50 thun nao tapa, inem krung angan praong prang di Binh Duong dalam mbang Pataom gauk dang tagok masuh meng akaok thun 1975 ndam biak dalam glo akaok ong Nguyễn Văn Lực, sa urang Thị uy vien dahlau, akaok dhan gah meraong peih paha ban sit Thủ dầu Một. Ong Lực hadar veik, tuk ban sit peih paha hajan biak praong, rahra jeng tuh tabiak jalan pan hala dok nagar pok sap danei khang. Bruk ini brei mboh hatai caong khin, padam abih kalin kan di mikva bhap bini rahra.

"Sang ngak bruk Phú Cương klauk dok aval, daok labik karei ye tuk 10-11 meng padang hala dok. Drei padang hala dok drei blaoh drei mek oh daok thei. Kol khamang huac nduac klak bot kalak balai abih, rahra bhap bini ye chreih chrai bui sambai ottanot. Bhap bini Rahra jhik hala dok meng bien halei jeng oh thau blaoh mboh mek tabiak tuel bak darak”

Binh Duong hu peih paha jeng sa “takai juak” hu angan siam glaong, brei peih praong taong tame gah Barak pabah kraong Sai Gon, daong palagaih ka dom kapul bol lin asal samar drah taong tame labik luac puac di Karja Sai Gon, blaoh tamat bruk peih paha gah Meraong, taneh ia tame sa baoh nagar.

Dalam baoh sang sit di phuong Chánh Nghĩa, Ban Thủ Dầu Một ong Nguyễn Thanh Tùng (hu angan ieu lac Hai Cường), urang bonlin katmang meng dahlau, khan dom bruk bui sambai duh hatai trun tagok di bhum taneh Binh Duong.

Yam tabiak meng asak apui mesuh metak, Ndang bo haong rahra Binh Duong kham merat truh tapa rilo kan kandah, dak harei dak karo kajap tani tanat dalam raidiuk, pasiam veik bruk ngak mbang. Dalam tuk rilo labik karei daok caong tame phun jien karja piah padang patagok jalan mbak sang danaok, Binh Duong hu ba tabiak jalan ngak pakajap, peih praong jalan negar quoc lo 13, brei peing khang ka bruk patagok gah ngak kong saong padang banbok.

Binh Duong jeng lac sa labik peih ngak ieik dahlau aval urang bi thu gam chu tich pakat mala tui jalan “sa pabah mbang, sa baoh inem tra” dalam harak gal dang bruk ngak mbang. Blaoh di nan, pataom tame bruk patagok gah ngak kong, patagok banbok, uak drei tagok jeng sa labik dang akaok gah ngak mbang padang kinh te, ngan haong jien mek tame kuhria tui yaok urang glaong abih dalam taneh ia. Sahneng tal dom thun bilan blaoh tapa, ong Tung drut druai ndom mayai lac:

"Urak ini mboh Binh Duong patagok rilo mboh di mata, dalam rahra thei jeng chreih chrai, hadah mbaok. Khol dahlak hulin tuk halei jeng kakei anek taco thau dhar phol dom rai rah dahlau, daok dang yau habar ka njauk, rik prein padang saong pacang caga khik Taneh ia dak harei dak siam makre gheih jang. Urak ini jeng umo labaih 80 thun paje, mboh bhum palei salih bahrau yaok harei, dalam tung tian biak bui sambai”

Ong Nguyễn Công Danh, Chinh uy Bo Chi huy bol lin meng dalau di tinh Binh Duong, ndom mayai ka bruk njauk thau dhar phol, pahadar prein buh tabiak di rairah dahlau oh huac di matai lahik ba abih hatai prein halan hatian ka taneh ia ka oh daok kalin kan, bebat di taneh ia:

 “Ngan haong dom baoh sang mbang tui sarak karja, dom urang hu daong prein ka katmang jeng daok kan kandah dut haong bruk daok rah tabiak di tinh kayua oh hu kein lagaih ngak mbang pambak tame jien urang taha padeih padei bruk, sarak daong rahra. Caong khin lac rai rah hadei kham merat sangka, patui veik thau dhar phol baoh sang thuong binh, liet si, baoh sang mbang tui sarak”

Dang anak tui hatai caong khin di dom urang jakar hu umur praong thun, urang pan akaok tinh Binh Duong hu ngak jeng ye daok ba tabiak rilo sarak lagaih, brei mboh hatai sangka rilo tal dom baoh sang mbang tui sarak, dom urang hu klak rup ka katmang. Nan lac bruk daong prein praong, pabak prein khang ka rai hadei di Binh Duong patui veik kham merat, padang palei pala dak harei dak ginup meda, hu ilamo haong anit ranam./.