Padang ngak sang daok xã hội yaom lap ka urang ngak

Diuk pasang sa-ai Lê Xuân Đoàn, urang ngak di labik ngak kong VSIP I, ban sit Thuận An mai Bình Dương ngak mbang hu jaik 10 thun. Caong khin praong abih di dua diuk pasang ini, lac blei hu baoh sang piah tani tanat raidiuk, brei anek nao bac. Min yaom taneh dak harei dak tagok dalam tuk jien bilan di urang ngak daok di tanut tani tanat, nan ye piah ngak po hu sa baoh sang lac bruk oh mbuan. Oh blei hu taneh, oh blei hu sang, dua diuk pasang ba gauk tapa duah thau sang daok xã hội min yaom jeng biak glaong, nan ye brei klaak hatai caong khin blei sang.  Sa-ai Lê Xuân Đoàn lac: “Caong khin karja, urang pan akaok hu jalan daong ka urang ngak kol dahlak meng bruk brei padang dom baoh sang daok xã hội yaom lap. Padang saong daong yaom pablei ka urang ngak, nan lac jalan daong ka kol dahlak hu daok di labik ini, ngak mbang pak ini. Kayua urak ini, khin blei sang biak kan, yaom jien tỷ dalam tuk jien bilan di urang ngak tok ginup mbang, ginup daok veik di Bình Dương).

Ban sit Dĩ An lac labik hu rilo menuac abih di tỉnh Bình Dương, mangaok mala 500.000 menuac. Dalam nan 60% lac menuac meng labik karei mai. Kayua quỹ taneh sit sot, rilo thun tapa, ban sit Dĩ An having akaok nao duah jalan langyah bruk sang daok ka urang ngak. Urak ini Dĩ An jeng rami ramik hu 3 labik brei ka doanh nghiệp padang sang daok xã hội haong sa danak dak daok hu ngak di  phường Tân Đông Hiệp kayua Tập đoàn Lê Phong ngak po đầu tư. Danak dak ini hu 1 sang praong, atah, glaong 30 tal, hu jaik 1.000 baoh sang meng 1 tal 2 bilik ndih, praong meng 30-64m2. Danak dak ini hu ngak salah di quý 4 thun hadei.

Bruk padang sang daok xã hội piah ka urang ngak hu tani tanat labik daok, sahanang hatai ngak bruk pak di bhumi 2 Bình Dương lac bruk njauk ngak piah khik takai urang ngak. Min bruk suh sah di urang ngak lac, bruk blei sang daok oh ka hu brei thau rilo nan ye oh blei hu yaom got saong harak gar daok hu rilo janih oh ka lagaih, nan ye kan hu ginup harak gar piah blei hu sang. 

Piah daong palagaih ka doanh nghiệp patagok sang daok xã hội, Bình Dương hu panuac caong Rajaei, patabiak sarak karei ka adat peih bruk padang ngak sang daok xã hội; pambuan dom adat hukum gah đầu tư, taneh riya, padang ngak danak dak buh jien tame padang sang daok xã hội; hu sarak miễn, giảm je ka dom po đầu tư padang ngak sang ka urang ngak... Bình Dương jeng brei pasang iek veik dom adat hukum brei ka bruk peih ngak danak dak sang daok xã hội. Gam haong nan, padang ngak dom danak dak brei mesraiy jien daong ka doanh nghiệp hu mesraiy phun jien yaom laba lap piah padang ngak sang daok xã hội.  Ong Nguyễn Ngọc Văn, Phaok Yam ndok Sở Padang ngak tỉnh Bình Dương lac: “maong tui gah padang ngak, kol dahlak hulin kham merat lang talaih kan kandah, tavak tavaiy yau ye bruk quy hoạch, bruk pasang iek ramik veik quy hoạch, buh jien padang ngak, taong yaom brei adat padang ngak… piah ba mbuan lagaih ka gah đầu tư tuk mai pambuak bruk haong tỉnh patagok sang daok gah đô thị")

Piah ba mbuan lagaih jang ka urang ngak hu blei sang xã hội, tỉnh Bình Dương jeng hu panuac likau Rajaei pasang iek, brei pabak phun jien ka dom gah hu mesraiy phun jien yaom laba lap piah padang ngak sang daok xã hội, piah blei sang daok xã hội; gam haong nan, pasang iek brei patagok tukvak brei mesraiy meng 20 thun tagok, sarak mesraiy mbuan lagaih gah harak gar, yaom laba, tukvak mesraiy, daong ka dom urang mbuan mesraiy hu phun jien piah blei, piah pah sang daok xã hội./.

Urang lang: Hani Pha – 05/10