Harei 1/7 anak tal, karja pakat huyen padeih ngak bruk saong 36 xa, phuong bahrau đi Binh Duong tame ngak bruk bahrau. Asal kadha ini ngak ka rahra saong gah ngak mbang pablei salih gam uan tabuan gam duh hatai.

Mikva brei mboh bruk duh hatai, hu ieu lac hadei di tuk ba tame padang ngak pakat xa bahrau, saong tal harei 15/8, karja Ban raya Ho Chi Minh bahrau ngak bruk pagam haong Binh Duong saong Ba Ria -Vung Tau, bruk ini hu ngak kan kandah, klaih klaoh dom harak gar karja halei ha oh?

Rahra bhap bini jeng biak duh hatai ka bruk salih jabat karja hu ngak kan kandah tal harak gar menuac urang yau harak kat can cuoc cong dan, harak kat brei adat peih nduac radaih, harak brei angan pamanek atau harak gar ka taneh riya. Rahra ba tabiak asal kadha, meyah brei pasiam, brei caik dahlau bruk ngak tapa online piah dui katut tukvak saong prein yava. Amuk Võ Thị Thanh Hương, rahra daok di Binh Duong, ndom meyai lac:

 "Dalam bruk ramik jabat, patakik bruk ngak karja, bruk paglaong bruk ngak di ilamo khoa hoc, kong nghe lac biak hu makna. Hadei di pagam, Ban raya Ho Chi Minh jeng ban raya praong, taneh riya praong, nan ye brei ngak habar piah ba ilamo ngak kong nghe tame bruk pasang iek, ngak bruk di karja, khik kajap urang jakar salah blaoh bruk ngak, duh dil samu, siam lagaih ka rahra?”.

Dang di Anak dom duh hatai ka bruk klaih klaoh harak gar, ong Trương Công Huy, Phaok Jabat UB Bhap bini tinh Binh Duong, brei mboh lac oh luai ka rahra gaok kan kandah, gah ngak mbang pablei salih brei salah blaoh harak gar karja.

Ong Trương Công Huy brei pagap lac, So Khoa hoc saong Kong nghe tinh Binh Duong, Ban raya Ho Chi Minh, Ba Ria – Vung Tau saong pasak Salih lek taka so Ban raya Ho Chi Minh hu padang majam jitvu karja tapa online bahrau. Bruk ini hu ngak salah blaoh saong daok hu dom xa ba tame ngak iek, gam haong di nan hu pambuak haong Pambang Jitvu karja pakat Negar. Meng harei 1/7, rahra tok brei tame sa baoh pambang lac harak gar hu ba nao ka labik, bhum palei ngak bruk. Ong Trương Công Huy brei thau yau nan:

"Di ini hu ramik ndap nda kaya kapul tacei ba saong urang halan tian ngak bruk piah daong rahra ngak harak gar, atau ngak randap haong jitvu karja tapa online. Meyah hu kan kandah, tavak tavaiy, biak caong ka mikva urang cu tri, gah ngak mbang pablei salih khau tin, brei rik panuac tapa Pambang Jitvu karja tinh Binh Duong piah khol dahlak hulin salah blaoh, pambuak haong Ba Ria -Vung Tau, Ban raya Ho Chi Minh padang majam ini dak harei dak pabak hu hatai caong, paglaong asar siam jitvu karja di Ban raya Ho Chi Minh bahrau dalam tukvak anak tal".

Piah rahra sahnang hatai, ong Nguyễn Văn Lộc, Akaok HD Bhap bini tinh Binh Duong pandar dom gah brei peih ngak cambaih laih, tani tanat dom bruk ngak hu pandar, dalam nan brei caik hatai sangka tal bruk khik kajap bruk ngak hu lagaih, langyah samu dom harak gar karja ka rahra saong gah ngak mbang pablei salih dalam tukvak salih. Ong Lộc jeng pandar jabat karja pakat xa bahrau brei ka hu “jaik rahra, taphia bruk ngak”, thau tani tanat ka bruk karei di bhum, khang hatai langyah samar drah di labik. Ong Lộc ndom meyai lac:

"Tukvak oh hu daok rilo, kayua nan biak caong dom so, dom gah haong chuc nang, bruk ngak brei pato tacei rabha tantu cambaih laih ka yaok bruk, yaok urang, saong tukvak salah blaoh bruk ngak. Harei 9/6, dom xa, phuong hu ngak iek dahlau, hadei di nan patui ngak brei salah blaoh piah ka tal harei 1/7 hu taong abih phuong, xa bahrau hu ngak bruk lagaih".

Ngan haong rahra saong gah ngak mbang pablei salih, dom urang nan daok caong tame bruk salih bahrau ini piah patakik dom harak gar daok cuang kandah. Min, bruk dom urang nan duh hatai abih lac dom urang ngak bruk pakat angaok pato tacei njauk min gah pakat ala ngak chung atau jhul bruk ngak ka gauk. Kayua yau nan ye, rahra caong dom pakat dang akaok jeng brei pasang iek, tui maong, thau tani tanat ka rahra, thau tani tanat dalam bruk ngak iek dahlau pakat phuong bahrau piah bruk salih ini njauk yau bruk “jaik rahra”, oh luai harak gar ngak “kan kandah kayua tavak harak gar karja./.