Bruk pala pajaih bei Japon ralow katam salih ka phun padai di bilan thu lagu

Huyện bhum ceik Đức Linh lac sa dalam dom labik praong peih bruk salih phun pala pagam haong pambuak gauk ngak tui jalan cak rok patagok khang dom janih phun pala, athur raong, dom bruk ngak hu yaom kinh tế glaong saong darak pasa pablei tani tanat. Di pak ini hu rilo bruk ngak ba mai kein laba glaong ka bhap bini.

Salih ka bruk yaok thun ngak 3 vu padai, thun 2020, saai Nguyễn Đình Thương, xã Vũ Hòa pala pajaih bei Japon ralow katam salih ka phun padai di bilan thu lagu. Hadei di tukvak suai lavik pala iek hu jak jeng, saai Thương khang hatai buh jien tame pah taneh piah peih praong bruk pala drak. Maong mboh siam lagaih, dom baoh sang bhap bini hu mbaok tame pambuak gauk ngak. Tal urak ini, mblang taneh pala bei Japon dalam xã Vũ Hòa hu labaih 35 ha. Tui saai Nguyễn Đình Thương, dut saong dom janih phun pala dahlau daih, bei Japon ralow katam hu kein laba glaong jang rilo mbang. Meng năng suất mek hu labaih 25 tấn/ha, hadei di tuh kaoh abih jien buh tame ngak, daok laba hu meng 70 tal 100 triệu đồng/ha.

Bruk pala bei Japon lagaih haong bruk salih janih phun pala di mblang taneh kurang ia pruh di xã Vũ Hòa. Gam haong nan, peih tabiak jalan nao bahrau, daong ka dom baoh sang hu rilo janih phun pala, salih ka bruk pala 1 janih phun padai  tapa pala pablak 2 vụ padai, 1 vu bei piah paglaong jien mek tame ka mikva urang ngak nong.

Hợp tác xã Njam salamat Tiến Phát lac sa HTX hu angan je dalam bruk salih janih phun pala di xã Vũ Hòa. Urang ba akaok nao dahlau dalam bruk ini lac saai Nguyễn Thị Hòa (daok di puk 3). Meng bac ilamo angaok internet, meng tapuk saong meng ilamu pataom hu tapa dom mbang ngak oh jak jeng tuk camriep, sang saai Hòa thau hu ilamo pala saong iek glang, bein njam tamuh hijao siam saong paik hu tani tanat. Tuk camriep saai pala sit 300 m2, patui di nan meng peih praong taneh pala tal 600 m2 blaoh 1.200 m2, yaok thun bein njam brei jien mek tame labaih 350 triệu đồng.

Oh padeih di labik pala ngak di sang, saai Hòa parabha jalan ngak saong pambuak haong dom urang pala njam dalam bhum padang Hợp tác xã njam Tiến Phát haong mblang taneh pala jaik 3.000m2. Thun 2020, njam di hợp tác xã hu pok brei angan lac pandap OCOP 3 patuk pakat tỉnh.

Ong Trần Ngọc Hà, Phó akaok UBND xã Vũ Hòa brei thau: anak tal, xã brei pambuak bruk haong dom mban, dom gah di huyện Đức Linh salih janih phun pala, pambak praong dom bruk ngak iek, ba brei ilamu kỹ thuật piah ka bhap bini thau cambaih jalan ngak, takik pandar khak hóa học, paglaong bruk buh khak hữu cơ piah khik siam mekre prein yava jang yau chất lượng kaya nong.

Gam haong bruk jhul khang salih janih phun pala hu kein laba, huyện Đức Linh biak caik hatai sangka tal bruk pambuak gauk pala drak saong pablei dom janih kaya nong. Langiu di nan, huyện daok hu 15 labik raong glang pambuak gauk pablei haong dom doanh nghiệp. Pala drak, pablei pandap hu tani tanat, urang nong oh daok haduh hatai ka bruk pablei tabiak, jien mek tame hu tagok glaong. Kuhria tal thun 2021, jien mek tame kuhria rah tapa di yaok urang nong dalam huyện hu jaik 46 triệu đồng sa urang sa thun, dom sang kan kathaot trun daok 1,2% dut saong 10 thun dahlau di nan.

Urang lang: Thu Thao – 03/05