Meng nan, rilo baoh sang kathaot dak harei dak yam tagok, daong jhul patagok kinh tế, patruh eik patrun kathaot di bhum urang Khmer daok di Sóc Trăng. Urang vak  Thạch Hồng hu kadha vak ndom ka bruk ini:

Daok iek glang tapol lamo aia tasau 9 drei, dalam nan hu 4 drei daok brei aia tasau, sa-ai Khâu Đức Lập, urang dalam kapul pambuak bruk ngak nong Đại Ân, xã Đại Tâm, huyện Mỹ Xuyên chreih chrai brei thau, ini lac bruk ngak mbang ba jien tame di yaok baoh sang, yaok bilan jeng duah hu labaih 10 triệu đồng meng bruk pablei aia tasau, daong ka kinh tế baoh sang hu tani tanat: 4 drei ini brei jaik 40 kg, yaok drei brei 10kg, van ro ye drei njauk khik ramik hacih sa-at, daok ilamu kỹ thuật ye gah ngak nong pato pathram brei".

 Patui panuac ndom di pasang, sa-ai Phương Thị Hoàng Ngân, diuk di sa-ai Lập, daok brei thau lac: "Piah ka aia tasau pablei hu yaom glaong ye drei njauk raong glang limo ka nyu tani tanat. Blaoh blei vitamin, canxi ni daih pabak ka limo. Pagap yau limo bahrau menek blaoh ye njauk brei ka nyu menyum canxi piah ka nyu oh lamin takai".

 Hu thau, sang sa-ai Lập saong sa-ai Ngân dahlau diah jeng biak kan kandah, jien mek tame meng 2 công njam patam saong 2 công ngak padai jeng oh hu hadom. Yau nan min, meng harei sang sa-ai hu mbaok tame Kapul pambuak bruk ngak nong Đại Ân, hu dom urang dalam kapul daong duah jalan cak rok patagok kinh tế haong bruk raong limo aia tasau, hu pato pathram, hu daong gah ilamu kỹ thuật, meng nan jien mek tame meng bruk raong limo aia tasau gam haong bruk ngak njam patam saong padai dak harei dak tagok saong grap tanat jang, rai diuk dak harei dak tagok, brei ka anek bik nao mbang bac hu siam jang.

 Ong Hứa Thành Nghĩa, urang dang akaok kapul pambuak bruk ngak nong Đại Ân brei thau, langiu di bruk raong limo aia tasau, kapul pambuak bruk daok pala njam patam, abih di nyu lac bruk pambak prong pajaih padai ST24, ST25 pambuak haong bruk pablei kaya pandap hu siam lagaih saong khang kajap haong doanh nghiệp tư nhân Hồ Quang Trí di angaok mblang taneh labaih 100ha. Kein laba kuhria ran tapa yaok thun hu meng 40-50 triệu đồng/ha. Gam haong jien mek tame meng bruk raong limo aia tasau, pala njam patam, urak ini 32 urang dalam kapul pambuak bruk thei jeng hu raidiuk tani tanat, ginup meda, sang danaok hu padang ngak siam gheih: "Kapul pambuak bruk rilo meng lac pambak praong pajaih ST24, ST25, padai ye hu doanh nghiệp Hồ Quang Trí blei abih, yaom tuk halei jeng glaong jang gah langiu meng 800-1000 đồng/kg. Meng nan mikva ngak padai pajaih hu jien mek tame rilo jang, kein laba jeng hu tagok jang".

 Dalam dom thun tapa, bhap bani Khmer di tỉnh Sóc Trăng tuk halei jeng gul pataom gauk dalam bruk ngak mbang carok patagok kinh tế, abih hatai daong gauk trun kathaot tui jalan khang kajap, pagloang rai diuk, yam tagok ngak kaya meda. Ngak tui bruk ngak lac mblang hamu prong, bruk ngak kinh tế kapul nyaom tui jalan hợp tác xã, kapul pambuak bruk, mikva Khmer di Sóc Trăng hu rami ramik gilac bruk ngak, salih bahrau jalan ngak mbang pala drak.

Kol dahlak mai xã Viên Bình, huyện Trần Đề, atah pasak ban Sóc Trăng jaik 30km, jeng lac xã bhum atah bayah, hu urang Khmer meblah jaik 73% bol bhap hu pang mikva khan rilo ka bruk ngak padai ST tui jalan ngak mblang hamu prong, daong ka urang nong dalam palei “salih bahrau rai diuk”. Dom baoh sang praong, siam hu padang tagok salih ka dom baoh sang taik tahak, brei mboh ka rai diuk bhap bani Khmer labik ini hu hadah hadai tagok.

Ong Lâm Sung, urang nong daok di xã Viên Bình brei thau, dahlau diah, bruk ngak padai di mikva Khmer pak ini daok tui jalan ngak klak, oh siam, oh lagaih. Yaok thun tok ngak hu sa vụ padai mùa, năng suất oh glaong. Meng thun 2004, urang nong Khmer thau pambuak bruk haong gauk piah ngak, jak gauk ngak padai pahe angaok sa mblang taneh prong. Gam ngak, gam bac megru ilamu di gauk saong pandar dom ilamu bac megru hu meng dom tal pato pathram di gah ngak nong, dom mbang ginum biai, dom mblang hamu prong ngak tui jalan kinh tế kapul nyaom haong pajaih padai pahe ST5, ST20… blaoh tal harei ini lac ST24, ST25, ST tím dak harei dak me-om bak mblang hamu di palei: "Kein laba kuhria rah tapa dut haong padai bhian ngak meng 5 -10 triệu đồng/ha. Meyah padai bhian ngak laba hu 20 triệu ye padai ST24, ST25 laba hu labaih 25 triệu tagok. Meda lac meng di tuk salih tapa ngak padai ST, rai diuk di mikva drei hu patagok, kaya meda jang".

   Meng bruk ngak mblang hamu prong, ngak tui jalan kapul pambuak bruk, hợp tác xã, urak ini urang nong xã Viên Bình pandar pajaih padai cao sản, đặc sản meblah jaik 90%. Vụ padai bahrau blaoh, padai đặc sản ST hu yaom meng labaih 7000 đồng/kg, kayua yau nan ye bo kein laba di mikva ngak padai mek hu jaik 30 triệu đồng/1ha. Ong Lê Trung Tuấn, Akaok UB bhap bini xã Viên Bình, huyện Trần Đề, brei thau: "Tal tukvak ini mbaok taneh mblang hamu prong di xã Viên Bình labaih 2000 ha. Mblang taneh patagok lac meng kein laba kinh tế ba mai nan ye bhap bani drei mboh ngak mbang hu ye hu mbaok tame, abih di nyu lac pajaih padai ST 24, ST25, ST tím. Yaok thun chỉ tiêu nghị quyết di Đảng bộ biak caik hatai tal mbaok taneh mblang hamu prong, sangka tacei pato, khik kajap mblang taneh piah ngak habar ngak hu kinh tế, jien mek tame tani tanat ka bhap bani".

Patagok bruk gul pataom, sami samar, sahneng duah dalam bruk ngak mbang pala drak, pablei salih, rik daong cak rok patagok kinh tế, patruh eik patrun kathaot di bhum urang Khmer daok di Sóc Trăng. Dom bruk ngak mbang kinh tế kapul nyaom brei jien mek tame glaong hu rik daong haong pakat ủy, karja peih ngak siam bruk padang ngak palei pala bahrau di puk palei./.