Jaik 17 thun ngak dalam gah du lịch, ong Phạm Quang Hậu urak ini lac Yam ndok điều hành Sonata Resort di xã Tiến Thành, TP.Phan Thiết brei thau, dahlau diah tuai bhian ndom lac oh hu labik ma-in, urak ini lac karei paje: “Dahlau diah, tuai mai ini bhian ndom lac oh hu hagait piah ma-in. Urak ini hu dom kadha ma-in yau mblang bein aia, blaoh labik ma-in sambai, anak tal daok hu darak melam di jaik labik Novaworld ye meda pabak dịch vụ ka tuai damuai. Tuai damuai mai tal ini ma-in mboh buai sambai jeng lac bruk uan tabuan ka gah Meraong Phan Thiết ini”.

Ba tame pandar meng harei 1/9, mblang bein aia Wonderland Water Park dak harei dak dui pachreih tuai damuai. Meng rilo kadha ma-in chreih chrai brei ka taong abih umo thun tui pakat thử thách tagok jang, mblang bein aia ini ba mai ka tuai damuai rilo bui sambai. Sa-ai Nguyễn Quốc Vẹn, urang dang khik iek bein ma-in brei thau: “Pak ini hu dom mblang bein ma-in sambai daok peih pabah mbang saong jaik ba tame pandar yau bein Circus Land nan lac sa dalam dom bein chuyên đề. Ndom ka mblang bein aia, ye khaol dahlak hu pabak dom bruk ma-in hu ngak meng dom labik ngak dang akaok dunya. Nan lac dom bruk ma-in praong dui pachreih hu tuai damuai tuk mai tal ini.”

Di bhum tasik Kê Gà ndaoh di nan oh atah, labik rivang ma-in LU Glamping (xã Tân Thành, huyện Hàm Thuận Nam) bahrau hu ngak dom sang lều tui jalan di Bắc Âu caik rah tui takai tasik. Ini hu mong lac bruk rivang ma-in cắm trại mbang akaok meti ba tame pandar duh ka tuai damuai dalam Bình Thuận. Langiu di nan, pak ini daok hu dom janih pandap du lịch thể thao mala ia yau Jetski peih eng, mô tô dang nduac ala aia, lướt ván diều atau ca nô katung kalang par... Daok di labik gah Barak Phan Thiết, rilo pandap ma-in bahrau jeng daok dui pachreih tuai damuai.

Langiu di bruk parilo janih pandap rivang ma-in, gah rivang ma-in Bình Thuận daok pambuak haong dom tỉnh jaik taphia yau Ninh Thuận saong Lâm Đồng piah pambuak gauk peih prong jang dom bruk rivang ma-in trải nghiệm, rivang ma-in mạo hiểm.

Bahrau ini, Sở Ilamo The thao saong Du lich tỉnh Bình Thuận haong Sở Ilamo The thao saong Du lich tỉnh Lâm Đồng hu ginum biai ka bruk pambuak gauk patagok pandap rivang ma-in “Jalan Tasik saong Bingu” pambuak pagam Lâm Đồng - Bình Thuận. Dua gah njauk gauk brei peih ngak iek danak dak nao kabak jalan atah dã ngoại Tà Năng - Phan Dũng. Ong Nguyễn Văn Khoa, Akaok Kapul Du lịch tỉnh Bình Thuận brei thau, bruk pambuak pagam dua tỉnh jeng piah padang thaot binguk, pren meriak gauk saong labik dang bahrau ka du lịch Bình Thuận saong Lâm Đồng.

 “Nan lac dom jalan ngak bo khaol dahlak meda ginum biai saong anak tal khaol dahlak meda pambuak gauk piah peih ngak di Kapul nyaom rivang ma-in di dua tỉnh. Taphia di nan, khaol dahlak jeng hu pok  panuac ka karja di dua tỉnh, urak ini hadei di tuk jalan cao tốc ba tame pandar, ye likau peih prong jalan 28B piah palaghaih ka tuai damuai nao rivang iek  “Bingu saong Tasik”

Bình Thuận jeng daok pataom tame pasiam veik bruk buh jien tame padang ngak, paglaong bruk njauk hatai di bhap bani saong doanh nghiệp ngan haong bruk hành chính công, abih di nyu lac dalam gah buh jien tame ngak mbang, taneh riya. Tapa nan, dui pachreih hu rilo jang urang buh jien tame ngak mbang praong, dom kapul nyaom prong dalam negar saong angaok dunya  mai ngak mbang gah du lịch di Bình Thuận. Amuk Nguyễn Lan Ngọc, Phaok Yam ndok Sở Ilamo The thao saong Du lich brei thau, thun 2023 ini, gah du lich Bình Thuận caong lac raok hu 6,7 triệu mbang tuai damuai, yau nan min, tal akaok bilan 10 hu tapa tanut ba tabiak blaoh.

 "Meng ini tal puac thun, Bình Thuận meda dui pachreih hu dom tuai damuai tra. Piah hu yau nan, njauk ndom tal bruk sangka buh jien tame ngak gah jalan mbak nao mai pambuak pagam Bình Thuận haong dom tỉnh jaik taphia, abih di nyu lac cao tốc Dầu Giây – Phan Thiết pambuak pagam Bình Thuận haong TP.HCM daok ngak ka Bình Thuận jaik jang haong tuai damuai".

Meng dom jalan ngak njauk, ngak siam, gah du lich Bình Thuận jia lac dom tuai dalam taneh ia saong tuai negar langiu mai rivang iek, padeih padei di Bình Thuận meda tagok samar saong khang kajap./.