hệ sinh thái công nghiệp rai bahrau, pambuak haong bruk cách mạng công nghiệp mbang ka 4, cak rok pataok hijao, hadah krah, khang kajap, ma-om pabak, oh caik ka urang halei daok viek gah likuk”, bruk daok pamaong tal di Bình Dương dalam dom thun anak tal lac jeng pasak, prein khang pambuak bhum, daok lac hình mẫu dalam bruk kham marat yam tapa "bẫy thu nhập trung bình", cakrok khang kajap tui jalan đô thị hadah krah, văn minh, bahrau, gam haong taneh ia ngak hu bruk ba tabiak lac ba taneh ia drei jeng sa taneh ia cak rok patagok, jien mek tame glaong,  tui jalan xã hội chủ nghĩa./.

Urang lang: Thu Thao – 04/05