Dom sarak an sinh xã hội hu paglaong raidiuk di bhap bini bangsa takik

Phan Hòa lac 1 dalam 4 xã harat urang Cam di huyện Bắc Bình, labik hu tal 38% menuac sia lac urang bangsa takik. Tukvak tapa, meng hu dom sarak buh jien tame ngak mbang hu pambak khang, hạ tầng hu siam mekre, raidiuk rahra dak harei dak trei sir. Jalan mbak praong, siam, hu tuh nhựa, tuh bê tông, daong ka bruk nao mai hu mbuan lagaih. Chủ tịch UB bhap bini xã Phan Hòa, ong Bá Hoàng Anh Tuân khan lac: “Dom sarak bangsa dalam xa hu daong biak rilo ka bruk patrun kathaot khang kajap, pasiam kết cấu hạ tầng palei pala, rik daong tame bruk patrun baoh sang kathaot yaok thun di xã.

Oh njauk lac di Phan Hòa bo taong abih bhum urang bangsa takik dalam tỉnh,  jeng hu bruk salih bharau meng hu mbang tui dom sarak bangsa di Trung ương, di tỉnh. Kadha mboh cambaih abih meng bruk peih ngak sarak daong langyah brei taneh pala drak tui Sarak 04 di Tỉnh ủy saong Sarak 17 di HĐ bhap bini tỉnh hu langyah bruk taneh pala drak brei ka jaik 14.280 sang bhap bini bangsa takik. Gam haong nan, dom puk palei hu ba tabiak bruk daong patagok bruk ngak mbang ngan haong rilo jalan ngak cambaih laih yau ye: daong raong kubao, limo menek, menuk palao bein, daong phun pajaih, phun mbang baoh ka sang kathaot, sang jaik si kathaot. Daong khak drak, jru khik caga phun pala, jru thú y, pandap ngak nong, peih dom tal pato pasram ka ilamu ngak mbang, pala drak hu daong ka bhap bini pandar taneh hu kein laba.

Gam haong bruk jao taneh, 2.381 sang bhap bini bangsa takik daok hu brei bruk khik iek glai abih tih lac labaih 86 rabau ha. Jien bayar ka bhap bini bangsa takik taduan khik iek glai yaok thun labaih 17 tỷ đồng, gam daong langyah bruk ngak, tagok jien mek tame, takik bruk jah glai ngak puh, gam salih bahrau jalan sahneng di bhap bini ka bruk khik iek glai.

Ong Nguyễn Minh Tân – Akaok mBan Bangsa tỉnh brei thau: “Tukvak tapa, tỉnh hu pataom tame bruk buh jien padang ngak yaok ratuh danak dak duh ka bruk cakrok KTXH bhum bhap bini bangsa takik haong yaom jien labaih 1.200 tỷ đồng, ba mbuan lagaih ka bruk ngak mbang, pablei salih, pala drak, nan ye raidiuk mbang ngui, daok dang di bhap bini dak harei dak salih bahrau mboh di anak meta. Tal urak ini, taong abih xã bhum bhap bini bangsa takik hu jalan radaih ô tô tuh nhựa nao tal pasak xã, jalan điện negar, bưu chính, viễn thông jeng hu ginup abih. Dalam tỉnh hu labaih 5.543 baoh sang hu padang bahrau, daong ka bhap bini tani tanat labik daok, labik ngak mbang. Langiu di nan, tỉnh hu buh jien padang ngak 5 dự án định cư, định canh praong, ginup ka 276 baoh sang hu labik daok tani tanat.

Dalam tỉnh urak ini hu 34 bangsa takik, meblah 8% menuac sia di tỉnh. Bhap bini daok di 11 xã saong 20 palei pablak gauk, dalam nan urang Cam daok pataom gauk di 4 xã Phan Thanh, Phan Hiệp, Phan Hòa (Bắc Bình). Dom sarak an sinh xã hội, patagok KTXH, patruh eik patrun kathaot hu daong jhul patagok bruk ngak nong, palei pala, patagok prein khang di yaok bhum, paglaong raidiuk di bhap bini bangsa takik.

Meng dom jak jeng nan saong dom sarak, dom đề án meng Danak dak bruk ngak negar patagok KTXH bhum bhap bini bangsa takik saong bhum ceik tukvak 2021 – 2030 meda jhul bhum bhap bini bangsa takik cakrok samar saong khang kajap jang dalam tukvak anak tal./.

Urang lang: M. Phuong – 01/09