Ong Phạm Chí Dũng daok di ban sit  Đức Tài, huyện Đức Linh, tỉnh Bình Thuận lac sa dalam dom urang ngak nong bhian pala padai tui jalan meng dahlau. Hadei di tuk mboh kein laba meng bruk ngak padai hữu cơ  pambuak saong bruk padai, ong Dũng pachreih hatai tame HTX ngak nong Công Thành - Đức Linh, ngak jaik 5 ha ndiuk tui jalan hữu cơ: “ Dahlau diah ngak sit sot, ngak tui darak pasar. Daok tuk tame HTX pala ndiuk saong ngak njauk ilamu ky thuat di adei sa-ai ba tabiak ye ngak hu rilo padai brah jang. Dahlau daih ngak sa ha mek hu meng 17 tal 18 tấn sa thun, daok urak ini labaih 20 tấn/ha/ thun. Kein laba jeng hu, yaom kaom grap tanat jang urang blei gah langiu”.

Hu tame HTX, urang ngak nong hu daong ilamu pala drak saong pandap ngak, yau pajaih, khak drak, jru khik caga phun pala. Tui nan, HTX mbaoh tangin blei taong abih padai ngak tabiak ngan haong yaom glong jang darak pasar meng 100 -200 đồng sa kilo. Kuhria tal urak ini, HTX ngak nong Công Thành- Đức Linh hu pambuak bruk saaong urang ngak nong piah ngak 2.000 ha saong mek hu jaik 15.000 tấn padai sa vụ.

Ong Nguyễn Trọng Nghĩa, Yam ndoc Hợp tác xã ngak nong Công Thành - Đức Linh brei thau, padai di HTX ralo meng pablei tabiak negar langiu, yau nan ye biak caik hatai bruk ngak tui sa jalan yau gauk, salamat, asar siam, ngak tui jalan pataom pandap piah paglong prein meriak gauk: “ Tuk birau padang mikva oh ka thau yau halei, tuk ngak iek blaoh mboh yuak hu rilo padai brah, pablei hu yaom, mikva oh daok huac tra. Tui bruk ngak nan, mikva laba glong nan ye pambuak haong drei dak harei dak ralo. Karja palei jeng ba mbuan lagaih ralo ka HTX”.

Bruk tame HTX saong pala drak tui mblang hamu praong oh lac daong urang nong duah labik pablei padai brah bo daok salih jalan pala drak. Ong Trương Quang Đến, Akok Jabat  Ngak nong saong Patagok palei pala huyện Đức Linh brei thau, huyen hu  21 HTX ngak nong, dalam nan hu 7 HTX  ngak padai. Meng lavik mai, urang ngak nong Đức Linh takik pandar dom janih khak hữu cơ piah pala padai  bo ralo meng pandar khak vô cơ. Dua thun mai ini, yaom dom janih khak vô cơ tagok gam, ngak ka urang nong gaok kan kandah. Bruk pala padai tui jalan hữu cơ lac daong ka urang nong trun jien buh tame ngak  bo daok paglong asar padai brah saong jien ngak tabiak asar brah: “ Khol dahlak thau lac ngak habar piah ba bruk ngak nong hữu cơ saong ngak nong hacih sa-at, dak harei dak salih tapa ngak tabiak kaya nong tui jalan tuần hoàn piah paglong pandap meriak gauk, piah puac di abih lac ba mai kein laba di sa mblang taneh pala drak jeng yau tagok jien mek tame ka urang ngak nong”.

Langiu di bruk padang bhum pala, dom puk palei jeng hu jalan ngak, sarak ba mbuan lagaih ka dom D.N, HTX blei padai brah tame dalam bhum padang ngak sang mac ngak tabiak dom pandap meng asar brah. Dom jalan ngak saong jalan pamaong tal suai lavik yau nan meda ba mai prein khang birau ka gah ngak nong, palei pala di Bình Thuận cak rok patagok./.

Urang lang: Ai Nghiem -14/7/2022