Sa dalam dom bruk ngak gaok kan kandah trak di abih kayua bruk srau kadau di dunya nan lac gah jhik pet, kayau, lan am kayua jaoh, klaoh bruk pablei tapa dadrak pasar Châu Âu. Kayua yau nan ye, dom doanh nghiệp daok pandik akaok tuk gam duah labik pablei piah khik bruk ngak, gam kuhria jien thưởng, dalam tuk nan bruk mesre phun jien meng dom gilang pariak gaok rilo kan kandah. Amuk Phan Lê Diễm Trang, Phaok Akaok Kapul Jik menyim tỉnh Bình Dương brei thau, kapul hu 56 doanh nghiệp gam haong jaik 200.000 urang ngak. Meng kan kandah anak meta, dom doanh nghiệp hu klah rabha haong urang ngak piah ba tabiak jalan ngak siam di abih ka dua gah:“Yaom lac kan kandah min dom doanh nghiệp dalam kapul jeng kham merat ngak hagait nan ka urang ngak. Tết thun ini, meda oh dreh yau dom thun dahlau min jeng kham merat abih drei piah hu hasit hagait pachreih gauk yam tapa kan kandah".

Gam haong nan, công đoàn Bình Dương jeng hu jalan daong ka urang ngak hu sa Tết trei sil. Dom pakat công đoàn meda padang dom kapul nao rivang, alin hadaih jaik 83 ribau pok pandap, yaom abih labaih 41 tỷ đồng ka urang ngak, yaok pok yaom 500.000 đồng. 

Piah daong ka urang ngak mai palei mbang Tết, Liên đoàn Lao động tỉnh hu peih “Sruh radaih xuân anit ranam” alin hadiah 5.000 harak radaih apui nao – mai ka urang ngak di dom tỉnh gah kreh Negar, gah Barak, kuhria tabiak yaom jien abih tih jaik 20 tỷ đồng.

Amuk Nguyễn Hoàng Bảo Trân, Phaok Akaok Liên đoàn Lao động tỉnh brei thau, tui kuhria dahlau, Tết thun ini meda hu labaih 400.000 urang ngak di Bình Dương uan raok Tết. Kayua yau nan ye jabat meda pambuak bruk haong dom puk palei peih ngak “Darak tết công đoàn thun 2023”, Danak dak “Tết gun pataom – Xuân pambuak gauk”; alin hadiah harak blei pandap 0 đồng. Khaol dahlak pataom abih prein yava, jien padai piah daong ka urang ngak dalam tukvak Tết thun ini. Bruk peih ngak dom bruk ka urang ngak jeng meda hu peih ngak avan jang, sangka avan jang, daong brei avan jang. Khaol dahlak jeng hu panuac iew, jak ba dom jabat, doanh nghiệp khang gah jien padai sa tangin haong gauk dalam tukvak Tết ini"

Piah sangka daong ka dom urang ngak hu rilo rik daong ka bruk cak rok patagok di tỉnh, langiu di pok pandap kayua Liên đoàn Lao động tỉnh alin brei, urang pal akaok tỉnh Bình Dương hu tacei pato dom gah, puk palei pasang iek, padang angan dom urang ngak gaok kan kandah, njauk ruak kan kandah, urang njauk rambuis tuk ngak bruk piah rivang, alin hadiah pandap Tết. Ong Nguyễn Tầm Dương, Chánh văn phòng UBND tỉnh Bình Dương khan lac:“bahrau ini, yaok urang ngak hu daong jien pah sang tui sarak 08/2022 di Raja-ei min 1 triệu đồng oh ngak hu hagait lo. Meyah daong ka doanh nghiệp khik hu bruk ngak ye meda daong  ba bruk ngak ka urang ngak, haong yaom jien bilan meng 8 tal 10 triệu atau glaong jang 10 triệu sa bilan meda daong ka urang ngak hu rai diuk siam jang. Taphia di nan, tỉnh jeng hu peih ngak rilo jalan ngak piah daong ka urang ngak gaok kan kandah tukvak puac thun"

Urak ini dom gah, kapul nyaom di dom puk palei jeng daok jak ba dom po sang trọ oh mek jien, atau brei trun meneing jien pah sang trọ ka urang ngak. Ini lac sa bruk ngak piah klah rabha siam di abih, haong hatai caong khin daong ka dom adei sa-ai urang ngak khang hatai yam tapa kan kandah, uan raok Tết trei sil./.