Tỉnh Bình Thuận urak ini hu 34 bangsa takik, hu labaih 104.000 menuac, meblah labaih 8% menuac sia di tỉnh. Dom thun jaik ini, meng bruk sangka di dom pakat, dom gah, dom puk palei nan ye bruk pala drak di bhum bangsa takik cakrok, năng suất tagok.

Yaok thun, tỉnh hu caik tabiak pok jien praong meng kadung jien karja piah langyah bruk pala, ngak, jao khoán khik iek glai, abih di nyu lac buh jien tame ngak kết cấu hạ tầng. Dom danak, sarak bhum bhap bini bangsa hu rik daong praong dalam bruk peih ngak danak dak bruk ngak negar hu siam. Meng nan, raidiuk di bhap bini Bangsa takik oh padeih salih bahrau. Min urak ini di bhum Bangsa takik saong bhum ceik jeng daok rilo kan kandah, brei patui bruk sangka, daong brei, abih di nyu lac gah  hạ tầng bhum bhap bini Bangsa takik saong bhum ceik.

Piah pabak hu bruk nao mai, pajeng ba kaya pandap, daong paglaong raidiuk di mikva bangsa takik, HĐND tỉnh Bình Thuận hu brei tapa Danak dak daong padang ngak kết cấu hạ tầng bhum bhap bini Bangsa takik dalam tỉnh tukvak 2021- 2025. Danak dak pataom phun jien padang ngak 12 danak dak di dom huyện. Tal urak ini, hu 7 danak dak hu ngak salah, daok jao brei, ba tame pandar.

Ong K’Văn Góa, akaok UBND xã Đông Tiến, huyện Hàm Thuận Bắc brei thau: “Labik Nách Nai lac bhum ngak tangei lai praong di xã. Dahlau daih tuk oh ka hu ngak jalan, mikva paik tangei  njauk pah radaih pajeng tabiak gah langiu, abih jien pajeng ba. Urak ini hu jalan praong, radaih ô tô tame hu tal mblang hamu, teik tangei ka bhap bini Cơ Ho, daong ka mikva trun hu jien pajeng ba, hu jien mek tame rilo jang.”

Dom danak dak praong pabak ka bruk ngak mbang, ngak huak di bhap bini hu padang ngak saong daok ba mai siam lagaih, rik daong cakrok KTXH bhum ceik, bhum biak kan kandah. Tapa bruk pablak tame peih ngak rilo danak dak, dalam nan hu Danak dak bruk ngak negar 1719, Danak dak bruk ngak negar patrun kathaot khang kajap saong Danak dak bruk ngak negar patagok palei pala bahrau… dom hạ tầng di dom xã kathaot, abih di nyu lac jalan mbak, kraong ribaong daok hu padang ngak, pabak siam jang ka bruk ngak mbang, ngak huak di bhap bini, rik daong praong tame bruk peih ngak dom bruk patagok KTXH, an ninh - quốc phòng bhum bhap bini Bangsa takik dalam tỉnh.

Ong Nguyễn Minh Tân, Akaok mBan Bangsa tỉnh Bình Thuận brei thau, hadei di tuk dom puk palei ngak salah dom danak dak, mBan Bangsa daok brei pambuak bruk haong dom sở, ngành, puk palei padang ngak dom kadha pabak ka bruk cakrok KTXH bhum Bangsa takik saong bhum ceik. Abih di nyu lac sangka buh jien tame ngak dom jalan nao mai pambuak bhum ngak tabiak kaya pandap, jalan nao tal pasak dom xã, puk, palei, dom jalan ia pandar,...; tacei pato patagok bruk pambuak gauk di dom gah, puk palei, pasang iek, pablak tame dom sarak piah patagok hu siam lagaih.

Langiu di nan, mBan Bangsa jeng hu daong ka UBND tỉnh patagok bruk pathau khan, paglaong akaok sahneng di dom pakat, dom gah, dom puk palei, ngak jeng bruk njauk hatai, pachreih tui dalam bhap bini piah peih ngak siam bruk padang ngak hạ tầng praong ka dom xã, palei bhum Bangsa takik saong bhum ceik dalam tỉnh./.