Bahrau tani tanat saron mbon hadei di jaik sa adit hu kapul Polih Hinh su – Kong an Ban raya Ho Chi Minh daong paklah bleik, adei T.G.V (ndih tapui di thun 2007, daok di Ban raya Ho Chi Minh) jeng oh ka abih kateik drei min mboh biak jamo tatuah kayua hu daong pacaklah bleik dil samu, pacang cakak dom bruk jhak praong jang.

Pambuak manyim abih bruk kadha, T.G.V khan mayai lac, abih bruk meng akaok meti tuk adei tok hu sa mbang taong phone oh krein saong huruh panuac pakakei pathau khan hu ruah hu mbaok tame danak dak me-in pambuak ndom meyai anek saih dai hoc nagar Utralia. Mbang taong phone ini mek angan ngak ja ieu lac sang bac dai hoc labik adei tut angan pilih ruah caong takre dahlau di abih lek taka 1.

Pathau khan ja juo paluo pandar anek saih sinh vien brei mboh hu jien mbaok 600 trieu dong piah brei salah blaoh tamat harak gar. Je hatai lac njauk biak di sang bac dai hoc, T.G.V hu likau jien amaik ame min oh hu tui tian, kayua amaik ame thau ini nyu lac sa bruk pachot pagat hu bhian daok kakei caga.

Tuk mboh bruk nan oh hu jak jeng, dom kol bleik tuk nan salih tapa sa bruk karei. Dom kol bleik pok panuac gham kateik urang, khan lac adei hu sa “ndap nda karei” brei pasang iek. Kol chot pagat pandar adei cuak ayut Zalo saong ngak sa mbang taong phone gam video:

“Tuk taong phone video call, adei mboh sa urang cuk khan ao polih kong an saong di angaok paban hu janih tapung sambo bar patih gam haong urang daok jaoh khuai tauk trun, cuak dua tangin gah likuk yau kol duas. Dom urang nan lac kayua adei khin hu 600 trieu dong nan hu mbaok tame sa bruk pablei salih jru phil. Blaoh patui di nan lac adei jeng urang hu pambuak tal bruk bruk pablei salih jru phil”.

Kol pachot pagat payua harak gar hukum, Sarak mbaoh tangin, harak cap mek kareik ja di dom jabat kaoh duas piah taong tame hatai sahaneng, ngak ka adei huac blaoh ngak tui. T.G.V hu mesraiy jien tapa sa kadung jien ndien tu 30 trieu dong, hadei di nan mek kaong nyuk di drei saong urang dalam sang nao pablei blaoh yer abih ka urang chot pagat. Kol nyu daok palue pacuh adei V. mek harak gar taneh di sang drei nao padang, min biak patuah jamo lac adei oh ngak hu. Tuk thau oh meda hu padang harak taneh riya, kol pachot pagat pandar urang brei ba dom tai khoan patui veik “langyah bruk ini” saong pagun sanya brei bayar gilac taong abih paok jien “padang” nan.

Pang tui kol bleik, adei V. hu mek taxi kong nghe tal Buon Ma Thuot, adei thau lac drei njauk pachot pagat tuk tal labik blaoh oh duah mboh angan “labik pagun” saong oh mek hu hagait yau panuac hu pagun Sanya baloh. Ndom mayai brei ka bruk njauk pasang iek, T.G.V ndom ka bruk pasang iek njauk thur mek bo drei hu rah tapa:

“Tuk adei nao ndih kol nan jeng pandar peih camera pasang tame caneng drei daok ndih. Dom urang nan meda pasang iek taong abih bruk  saong bruk pandar di adei angaok phone, jamraik computer. Kayua adei tut tame rabha mbaok phone nan dom urang nan meda hu mboh taong abih dom kadha kaot cih dalam phone, pathau khan angaok Zalo, Facebook. Amaik ame adei ndom hagait nyu jeng mboh abih, hadei di nan kol nyu pandar adei, pandar javap calei tin nhan panuac di amaik ame tui hatai di kol nyu”.

Ong Trần Văn Ngư, ame di adei V., ndom mayai lac yaom lac amaik ame biak hu kakei caga min oh meda hu jalan ngak di kol blaik oh thau dahlau hu tal yau nan:

“Tuk mboh kamuan klak sang nao, baoh sang biak mblung mabuk, duah meng rilo bruk min oh siam lagaih. Meda anek dahlak daok hu yaom piah pambak tame ka jien padai nan kol nyu oh ka kateik geik hatai sahaneng kamuan. Kayua yau nan, hatai sahaneng di kamuan tuk gilac mai sang oh daok mblung rilo. Paok jien lahik lac biak praong dut haong jien mek tame di baoh sang, min kol dahlak jeng mboh patuah jamo kayua prein yava rup pabhap di kamuan oh hagait. Jien padai lahik ye drei meda duah hu”.

Yau ye VOV pathau khan, hadei di tuk hu tin khan di baoh sang, dom trinh sat hinh su Kong an polih Ban raya Ho Chi Minh hu samar drah tagok jalan di malam. Min oh ka bak 24 tuk hadei di nan, kapul kong an polih hu duah mboh adei V. di sa baoh sang padeih padei di phuong Tân Lập, tinh Dak Lak, tapa salah blaoh tukvak mblung mabuk di urang njauk tame bruk kadha jeng ye di dalam baoh sang nyu./.