Sa di dalam dom bruk asal hu Binh Thuan brei padang ieu lac jak ba saong pandar siam lagaih abih gah rik daong ka bruk patagok, jhul samar bruk padang ha tang jalan ngak samu, abih di nyu nan lac danak dak pasak praong hu makna. Langiu di nan tinh jeng brei mboh bruk brei mesraiy phun jien buh tame ka bruk pakat karja lac bruk brei caik ngak dahlau, kham merak mek hu bruk bayar jien brei mesraiy takik di nyu hu 95% dalam puac thun 2025.

Ong Nguyễn Thanh Hiền, Phaok Yam ndok Gah Pasang iek danak dak buh jien tame padang danak dak jalan mbak tinh Binh Thuan – po buh jien tame di rilo danak dak jalan mbak pasak di tinh yau ye: tatua Văn Thánh, jalan ĐT719B, jalan Tân Minh – Sơn Mỹ… brei thau:   

Meng akaok meti, kol dahlak hulin pataom tame dom pandap jamraik patagok peih ngak bruk, tagok tukvak ngak bruk, pambak tame bruk langik lagaih piah ngak salah blaoh dom tanut mek hu bruk ba tabiak dahlau, daong brei mesraiy phun jien mek hu tanut glaong abih.”

Binh Thuan ba tabiak jalan cakrok patagok 10% dalam thun 2025 kayua yau nan ye tal puac thun tinh brei kham merat pasamar haong rilo jalan langyah. Anak di meta, tinh pataom tame talaih, langyah, ngak salah 36 danak dak daok tavak dalam bhum palei, dalam nan lac hu danak dak nang luong.

Tui ong Nguyễn Hoài Anh, Bi thu Tinh uy Binh Thuan, meyah gah ngak kong tagok, dalam nan lac gah ngak kong nang luong, ngak pandap kaya ye hu ngak tabiak yaom kaom pandap kaya ka bhap bini rahra biak praong. Gam haong di nan daong parilo jien mek tame ka kadung jien di karja palei. Kayua yau nan ye, tinh biak caik hatai sangka iek praong bruk dak padang jeng yau ngak dom danak dak labik ngak kong.

“Di Hàm Tân urak ini hu 3 labik ngak kong blaoh khol drei brei pataom tame. 3 labik ngak kong ini meda dui pachreih gah buh jien tame dalam hadei lac biak praong, praong rilo jang dut haong dom labik ngak kong karei di dalam tinh. Kayua yau nan khol drei brei mboh bruk makna piah kham merat jhul samar padang salah dom labik ngak kong ini dak samar drah dak siam.”

Di harei ngak bruk haong Mbang Thuong vu Tinh uy Binh Thuan bahrau ini, Uy vien Mentri Chinh tri, Bi thu Trung uong Ndang, Phaok Thu tuong Thuong truc Chinh phu Nguyễn Hòa Bình ndom mayai lac: Binh Thuan brei duah saong ngak samar prein ngak cakrok patagok bahrau, yau ye salih taka so, chip ban dan, AI, nang luong tai tao, meyit meyao pakat glaong…Langiu nan, brei ngak bahrau dom prein ngak cakrok patagok klak, lac bruk ngak nong, ngak kong, jirah rivang, meyit meyao… Phaok Thu tuong Nguyễn Hòa Bình ndom meyai lac:

“Ndom mayai brei ka sang mac jammariak gom ndien khí LNG 4.000 MW, meyah 4.000 MW ini nyu tame raidiuk ye khol drei hu capat sagait 4.000 ty, oh ka bau tal bruk ngak hu karei di dom kadai khí jaik ar. Pambuak tal bruk kakei karei di Rajaei, dahlak hulin jeng khan brei thau lac Rajaei hu mbaoh tangin saong pandar Binh Thuan ngak abih bruk piah danak dak ini hu ba tame ngak bruk samar abih meyah meda ngak hu. Peih ngak samar, ramik caga mbaok taneh samar, ndom biai samar haong gah pambuak bruk, bruk ngak daok veik lac brei ka Binh Thuan.”

Jeng tui Phaok Thu tuong, tinh Binh Thuan brei sahaneng tal bruk ngak tabiak hydrogen  meng dom danak dak ndien angin di tasik, salih ka bruk ba ndien tame bhum taneh.

Piah daong samar drah bruk patagok kinh te dalam thun 2025, tinh Binh Thuan jeng jhul samar bruk salih bahrau harak hagal hanh chinh gam haong salih taka so, pasiam bruk pablei salih saong paglaong prein meraik gauk ngak mbang. Gam tui di nan caik hatai sangka iek praong patagok urang ngak bruk, dalam nan njauk caik hatai tal urang ngak bruk hu ilamo glaong pagam haong jhul khang bruk roh duah, patagok saong ba tame pandar ilamo khoa hoc – kong nghe, jhul tagok bruk salih bahrau hadah krah saong padang peih bruk ngal mbang./.