Dom bilan puac thun, bruk pala drak di palei Đăk Xây, xã tapen negar Đăk Long, huyện Đăk Glei, tỉnh Kon Tum dak jar var jang. Bahrau paik bloh cà phê, 130 sang bhap bini dalam palei tapa raok mek bei plaom piah pablei ka sang mac ngak tapung. Ong A Xôn, Bí thư Chi bộ palei Đăk Xây chreih chrai brei thau, raidiuk mikva dalam palei thun ini hu salih bahrau biak rilo meng ngak tui tacei pato di karja saong urang jakar, urang lin biên phòng Đồn Đăk Long:  “Đồn Biên phòng Đăk Long brei urang jakar, urang lin nao tal yaok baoh sang tacei jalan pala, iek glang yaok janih phun pala piah hu kein laba. Thun ini, mikva bui sambai lô tuk cà phê saong bei plaom jeng pala njauk, pablei hu rilo jien. Di bhum tapen negar kan kandah bo bahrau tapa sa thun, raidiuk salih karei rilo yau ini, lac uan tabuan lô”.

 Đăk Long lac xã biak kan kandah di huyện Đăk Glei, tỉnh Kon Tum daok tapen negar Lào. Ngak tui danak dak bruk ngak negar padang ngak palei pala bahrau, tal abih thun 2022, xã ngak hu 16 dalam 19 tiêu chí. Urak ini xã jeng trun hu 113 baoh sang kan kathaot, lac trun hu 8% - glaong jang 2 mbang duk haong bruk ba tabiak di tỉnh. Ong Huỳnh Ngọc Ly, Akaok UBND xã Đăk Long brei thau, hu yau nan, meng hu bruk pambuak gauk, bruk daong ba di urang jakar, urang lin Đồn Biên phòng Đăk Long: “Langiu di bruk brei panuac daong ka Đảng ủy, ka karja palei ngak bruk patagok KTXH, khik kajap quốc phòng an ninh, Đồn daok hu brei urang đảng mai sinh hoạt di dom chi bộ puk, palei piah samar thau hatai sahneng, hatai caong khin piah ba tabiak jalan ngak, pambuak haong pakat ủy, karja palei. Dua tra lac bruk urang jakar, urang lin lac urang bangsa takik di Đồn pambuak talei rohim haong dom sang bhap bini dalam puk, palei piah cakrok kinh tế ka baoh sang nan”.

Rik prein, sa hatung hatai haong karja, bhap bini 13 xã tapen negar di tỉnh Kon Tum padang ngak palei pala bahrau, Bộ Chỉ huy Bộ đội Biên phòng tỉnh Kon Tum brei yaok pluh urang jakar mai daong ka 11 xã; brei urang đảng di dom đồn tame sinh hoạt di 71 chi bộ palei, pambuak talei rohim, daong ka labaih 1.000 sang bhap bini bhum tapen negar patagok bruk pala, ngak, padang puk palei meng yaok rabau harei ngak bruk. Dom bruk daong ka bhap bini patruh eik patrun kathaot, padang ngak palei pala bahrau hu siam mekre ngak brei salih bahrau raidiuk saong mbaok meta palei pala bhum tapen negar. Thiếu tá Nguyễn Doãn Hải, Chính trị viên phó Đồn Biên phòng Sa Loong, brei thau: “Dahlau daih bhap bini ngak tui jalan klak 1 thun 1 vụ oh hu hadom. Đồn Biên phòng daong ka bhap bini bruk ngak padai ia 1 thun hu 2 vụ năng suất glaong. Đảng ủy, Ban Chỉ huy Đồn pambuak bruk haong karja palei, urang jakar, urang lin trun daong bhap bini pasiam sang taik tahak, mek hu angan palei pala bahrau. Sang halei oh hu menuac ngak ye urang jakar, urang lin daong harei ngak bruk piah sang nan trun hu meneing kan kandah gah kinh tế”.

Bruk peih ngak hu siam Danak dak bruk ngak negar padang ngak palei pala bahrau daok hu daong ka 13 xã tapen negar di 4 huyện Đăk Glei, Ngọc Hồi, Sa Thầy saong Ia H’Drai di tỉnh Kon Tum dak harei dak salih bahrau mbaok meta. Meng bruk ngak hu dalam padang ngak palei pala bahrau, patagok KTXH thun ini, bhap bini bhum tapen negar di tỉnh Kon Tum, dalam nan rilo meng lac bhap bini bangsa takik dak khang hatai jia, khang takai yam tame thun bahrau 2023./.